Al Asmaa-oul Housna - الاسماء الحسنى

“Allah ena banne très joli noms. Alors invoque li par ça (banne noms-là)...” (S7 V180)

Allah Soubhaanahou Wa Ta’ala li le Créateur de tout kitchose. Perna aukene Créateur apart Allah Ta’ala. Chaque kitchose ena ene beauté. La source ça beauté-là c’est Allah Ta’ala. Beauté ki Allah Ta’ala fine mette dans tout banne kitchose capave donne nou ene ti l’idée ki quantité joli Allah Ta’ala été. Couma Allah Ta’ala, so banne noms aussi zotte joli. Couma li impossible pou décrire Allah Ta’ala, coumsa même li impossible pou décrire le vrai profondeur de so banne noms. Tout ceki fine décrire et tout ceki pou décrire juska Qiyaamat, li seulement ene z’effort pou donne ene ti l’idée de ceki li capave été. Celui ki ti capave comprend ça pli bien ki n’importe ki sanla, c’est nou bien-aimée Rassouloullah ‎(Sallallaahou A'laihi Wasallam)‎. Li aussi fine bizin dire finalement :

"اَللّهُمَّ لاّ اُحْصِىْ ثَنَاءً عَلَيْكَ اَنْتَ كَمَا اَثْنَيْتَ عَلَى نَفْسِكَ"

“O Allah, mo incapable pou énumère to banne éloges. Toi, to couma to même to fine faire to propre éloge.”

Dans le verset, Allah Ta’ala fine invite nou pou invoque li par so banne noms ki li même li conne so vrai profondeur. Si nou pas capave énumère les bienfaits de ene certaine nourriture, ça pas empêche ça nourriture-là faire so l’effet dans nou le corps. Coumsa même si nou pas capave saisi le vrai profondeur de banne noms Allah Ta’ala, ça pas pou prive nou de so banne bienfaits quand nou prend ça banne noms-là.

Selon ene hadice rapporté par Hazrat Abou Hourairah ‎(Radiyallahou anhou‎)‎, Nabi ‎(Sallallaahou A'laihi Wasallam)‎ fine dire :

“Allah Ta’ala ena 99 noms. Celui ki pou mémorise ça, li pou rente dans jannat” (Mouslim)

Dans ene hadice dans Tirmizi, Rassouloullah ‎(Sallallaahou A'laihi Wasallam)‎ fine énumère ça banne noms-là.

Li bon conné ki Allah Ta’ala ena pli ki 99 noms. Li pas limité à 99. Et dans ça hadice-là aussi, Rassouloullah ‎(Sallallaahou A'laihi Wasallam)‎ pas fine limite li à 99 noms. Li fine necque attire nou l’attention vers ça récompense li ena dans récite ça 99 noms particuliers-là. Apart ça, Allah Ta’ala ena encore lezot noms. Selon ene hadice rapporté par Hazrat Abdoullah Bin Mas’oud ‎(Radiyallahou anhou‎)‎ dans Al Baihaqui, Rassouloullah ‎(Sallallaahou A'laihi Wasallam)‎ ti enseigne banne Sahaba-e-Kiraam ene douaa ki lire :

"... اَسْئَلُكَ بِكُلِّ اِسْمٍ هُوَ لَكَ سَمَّيْتَ بِه نَفْسَكَ اَوْ اَنْزَلْتَه فِىْ كِتَابِكَ اَو عَلَّمْتَه اَحَدًا مِّنْ خَلْقِكَ اَوْ اسْتَاْثَرْتَ بِه فِىْ عِلْمِ الْغَيْبِ عِنْدِكَ"

“O Allah ! Mo dimane toi par tou nom ki appartenir à Toi ki to fine appelle Toi par ça nom-là, ou bien par ça nom ki To fine révèle li dans To livreو ou bien ceki To fine enseigne li à kikene parmi To banne créaturesو ou bien (par ça nom) ki to fine garde cachette li pou Toi …” (Al Baihaqui)

Ça formule douaa-là montré ki ena encore banne noms Allah Ta’ala ki nou pas conné. Donc banne noms Allah Ta’ala zotte ki pas limité à 99 noms seulement.

Le mot حفظ ou bien احصى ki ena dans le texte hadice, signifié comprend et saisi signification ça banne noms-là. Donc celui ki pou récite ça banne noms-là avec croyance et conviction ferme, li pou gagne jannat. Celui ki pas fine arrive dans ene stage aussi élevé, li aussi li bien capave profité par récite li parceki pa perdi narien dans prend nom Allah Ta’ala sous prétexte ki pas capave concentré. Bizin continué récité. Avec ene ti pé la volonté, par l’ordre Allah Ta’ala doucement doucement tout pou vini. Si cause ene mauvais causé involontairement li ena so mauvais l’effet. Alors automatiquent prend Allah Ta’ala aussi pou ena so bénéfice énorme quand même si fine prend li sans concentré là-dans. Parceki Allah Ta’ala li rempli de bonté immense et li boucou généreux.

Allah Ta’ala et so banne attributs

Allah Ta’ala ki été ? Ça en vérité c’est Allah Ta’ala même ki conne ça. Mais Allah Ta’ala fine présente li même par so attributs et so banne qualités ki facilite nou pou conne li par so banne attributs. Par différent rapport, Allah Ta’ala ena différent noms. Par exemple li appelle Ar-Rahmaan parceki li ena boucou pitié (clemence/bonté). Li Al-Ghaffaar parceki li même le pli Grand Pardonneur.

Ene dimoune ena choix faire douaa avec Allah Ta’ala par prend n’importe ki nom Allah Ta’ala selon circonstance. Par exemple quand ene dimoune fine commette péché et li pé dimane pardon avec Allah Ta’ala, alors li pli approprié ki li invoque Allah Ta’ala par so banne attributs couma Al-Ghaffaar, Al-Ghafour, Ar-Rahmaan, Ar-Raheem etc.

