Zakaat

Zakaat li ene des 5 piliers de l’Islam. Li ene ibaadat ki applique lors ene dibien ou richesse ki ene dimoune possédé. Littéralement li signifié purification, bénédiction, augmentation, appréciation, etc.

Fine appelle li zakaat parceki ça li purifié dibien ki ene dimoune ena. Allah Ta’ala li mette barakat et bénédiction dans ene dimoune so dibien ki so zakaat fine tiré. Ça dibien ki so zakaat fine donné, li augmenté et la personne li même li vine appréciable dans lizié Allah Ta’ala. Donc zakaat li ene moyen pou approché avec Allah Ta’ala. Li ene moyen pou purifié ceki nou ena. Li ene moyen pou gagne barakat dans ceki nou ena.

Zakaat d’après Shariah

D’après shariah, zakaat veut dire donne ene parti de ou dibien ki shariat fine fixé à ene musulman ki misère et pauvre pou le plaisir Allah Ta’ala.

Tamleek – élément essentiel dans zakaat

Ena ene kitchose ki appelle Tamleek. Sans ça zakaat pas compté. Donc li important pou conné ki veut dire Tamleek.

Ki veut dire tamleek ?

Tamleek veut dir faire kikene vine maalik (propriétaire). Dans zakaat Tamleek veut dire faire ene ki mérité vine propriétaire de ene parti de ceki ou possédé. Quand ene dimoune vine propriétaire de certaine kitchose, alors li gagne droit gère li couma li envi. Li capave servi li. Li capave prête ça kikene. Li capave loué li couma li capave vanne li ou bien donne ça kikene en cadeau. Et si li envi li capave garde ça pou so banne zenfants ki zotte capave hérite ça après so la mort.

Etant donné ki ene humain même ki capave vine propriétaire, alors bizin donne ça à ene dimoune ki li libre pou faire ceki li envi. Islamiquement parlant ene zanimau pena abilité vine propriétaire. Coumsa même ene organisation, société ou ene institution pena abilité vine propriétaire. Donc zakaat pas pou compté tanque li pas rente dans propriété ene humain ki mérité. Pas capave donne zakaat dans construction ou entretien masjid, madrassah etc. Coumsa même pas capave acheté banne zeffets ou objets pou mette dans masjid ou madrassah. Similairement pas gagne droit dispose li dans ene façon cote li pas rente dans propriété kikene.

Donne zakaat à travers organisations, société etc.

Li pli bon ki ene dimoune donne so zakaat à banne ki mérité avec so propre la main. Mais li ena aussi droit faire ça à travers kikene ki pou donne ça à banne ki mérité. Ça individu ou l’organisation ou bien société ki faire ça pou appelle li ene wakeel ou bien ene agent.

Ene individu ou ene organisation ki agir comme ene wakeel (agent) de la part banne donateurs bizin ena la connaissance voulue pou capave gère fond zakaat, fitra etc. Acoze ça bizin faire li sous supervision banne ‘Oulamas compétents. La competence li bizin à deux niveau, au niveau connaissance et au niveau l’honnêteté.

Banne responsables et banne organisations bizin conné ki zotte bizin dispose zakaat de banne donateurs au pli vit possible parceki tanque la monnaie zakaat li reste avec ene agent, li couma dire li encore dans la main banne donateurs. Donc banne donateurs pas pou acquitté de zotte responsabilité zakaat tanque ki banne organisations pas fini distribué la monnaie-là. Si par hasard ene donateur arrivé mort avant ki dispose ça la monnaie-là, alors d’après principe agent-là bizin retourne ça la monnaie-là à so banne zenfants. Acoze ça bizin pas tardé pou distribué li. Banne société ou banne organisations ki laisse la monnaie zakaat dormi dans la banque bizin prend compte.

[Extrait de Al Jamiat Vol.7 No.5]