Protection Allah

Normalement insan li bizin so bien être. Et insan pas capave gagne so bien être par li même. Même ene le roi aussi pas capave gagne so bien être par li même. Li pas fine vine le roi par li même. Li fine vine le roi par dimoune. Si pena dimoune même bé ki le roi li pou faire ? Au contraire ene le roi li pli bizin dimoune pou so bien être. Ene dimoune dans l’Afrique ou bien dans la brousse li pou capave débrouille so la vie mais pas ene le roi. Si li arrivé débrouille so la vie aussi, li pou réussi faire li avec boucou difficulté. Donc ene le roi li pli bizin lezot pou so bien être ki ene dimoune ordinaire. Et ene dimoune ordinaire li pli bizin lezot ki ene dernier dimoune misère. Ça veut dire ki dans ça dounia-là, pou nou gagne nou bien être, nou pou bizin lezot. Acoze ça nou trouvé ki dimoune en général, li cherche recours à banne moyen ki capave rane li confortable. Si li pé gagne faim et soif, li alle rode mangé boire. Si li pena casse, li alle guette dimoune ki ena casse. Si li pé être dominé acoze ki li tout seul, li alle guette banne ki capave secours li. Si li malade, li alle rode médecin et li prend médicament. Tout ça banne moyen ki ene dimoune li essaye attrapé pou ranne li confortable, c’est banne moyen pli fragile ki ena ça. Et ça banne moyen-là zot pli fragile ki ene la caze zaraignée aussi si pena la main Allah Ta’ala là-dans.

C’est Allah Ta’ala même ki faire difeu allumé. C’est Allah Ta’ala même ki faire difeu brulé C’est Allah Ta’ala même ki faire couteau coupé. De l’eau li dans control Allah Ta’ala même. Quand Allah Ta’ala oulé, la pluie tombé. C’est par l’ordre Allah Ta’ala même ki nou gagne la sécheresse et cyclone. Et parfois la pluie tombé mais nou pas trouve l’effet ki nou ti pé atane. C’est Allah Ta’ala même ki donne guérison. Ena dimoune li capave gagne so guérison par ene simple la tisane cot ene lot pas capave gagne li par banne médicament ki coute li par milliers de roupies. Ene dimoune li capave pas gagne sommeil dans so la caze ki bien climatisé lors ene lilit bien confortable tandis ki ene dernier dimoune misère lors roche, lors la paille ou lors ene simple lilit casse-cassé aussi li commence ronflé couma li poze so la tète. Donc tout banne moyen ki ena pou rode le bien être dan ça dounia-là, li pas pou efficace aussi longtemps ki Allah Ta’ala pas oulé. Acoze ça Allah Ta’ala pé dire dans ça ayat-là :

مَثَلُ الَّذِينَ اتَّخَذُوا مِن دُونِ اللَّـهِ أَوْلِيَاءَ كَمَثَلِ الْعَنكَبُوتِ اتَّخَذَتْ بَيْتًا ۖ وَإِنَّ أَوْهَنَ الْبُيُوتِ لَبَيْتُ الْعَنكَبُوتِ ۖ لَوْ كَانُوا يَعْلَمُونَ ‌ۗ

« L’exemple de banne ki fine alle cherche protecteur ailleurs apart Allah li couma dire ene zaraignée ki fine nate ene la caze. Certainement la caze pli fragile, c’est la caze zaraignée si zot ti capave saisi le point. » (V41/S29)

Allah Ta’ala pé montré le point ki bizin saisi c’est ki narien pas capave représente narien malgré ki li capave paraite efficace si Allah Ta’ala pas oulé. Ene dimoune li alle cachiette dan ene forteresse bien équipé. D’après l’apparence, ça dimoune-la fine fini gagne so sécurité. Mais si Allah Ta’ala pas oulé, ça forteresse-là aussi na pas pou représente plis ki ene la caze zaraignée. Nou guette japon ki fine arrivé. Dans l’espace quelque secondes même Allah Ta’ala fine faire li retourne 50 ans en arrière malgré ki li ti paraite extra puissant.  Nou capave ena tout banne moyens mondaine. Dans nou guetté li paraite bien efficace et bien sophistiqué mais quand Allah Ta’ala décidé, tout ça-là zot pas représente plis ki ene la caze zaraignée. Et ça aussi c’est necque ene comparaison pou nou gagne ene l’idée. En vérité li pas représente narien même ça. Nou guette l’ironie de ça kitchose-là. Li extra fragile mais quand Allah Ta’ala oulé, li servi ceki pli fragile pou détruire ceki pli puissant. Allah Ta’ala pas bizin bel bel kitchose. Allah Ta’ala ena capacité mette tout kitchose enba lao couma li ena capacité garde tout kitchose en l’ordre. Allah Ta’ala fine servi ababeel pou détruire l’éléphant. Nou ki nou ti pou pensé ? Ça balle-là pas efficace-ça. Bizin ene pli gros balle. Mais Allah Ta’ala pas bizin ça aussi li. Lot coté Allah Ta’ala fine servi ça même la caze ki pli fragile pou protège Nabi ‎(Sallallaahou A'laihi Wasallam)‎ quand Nabi ‎(Sallallaahou A'laihi Wasallam)‎ ti quitte makkah pou alle madina ensam avec Hazrat Abou Bakr ‎(Radiyallahou anhou‎)‎. D’abord li fine cachiette dan ene la cave (Ghar-e-Thawr). Couma zot fine rentré, Allah Ta’ala fine faire l’arrangement. Li fine faire ene zaraignée natte so la caze zis dans l’entré de ça la cave-là. Après ene pigeon fine vini et fine ponne deux dizef. Tout kitchose fragile là-dans. Banne kaafir fine vine laba et ene fine envi guette endans. So camarade fine dire li : « To la tète bon? Ki to pé rodé là-dans? To pas trouvé ki ena ene la caze zaraignée ki fine natté avant naissance même de (Nabi) Mohammad ‎(Sallallaahou A'laihi Wasallam)‎ (tellement la caze zaraignée ti pé paraite vieux).  Et lors-là ene pigeon fine ponne deux dizef là-dans. Ça zoizeau-là li farouche et li pas reste cot ena dimoune. »

Allah Ta’ala faire tout kitchose arrivé. Li protège ceki li oulé dan ene façon bien subtile.

...وَمَا يَعْلَمُ جُنُودَ رَ‌بِّكَ إِلَّا هُوَ...ۗ

« … Et personne pas conne Allah so banne soldats excepté Li même … »

Nou ena ene grand trésor dans nou la main.  Et ça c’est ça croyance ferme dans capacité et qudrat Allah Ta’ala. Ene dimoune li envi gagne succès et protection, alors li bizin vine vers Allah Ta’ala. Et tourne le dos avec Allah Ta’ala, c’est ene moyen pou ranne nou situation pli fragile ki ene la caze zaraignée couma Allah Ta’ala li même fine mentionné dans ça ayat-là.

[Extrait de Al Jamiat Vol.7 No.5]