[Extrait de Al Jamiat Vol.2 No.8] 

Allah

Allah c'est ça nom par ki nou conne le Créateur Suprême. Le Créateur Suprême fine présente li par ça même nom dans Qour'aan-e-Kareem. Acoze ça Allah c'est le "Ismuzzaat" du Créateur Suprême. "Ismuzzaat" li couma dire ene nom propre. Donc "Allah" c'est le nom propre du Créateur Suprême.

La majorité banne 'Oulama zotte considère ça même nom comme le pli grand nom pou le Créateur Suprême parceki ça nom-là li tellement vaste de par so sens ki li renferme tous banne attributs ki li possédé.

Hazrat Sheikh Abdul Qadir Jeelani (R) dire: "Le nom Allah c'est le Ismul-A'zam". Mais ena ene façon prend ça nom-là afin ki li capave faire so vrai l'effet. Selon Sheikh Abdul Qadir Jeelani (R), bizin dévide le cœur avec tous banne pensées étrangères et pense seulement Allah quand pé prend ça nom-là. A ce moment-là pou trouve so vrai l'effet.

Li pas difficile pou arrive dans ça stage-là. Mais li pas aussi facile et simple ki capave être inculqué dans ene deux jours. Tous kitchose vine facile avec pratique pendant quelque jours ou ene bon boute le temps. Gagne Allah Ta'ala dans le cœur li pas ene ti zaffaire. C'est ene kitchose vraiment inestimable. Si ça prend nou ene longue la vie aussi, li encore bien bon marché ki sans grâce Allah Ta'ala pas ti pou capave gagne li. Donc laisse nou essaye faire li et récite li cent-cent fois gramatin et tantôt tous les jours dans la façon ki fine expliqué. Insha-Allah nou pou trouve so l'effet.

[Extrait de Al Jamiat Vol.3 No.3] 

Ar-Rahmaan

Ar-Rahmaan li sorti depi Ar-Rahmah ki signifié bénédiction ou ene tendresse ki rempli de bonté. Allah Ta'ala li Ar-Rahmaan dans le sens ki li rempli de pitié et de bonté énorme ki perna limite.

Ene dimoune li chagrin so camarade quand li trouve li dans la misère ou dans kit difficulté. Li oulé aide li d'après so capacité. Parfois li trouve li incapable pou aide li malgré ki li ena la volonté ferme pou aide li.

Mais Allah Ta'ala li ena capacité lors tout kitchose. Donc li Ar-Rahmaan dans le sens ki li vine en aide à so serviteur dans tout banne circonstance quand so serviteur dimane li so grâce et et so faveur. D'après ene hadice, Allah Ta'ala li content so banne serviteurs plis ki ene mama content so ti bébé ki pé encore boire avec li. Allah Ta'ala dire dans Qour'aan-e-Kareem:

"Et mo Rahmat (pitié) li couvert tout kitchose …" (S7/V156)

Dimoune dans difficulté ena tendance pense et tappe la porte ene ki li ena l'espoir dans so bonté. Parfois li réussi couma parfois li déçu. Donc ki faire na pas tappe la porte de Ar-Rahmaan ki so la porte de bonté reste ouvert 7 lors 7, nuit et jour, dans tout saison avec ene réussite et garanti à 100 pour 100?

Mais Allah Ta'ala so Rahmat li dessane dans différent forme. Ena fois li dessane en forme de difficulté aussi ki nou appelle "Blessing in disguise".

Ar-Rahmaan so bonté li pas restreint à banne ki dans Deen seulement. Ar-Rahmaan so bonté li ouvert pou banne pécheurs aussi parceki li Rabb pou tous. Mais eski li joli abuse bonté ene Rabb aussi généreux ki rempli de pitié immense par casse so banne l'ordres?

اَللهُمَّ ارْحَمْنِىْ بِتَرْكِ الْمَعَاصِىْ اَبَدًا مَا اَبْقَيْتَنِىْ

"O Allah! Dessane Rahmat (pitié) lors moi par accorde moi le tawfeeq quitte banne péchés tout le temps tanque to garde moi!"

Ene dimoune ki ena dignité, li pou toujours reconnaissant envers ene ki fine ranne li kit service. Li pou ena tendance pas déplaire li. Ene dimoune digne, li toujours ene dimoune ki ena reconnaissance. Donc ene dimoune digne pou toujours reconnaissant envers Ar-Rahmaan ki so Rahmah (bonté) pé dessane à chaque instant lors li.

Si ene dimoune li ena vraiment reconnaissance pou Allah Ta'ala, li pou servi le Rahmah ki li fine gagné en forme de courage, la santé, la richesse, lizié, zoreille, la bouche, la main, li pied etc. dans Allah Ta'ala so l'obéissance.

La méditation lors ça ene attribut-là même li sufi pou change nou la vie. C'est ene attribut ki ena le message de l'amitié, l'espoir et soumission à Allah Ta'ala ki couvert chaque atome de l'univers par so Rahmah infinie à chaque instant.

[Extrait de Al Jamiat Vol.3 No.6]

Ar-Raheem

Ar-Raheem li dérivé de Ar-Rahmaah ki signifié piété, grâce et bonté. Ar-Raheem li pareil couma Ar-Rahmaan. Mais Ar-Rahmaan li ene ti pé pli vaste et pli général de par so sens ki Ar-Raheem. Si Ar-Rahmaan li indique ene Etre ki rempli de grâce et de pitié infinie pou tous so banne serviteurs, Ar-Raheem li indique ça dans ene façon très particulière en faveur banne croyants seulement.

Selon ene hadice ki trouve dans Ibn Maajah, ene fois Rassouloullah ‎(Sallallaahou A'laihi Wasallam)‎ fine tanne Hazrat Aisha ‎(Radiyallahou anhou‎)‎ dire:

"اللهم انى ادعوك الله وادعوك الرحمن وادعوك البر الرحيم"

Rassouloullah ‎(Sallallaahou A'laihi Wasallam)‎ fine attire l'attention Hazrat Aisha ‎(Radiyallahou anhou‎)‎ ki li contenir Ismul A'zam.

Allah Ta'ala ena capacité lors tout kitchose mais là-aussi li faire nou conné ki li rempli de grâce et de pitié afin ki nou demane so grâce et so pitié. Apart ça, li donne nou le message ki nou aussi nou bizin ena pitié pou nou prochain par aide banne ki dans difficulté et par empêche banne dominere faire dominere. Dans ene hadice ki trouve dans Tirmizi, Rassouloullah ‎(Sallallaahou A'laihi Wasallam)‎ fine dire:

" Ar-Rahmaan li pitié banne ki ena pitié. Faire pitié lors banne lors la terre, Celui ki lors le ciel pou pitié ou".

[Extrait de Al Jamiat Vol.3 No.8]

Ar-Raheem

Ar-Raheem et Ar-Rahmaan tous les deux zotte sorti de même racine. Donc en principe perna aukene différence dans signification. Apart ki Ar-Rahmaan li ene ti l'idée pli vaste et pli général ki Ar-Raheem de par so sens. C'est-à-dire Ar-Raheem li ene ti pé pli restreint par rapport à Ar-Rahmaan ki signifié ene être ki ena ene grâce très particulier et spéciale pou banne croyants seulement dans aakhirat. Quant à Ar-Rahmaan li signifié ene être ki ena pitié lors tous so banne serviteurs, croyants et non croyants tous les deux. Alors quand nou dire:

بسم الله الرحمن الرحيم ça signifié "Au nom d'Allah ki ena pitié lors tous so banne créatures sans distinction et ki pou ena ene pitié spéciale lors banne croyants dans aakhirat."

Dans commencement Qour-aan-e-Kareem, Allah Ta'ala fine présente li devant so banne serviteurs par       الرحمن الرحيم pou montré ki li rempli de grâce et de pitié immense malgré ki li même maître de l'univers.

Donc perna perdi dans obéir so banne commandements. Ceki ene dimoune li attane de ene patron très gentil et généreux, li bizin attane boucou plis ki ça avec Allah Ta'ala.

Ene fois Hazrat Aisha ‎(Radiyallahou anhou‎)‎ fine lire:

"اللهم انى ادعوك الله وادعوك الرحمن وادعوك الرحيم ..."

Rassouloullah ‎(Sallallaahou A'laihi Wasallam)‎ fine tanne ça et fine faire Hazrat Aisha ‎(Radiyallahou anhou‎)‎ conné ki Al-Ismul-A'zam trouve dans ça banne noms ki li fine cité-là. (Ibn Maajah)

[Extrait de Al Jamiat Vol.3 No.13]

Al-Malik

Al-Malik veut dire celui ki ena l'autorité dans so royaume. Li agir couma li oulé sans kit pression de la part kikene. Li contrôle tout. Contrairement à banne le roi mondaine ki bizin le peuple pou vine le roi, Allah Ta'ala li Al-Malik dans le sens ki li pas bizin personne. Li pas bizin aukene soutien pou vine le roi. C'est ene le roi ki crée tout, faire tout et contrôle tout. Li ene le roi ki so royauté pas affecté jamais. Même si zotte tous désobéir li, ça pas diminué narien dans so royaume. C'est ene le roi ki so trésor li pas épuisé jamais. So trésor li tellement immense ki capave faire tous dimoune vine le roi sans diminué par ene iota aussi.

Banne le roi ou banne dirigeants dans ça le monde-là bizin faire face à boucou obstacles avant zotte capave tire quelque chose depi dans fond publique pou donne kikene. Zotte peur l'opposition et zotte peur l'impact ki ça capave ena au niveau national et international.

Gloire à Allah, Al-Malik ki perna pou ranne compte à personne! Li libre pou donne à celui ki li oulé ceki li oulé et la quantité ki li oulé. Perna personne ki capave bloque ene faveur ki Allah Ta'ala oulé donne kikene.

[Extrait de Al Jamiat Vol.3 No.15]

Al-Quddous

Al-Quddous c'est celui ki pure et parfait par excellence et ki li au delà de toute sorte défection et manquement. Et ça li applique zisse pou Allah Ta'ala. So perfection et so pureté pena ene commencement ni li ena kit limite cote li arrête existé. Li ti existé depi tout le temps et li pou existé ziska tout le temps.

Quant à la pureté ki lezot ena, c'est ene reflet de ça pureté ki Allah Ta'ala possédé. Li couma ça lumière et ça l'éclat ki nou trouve dans la lune. En vérité li pas so propre l'éclat. C'est le reflet du soleil ki faire li éclairé.

Donc Al-Quddous so pureté li source de tout pureté. Si la pureté ene kitchose capave attire nou, alors Allah Ta'ala li pli mérite ki nou attiré vers li parceki li même le centre et la source de ceki existé comme pureté. C'est ene pureté absolue et éternelle.

[Extrait de Al Jamiat Vol.4 No.2]

As-Salaam

Ça signifié ene Etre ki li la source de la paix et de sécurité. Et aussi li signifié ene être ki au delà de toute sorte manquement et imperfection. Allah Ta'ala li As-Salaam dans le sens ki li garanti so banne serviteurs sécurité, la paix et tranquillité et acoze ki li parfait dans so l'essence et so banne attributs tout kitchose ki attribué à Allah Ta'ala li parfait par excellence. Allah Ta'ala so l'existence li parfait. So connaissance, so pouvoir, so l'autorité, so parole, tout parfait.

Allah Ta'ala li As-Salaam dans le sens ki n'importe ki genre de protection ki n'importe ki sanla fine gagné, ça c'est so faveur même ça. C'est li même ki inspire la paix et la tranquillité dans le cœur.

C'est li même ki ti protége Hazrat Ibrahim ‎(Alaihis Salaam)‎‎ dans du feu. C'est li même ki ti protége Hazrat Moussa ‎(Alaihis Salaam)‎‎ dans la mer. C'est li même ki ti protége Hazrat Yusuf ‎(Alaihis Salaam)‎‎ dans puit. C'est li même ki ti protége Hazrat Yunus ‎(Alaihis Salaam)‎‎ dans vente poisson. Et c'est li même ki ti protége Rassouloullah ‎(Sallallaahou A'laihi Wasallam)‎ dans la cave Thour. Et finalement banne musulmans pou gagne so protection même conte Dajaal.

L'intelligence de banne intelligents, courage de banne gros le bras, pouvoir de banne pseudo super puissants et la tyrannie de banne tyrans, zotte neutralisé divant la volonté de As-Salaam.

Ça attribut-là li exige de nou ki nou garde nou loin de toute sorte l'indécence, l'immoralité et de bassesse. Li exige de nou ki nou purifié nou l'intérieur de banne vilain manière couma rancune, la jalousie et l'orgueil zisse pou le plaisir de As-Salaam afin ki nou vine ene source de paix pou entier l'humanité. C'est ça le musulman ideal et c'est ça ki appelle la soumission totale. Selon ene hadice, Rassouloullah ‎(Sallallaahou A'laihi Wasallam)‎ fine dire:

"Le véritable croyant c'est ene ki l'humanité reste en sécurité de so banne méfaits."

C'est-à-dire li pas faire personne du tort.

[Extrait de Al Jamiat Vol.4 No.3]

Al-Mou'mine

Nou appelle Allah Ta'ala Al-Mou'mine acoze ki Allah Ta'ala li même source de AMN (la paix).

Allah Ta'ala so Deen c'est le seul moyen pou amène la paix dans le monde. Suive so banne commandements li développe l'amitié dans le cœur. La tranquillité morale trouve uniquement dans prend so nom. La pensée d'Allah Ta'ala li ene source d'énergie et de courage pou banne ki dans difficulté et dans problème. Li ene l'espoir pou banne ki fine désespéré dans la vie. C'est li même ki fine accorde le cadeau de Iman à so banne serviteurs. C'est ene cadeau ki garantie le salut éternel.

Sans suive so banne commandements, pas capave ena la paix dans le monde. Ça même c'était le moyen ki tous banne prophètes fine appliqué et fine adopté. Et c'est ça même chemin ki bizin attrapé si le monde ena la volonté sincère pou trouve la paix lors la terre.

[Extrait de Al Jamiat Vol.4 No.6]

Al-Mouhaimine

Al-Mouhaimine li dérivé de هيمن (Haimana). Nou dire ça pou ene zoiseau quand li étale so les ailes pou couvert so banne zenfants afin pou protége zotte. Nou appelle Allah Ta'ala Al-Mouhaimine acoze ki li couvert so banne créatures sous so grâce immense pou protége zotte de tout ceki capave nuire zotte et indispose zotte.

Accorde la protection li dépanne lors la connaissance parceki ene dimoune li capave disposé pou aide kikene mais li capave pas arrivé faire li acoze li pas conne l'endroit cote ça dimoune dans difficulté-là été. Ou bien li capave pas réussi aide li acoze ki li pas conné si eski li dans difficulté ou bien non. Coumsa même si ene dimoune conne kikene ki dans difficulté et ki bizin aide, li capave pas arrivé tire li depi dans difficulté parceki li pena la capacité faire li. Donc pou capave assure ene protection à tout niveau et pou tous, li nécessaire ena la connaissance de tous et partout et li bizin ena le pouvoir absolu pou exécute li. Ça amène nou pou comprend ki attribut de Al-Mouhaimine li nécessite à la fois attribut de علم (l'omniscience) et قدرة (pouvoir absolu) parceki sans ça deux attributs-là pas capave assure la protection. Donc Allah Ta'ala li Al-Mouhaimine parceki li conné ki sanla et cot ça dans ki difficulté li été et li ena tout capacité et le pouvoir pou accorde li protection. Alors Allah Ta'ala même li le Protecteur et Garant de l'univers ki garanti à chaque atome de ça l'univers-là so protection et so besoin.

Ene dimoune ki croire dans ça attribut-là bizin pas hésité pou pratique so Deen n'importe dans ki circonstance li capave été par la peur ou la frayeur de kikene parceki li conné ki li sous protection Al-Mouhaimine ki garanti constamment so sécurité et so salut. Ça protection-là li visible et li manifesté pli bien pou banne ki reste dans l'obéissance Allah Ta'ala. Donc l'obéissance et soumission à Allah Ta'ala li garanti la sécurité et le salut éternel.

[Extrait de Al Jamiat Vol.4 No.10] 

Al-Azize

Al-Azize li désigne ene celui ki possède « izzah ». Izzah signifié pouvoir, dignité et grandeur. Donc Al-Azize c’est celui ki possède pouvoir, dignité et grandeur. C’est necque Allah Ta’ala même ki ena le vrai pouvoir et la dignité réelle. Tout ceki paraite ena pouvoir ou dignité dans ça le monde-là, fine gagne ça de coté Allah Ta’ala. Dimoune vine digne par ça dignité ki Allah Ta’ala fine accorde li. Alors li bizin attache li avec Allah Ta’ala même. Acoze ça faudré pas dimoune faire kitchose pou gagne l’honneur dans lizié dimoune. Parceki l’honneur et dignité li trouve zisse dans la main Allah Ta’ala.

L’honneur ki ene dimoune gagné par dimoune li pas ene vrai l’honneur. C’est necque ene genre de mirage ça. Faudré pas reste dans ene déception pareil. Zordi li capave mette ou lors so z’épaule et demain ça même dimoune capave piétine ou en bas so li pied. Tout dépanne cote so l’intérêt placé ; dans prend ou lors so la tête ou bien dans crase ou en bas so li pied.

Mais personne pas capave déshonore ene ki Allah Ta’ala fine décide pou honore li. Coumsa même ene ki Allah Ta’ala fine décide pou déshonore li, personne pas capave donne li l’honneur. L’honneur ki Allah Ta’ala accordé, c’est ene vrai l’honneur. Li couma ene beauté naturelle ki pas bizin maquillé pou paraite joli. Quant à ene l’honneur ki dépanne lors flatterie banne dimoune, li couma dire ene maquillage ki pas capave faire vilain paraite joli. Li necque ene consolation pou la personne li même ki gagne illusion ki li pé paraite joli.

Allah Ta’ala fine faire nou conné ki li Al-Azize pou nou cherche recours avec li même dans tous nou banne problèmes. Et pou nou conné ki vrai l’honneur li trouve dans suive so commandement. Et pou nou pas casse so l’ordre zisse pou gagne l’honneur dans lizié dimoune.

Rassouloullah ‎(Sallallaahou A'laihi Wasallam)‎ fine dire ki Allah Ta’ala li éleve ene parti dimoune par Qour’aan couma li déshonore ene l’autre parti par Qour’aan même. C'est-à-dire ça parti ki suive Qour’aan, li sorte gagnant et ça groupe ki tourne le dos, li vine perdant.

Hazrat ‘Oumar ‎(Radiyallahou anhou‎)‎ fine dire si ene dimoune oulé passe par ene l’autre chemin apart l’Islam pou gagne l’honneur, li pas pou gagne narien apart déshonneur.

A la lumière de tout ça-là, li pas difficile pou conne la vrai raison de ceki la communauté musulmane pé subir !

[Extrait de Al Jamiat Vol.4 No.11]

Al-Jabbaar

Jabara signifié ‘réparer’ en arabe. Jaabir c’est ene kikene ki répare ene manquement ki capave ena dans certaine kitchose.

Jabbaar c’est ene kikene ki ena ene capacité avec excellence pou répare n’importe ki manquement à n’importe ki niveau. Pena personne ki capave possède ene capacité pareille apart Allah Ta’ala. Acoze ça c’est Allah Ta’ala tout seul ki Al-Jabbaar.

Pou tous manquements ki ene dimoune pé capave subir au niveau so la santé ou bien au niveau finance ou bien au niveau professionnel ou soit au niveau familial ou conjugal ou bien à n’importe ki niveau, alors li bizin senti li soulagé ki ena ene la porte Al-Jabbaar pou tappé ki possède le pouvoir répare li et mette dans l’ordre tout ceki pas dans l’ordre.

Nou bizin toujours recherche recours avec Allah Ta’ala ki Al-Jabbaar pou tous banne problèmes parceki narien pas capave dressé si Allah Ta’ala pas dresse li. Donc bizin reste en contact permanent avec Allah Ta’ala. Meilleur façon et seul façon pou établir ça contact-là c’est suive so banne commandements dans tous banne aspects de la vie.

[Extrait de Al Jamiat Vol.4 No.13]

Al-Moutakabbir

Al-Moutakabbir c’est celui ki possède le "Kibriya". Et kibriya signifié grandeur. Donc Al-Moutakabbir signifié ene ki possède la grandeur.

Allah Ta’ala li Al-Moutakabbir dans le sens ki so grandeur li incomparable. Pena narien pareil couma Allah Ta’ala. Tout ceki ena grandeur fine gagne li par Allah Ta’ala. Vrai grandeur c’est ene grandeur ki pas fini jamais ni li capave éclipsé par kit élément. Dans ça sens-là, pena personne apart Allah Ta’ala ki Al-Moutakabbir. Tout ceki pretanne ena grandeur, li pas plis ki ene prétention. C’est ene tentative en vain pou usurpe ene qualité ki li exclusif pou Allah Ta’ala, Al-Moutakabbir.

Ene dimoune ki conné ki Allah Ta’ala li Al-Moutakabbir, li pou toujours humble. Pli ene dimoune conne grandeur Allah Ta’ala, pli li vine humble et obéissant. Jamais li pou ena le complexe de supériorité. C’est ene maladie ki trouve dans banne ki oublié reconnaite ki ena ene seul Moutakabbir. C’est ene complexe nuisible et néfaste pou la santé spirituelle de ene dimoune. Li tellement grave ki présence ene étincelle narien di tout de ça maladie-là li ene obstacle pou rente dans jannat. C'est-à-dire ene tigite narien ditout de ça maladie-là li prive la personne de so bien être dans aakhirat.

Méditation lors ça attribut-là li amène ene dimoune à la fois pou cherche recours à Allah Ta’ala seulement pou tous so banne besoins et faire li reconnaite et respecté droit lezot. En d’autre mots, si necque dimoune médité lors ça attribut-là et li applique ceki ça pé dimandé, alors personne pas pou bafoué kikene so droit et tout dimoune pou vive en paix.

[Extrait de Al Jamiat Vol.5 No.2]

Al-Khaliq

Al-Khaliq veut dire le Créateur. Tout ceki nou trouvé divant nou et ceki au delà de nou perception, c’est banne kitchose ki Allah Ta’ala même fine crée. Banne kitchose ki pas ti existé fine existé par Allah Ta’ala. C’est Allah Ta’ala li tout seul ki Al-Khaliq. C’est li même ki fine crée tout kitchose.

Crée et fabriqué li pas la même chose. C’est deux kitchose différent. Ene fabriquant li fabrique ene l’objet à partir banne matière ki déjà existé. Mais le Créateur li créa à partir néant. Li pas bizin matière première. Et li conne tous banne détails lors ceki li fine crée. Narien pas échappe so connaissance.

"Eski li pas conne ceki li fine créé … ?" (V14/S67)

Allah Ta’ala fine créé insaan et tout ceki insaan bizin. Li conne chaque atome dans ça l’univers-là et li conne fonction approprié et convenable de chaque atome de l’univers.

Le manuel ki Allah Ta’ala fine présenté en forme de Qour’aan-e-Kareem et ki fine élaboré et exemplifié par le Moubarak Ouswah (model) de nou bien aimé Nabi ‎(Sallallaahou A'laihi Wasallam)‎, li garanti le bon fonctionnement de chaque atome de ça l’univers-là. Etant donné ki pena aukene Khaliq apart Allah Ta’ala, donc pas pou ena aukene manuel ki capave pli efficace ki ça manuel ki Allah Ta’ala Al-Khaliq fine proposé.

Dans commencement Qour’aan aussi, Allah Ta’ala fine introduire li à l’humanité par ça même attribut de Al-Khaliq. Et lors ça même base li fine invite l’humanité pou adore li.

"O banne dimoune, adore zotte Rabb ki fine créé zotte et banne ki avant zotte …" (V21 /S2)

Adoration c’est le droit exclusif de Al-Khaliq (créateur). Na pena aukene Créateur apart Allah Ta’ala. Allah Ta’ala li tout seul Al-Khaliq. Donc Allah Ta’ala li tout seul mérité ki nou adore li.

[Extrait de Al Jamiat Vol.5 No.7]

Al Baari

Al-Baari signifié celui ki fine donne l’existence à tous banne créatures dans ene façon formidable et convenable avec ene fonction précise. Tout ceki Allah Ta’ala fine créé, li bon dans la façon ki li fine crée li et narien pas inutile dans banne kitchose ki Allah Ta’ala fine crée. Chaque kitchose ki Allah Ta’ala fine crée, li bon dans so place.

tout ceki fine être crée, fine être crée pou le bien-être de l’humanité. Allah Ta’ala dire :

"Li même celui ki fine crée tout ceki ena lors la terre pou ou bien-être …" (V29 S2)

Insaan li bénéficié avec ça banne kitchoses-là quand li suive strictement banne consignes Allah Ta’ala dans utilise zotte. Tout désordre dans dounia li vine dans pas respecté ça banne consignes-là et dans change fonction ene kitchose.

Par exemple Allah Ta’ala fine crée zomme et fine confié li certaine responsabilité. Coumsa même nou bizin comprend ki Allah Ta’ala fine crée madame dans ene façon ki compatible avec so fonction. So constitution fragile et faible pas permette li faire banne travail difficile et lourd. Confié li banne responsabilité ki li pas fine être crée pou ça, li couma dire servi ene ti couteau pou coupe ene gros pied. Définitivement couteau-là pou cassé mais pied-là pou reste intacte et pas pou ena couteau pou li coupe légumes. La cuisine pou abandonné sans travail dans jardin avancé.

Ça même raisonnement li applique dans tous banne domaines. Et peut-être ça même ki appelle "Right man in the right place". Servi chaque kitchose dans so facon approprié même ki appelle ‘Adl (justice) et déplace ene kitchose depi dans so place approprié appelle ‘Zulm’ (l’injustice).

Jamais pou ena tranquillité dans ça le monde-là tanque pena la volonté voulue pou élimine zulm. Et zulm pou continué resté tanque nou pas pou soumette nou avec consignes divine dans gère chaque atome de nou l’entourage.

De ce fait, l’attribut Al-Baari li représente ene message de la paix, la justice et l’harmonie.

[Extrait de Al Jamiat Vol.5 No.9]

Al-Mousawwir

Al-Mousawwir signifié celui ki fine donne chaque créature so forme, so dimension et so couleur. Par exemple ene humain capave être classifié en différentes catégories par rapport à différent langage, couleur, physionomie, dimension, mentalité, intelligence etc. Et coumsa même tous banne espèce ki trouve dans la mer, lors la terre et dans l’espace, c’est Allah Ta’ala même ki fine créé toute la création et c’est li même ki fine donne chakene so forme, so dimension, so couleur et tous banne qualité ki chaque kitchose possédé. Selon Allaamah Qoushairi (R) et banne ‘Oulama en général, quand dimoune arrivé conné depi au fond de li même ki tout kitchose fine existé dans forme ki zotte été par capacité Allah Ta’ala, alors jamais li pou fier de banne bienfaits et faveurs ki li possédé. Li pou toujours humble parceki li conné ceki li été, li fine gagné de la part Allah Ta’ala. Jamais li pou sous-estime kikene acoze so banne manquements parceki ceki li ena c’est ceki Allah Ta’ala fine accordé. Li pas fine gagne par li. Si li conne guetté, li pou trouve Allah Ta’ala so Qudrat (capacité) dans chaque kitchose. Li pou fasc­iné et émerveillé par grandeur Allah Ta’ala. A la longue ça pou faire li vine aashiq pou Allah Ta’ala. Ene fois ki Ishq-e-Ilaahi dessane dans le cœur, tout kitchose vine fade. Tout kitchose vine secondaire. Necque Allah Ta’ala même ki vine so but.

[Extrait de Al Jamiat Vol.5 No.11]

Al-Ghaffaar

Ghaffaar li dérive du verbe Ghafara ki signifié cachiette ou protégé.

Allah Ta’ala appelle li Al-Ghaffaar acoze ki li cachiette péchés so banne serviteurs. C'est-à-dire li pardonne zotte et li gracié zotte. Donc Al-Ghaffaar veut dire le Grand Pardonneur ki rempli de grâce et de bonté pou so banne serviteurs. Allah Ta’ala so grâce et so bonté pena limite. Si par exemple ene dimoune li arrivé commette le même péché 70 fois dans ene seul jour et à chaque fois li dimane pardon avec Allah Ta’ala, alors Allah Ta’ala pou pardonne li tous les 70 fois.

Allah Ta’ala li pardonne toute sorte péché. Faudré pas pensé ki ena kit péché impardonnable. Divant grâce Allah Ta’ala pena narien ki pas capave être gracié. Oui ena ene seul péché ki Allah Ta’ala pas pou pardonné. Ça péché-là c’est shirk et kufr. Si ene dimoune fine quitte ça dounia-là avec shirk et kufr, alors ça péché-là pena pardon. Mais si ene dimoune li repentir de so banne péché et de so shirk et kufr avant li mort, alors 100 banané so kaafir aussi li capave être gracié dans ene clin d’œil par so grâce immense.

Pardonne péché li trouve dans la main Allah Ta’ala li tout seul. Li pas trouve dans kikene so la main. Li pas trouve dans la main Peer, Sheikh, Wali ou Alim. Allah Ta’ala dire dans Qour’aan-e-Kareem :

« … Et ki sanla capave pardonne banne péchés apart Allah … » (V135/S3)

Allah Ta’ala pas fatigué pardonné. Faudré pas ene dimoune croire ki li ene trop grand pécheur et gunehgaar ki pas pou capave gagne pardon. Allah Ta’ala li pas couma insaan ki li plein ou ranse ou bien li fatigué faire ene kitchose. Allah Ta’ala li pas emporté ou influencé par aukene condition ou circonstance. Allah Ta’ala li en colère sans être emporté par la colère. Coumsa même li content sans être emporté par la joie. Donc nou bizin pensé ki nou Rabb, Allah Ta’ala li Al-Ghaffaar ki so la porte de pardon li reste grand ouvert tout le temp. Dans ene hadice Qudsi, Allah Ta’ala dire :

« O mo serviteur, si to vine vers moi avec ene quantité péché ki capave rempli la terre et to dimane moi pardon, mo pou pardonne toi et ça pas pou dire moi narien. »

Dans attribut Al-Ghaffaar ena ene message de l’espoir. C’est l’espoir d’être gracié par Al-Ghaffaar ki rempli de pitié immense pou so banne serviteurs. C’est ene l’espoir ki continué existé malgré ki qualité péché ki ene dimoune fine capave faire. La porte de ça l’espoir-là li reste ouvert 24 lors 24. Na pena la pluie, soleil, cyclone ou mauvais temps ki empêche li reste ouvert. C’est ene la porte ki pas surveillé par aukene gardien ki empêche kikene rentré l’heure ki li content. Mais faudré pas faire péché lors l’espoir ki capave gagne grâce plitard. Ça appelle abuse la bonté. Ki conné ou capave pas gagne le temps ou bien la volonté pou dimane pardon. Li couma dire mette maladie avec ou expressément zisse lors l’espoir ki ou ena antidote dans ou possession. Mais ça aussi li possible ki capave pas gagne le courage pou prend li ou bien pas gagne le temps même pou prend li.

Acoze ça bizin toujours faire le maximum zeffort pou pas désobéir Allah Ta’ala. Et faudré pas sous-estime kit péché. Bizin évite grand péché et ti péché tous les deux. Si jamais fine arrive kit erreur, alors pas tardé pou dimane pardon. Dimane pardon li garanti le salut et le bien être total. Rassouloullah ‎(Sallallaahou A'laihi Wasallam)‎ fine dire :

« Celui ki attrape istighfaar (dimane pardon) comme ene principe, Allah Ta’ala faire ene chemin sorti pou li depi dans tout difficulté. Li soulage li dans tout problème et li donne li so provision dans ene façon ki li pas attane. » (Abou Dawoud)

[Extrait de Al Jamiat Vol.5 No.15]

Al-Qahhaar

Al-Qahhaar c’est celui ki ena le pouvoir absolu et control lors tout kitchose. Etant Al-Qahhaar, Allah Ta’ala ena pouvoir non seulement lors nou le corps physique, li ena le control total lors nou le cœur, nou ‘rouh’ et lors tous nou parties le corps. La terre, la mer, l’espace et tout ceki ena dans l’espace li totalement dans contrôle Allah Ta’ala. Allah Ta’ala ena l’autorité lors tout kitchose. Allah Ta’ala li tout seul ki dirige partout. Li pena associé. Li pena partenaire. Li faire ceki li oulé.

« Ya Qahhaar ! Faire nou vine dans to chemin par force si nou pas pé oulé vini par le mauvais ki ena dans nou. »

"Hazrat Umair Bin Haani ti pé faire 1000 rakaat et 100,000 tasbeeh par jour." (Tirmizi)

[Extrait de Al Jamiat Vol.5 No.12]

Al-Wahhaab

Le mot Wahhaab li vine à partir le mot hibah ki signifié cadeau. Le verbe wahaba veut dire donne quelque chose en cadeau à quelqu’un. Quand nou dire wahib nou signifié le donateur. Donc Al-Wahhaab c’est ene donateur par excellence ki jamais agacé ou bien fatigué ou bien incapable pou donné. Li ena tout. Li capave donne tout ceki li envi. Narien pas manqué dans so trésor. Et c’est Allah Ta’ala.

Allah Ta’ala li Al-Wahhaab parceki li même accorde tout ceki tout so banne créatures bizin n’importe quand et n’importe cote ça. Tout ceki n’importe ki sanla pé jouir ou bénéficié, c’est faveur Allah Ta’ala. Et ziska qiyamat et même après qiyamat ziska l’éternité, ça pou continué.

Allah Ta’ala so faveur li depi tout le temps et li pou reste ziska tout le temps. Li pas restreint à ene certaine l’époque ou l’endroit. Allah Ta’ala ena capacité verse so faveur partout et tout le temps. Pena aukene pénurie acote Allah Ta’ala ni ena kit obstacle ki capave empêche Allah Ta’ala verse so faveur lors so banne créatures.

Malgré tout ça banne faveurs ki Allah Ta’ala fine comblé régulièrement lors so banne créatures, ça pas fine diminué dans so trésor par ene iota aussi. C’est ene la porte ki reste ouvert tout le temps. Ici pena congé, pena mauvais temps.

Le mot hibah signifié ene cadeau ki ene dimoune faire à kikene sans exige ou attane quelque chose en retour. Le fait ki Allah Ta’ala li Al-Wahhaab montré ki Allah Ta’ala li pena aukene bénéfice à gagné dans verse so banne faveurs lors so banne créatures. Allah Ta’ala li pas dépanne lors narien. Li indépendant. Alors li pas bizin personne ni li attane kitchose ni li exige kitchose en retour de so banne bienfaits. De l’autre coté nou bizin so banne faveurs à chaque instant régulièrement. Tout ceki nou pé bénéficié, c’est so faveur ki li fine comblé, uniquement de par so grâce sans aukene mérite de nou part.

Allah Ta’ala ena tout ceki nou bizin.

"Pena kitchose ki nou pena so réserve à cote Nou … " (V21/S15)

Allah Ta’ala content quand nou dimane li. Allah Ta’ala pas retourne aukene la main vide ki fine tallé divant li. Donc tous banne ki fine désespéré dans la vie, bizin pas blié ki ena Al-Wahhaab cote pena perdi et cote capave gagne solution de tout problème.

Méditation lors ça attribut-là donne grand l’espoir et développe et renforci confiance dans Allah Ta’ala ki li la clé même de tout succès.

[Extrait de Al Jamiat Vol.5 No.14] 

Ar-Razzaaq

Quand nou dire rizq nou ena tendance comprend nourriture par ça. Mais li pli vaste ki ça parceki Rizq li comprend tout ceki ene créature li bénéficié et li servi. Dans ça sens-là, non seulement mangé-boire, mais ceki li respiré et le courage et l'énergie ou richesse ki li ena, tout ça-là c'est Rizq. Et tout ça-là li accordé et fourni par ene seul Etre : Allah Ta'ala. Par rapport à ça, nou appelle Allah Ta'ala Ar-Razzaaq. Et par cela nou comprend ki pena personne ki capave appelle Ar-Razzaaq apart Allah Ta'ala.

"Et pena narien ki rampé lors la terre ki so rizq li pas lors charge Allah Ta'ala." (V6/S11)

Par cela nou comprend ki Allah Ta'ala couma li fourni ene dernier misère tout ceki li bizin, coumsa même ene pli grand le roi aussi bizin Allah Ta'ala pou tous so banne besoins. Personne pas indépendant divant Allah Ta'ala. Na pena personne indépendant dans fourni li même ene ti dernier kitchose à tel point ki li bizin Allah Ta'ala pou ça tigite l'énergie ki bizin pou batte so lizié aussi. Ça li invite nou pou tappe so la porte même pou tout ceki nou bizin. C'est ene la porte ki reste ouvert 24/24 indépendamment de saison et de climat. C'est ene la porte dans pli sire et pli garanti. Zeffort ki ene dimoune li faire ailleurs, li bizin faire li pli bien ici à travers doua et istighfaar parceki tout confiance ki nou capave placé dans n'importe ki moyen, li pas plis ki ene la caze zouzou ki nou faire avec di sable lors la plage ki capave balié à n'importe ki moment par vague la mer.

Acoze ça nou seul recours c'est Allah Ta'ala ki li ena tout ceki nou bizin et ki capave donne nou tout ceki nou bizin à n'importe ki moment dans la nuit ou dans lizour. Ena ene quantité moyens ki ene dimoune adopté pou gagne so vive et ceki li bizin pou li même et pou so la famille. Mais le moyen pli efficace et pli dans sire ki faire ene dimoune gagne ceki li bizin facilement, c'est taqwa ou l'obéissance Allah Ta'ala. Allah Ta'ala dire dans Qour'aan :

"Et si banne habitants dans ça banne l'endroits-là ti amène Imaan et ti obéir, alors sans doute Nous ti pou ouvert (la porte de toute sorte) bénédictions depi dans le ciel et la terre... " (V96/S7)

Et Nabi ‎(Sallallaahou A'laihi Wasallam)‎ fine dire : "... Et pas possible gagne ceki ena acote Allah Ta'ala sans so l'obéissance."

Selon ene hadice dans Abou Dawoud, ene dimoune ki reste dimane Allah pardon, li gagne ceki li bizin dans ene façon ki li pas atane. Li paraite ki insaan fine déboussolé dans cherche banne solutions pou résoudre banne problèmes économiques et banne problèmes en général. Et dans manière ki insaan pé agir, li pli probable ki le problème pou reste entier ou bien nou capave resoude li à ene certaine niveau mais par crée ene l'autre pli grave ou semblable. Parceki pli grand facteur dans tout ça-là c'est nou désobéissance et l'unique solution c'est l'obéissance ki insaan pas paraite ena la volonté pou remédié. Donc nous problème économique ou lezot problème pas pou résoudre couma bizin et sans ene l'effet secondaire tanque ki nou pas soumette à Allah Ta'ala ki li même ki Ar-Razzaaq.

"Certainement Allah même ki Ar-Razzzaaq ..." (V85/S51)

[Extrait de Al Jamiat Vol.6 No.2]

Al-Fattaah

Fattaah li dérivé du verbe fataha. Ça mot-là fine servi dans Qour'aan-e-Kareem dans trois sens :

• Ouvert
• Victoire
• Ranne jugement

Donc Allah Ta'ala li Al-Fattaah parceki c'est li même ki ouvert chemin pou so banne serviteurs. C'est li même ki ouvert la porte de bénédiction. C'est li même ouvert chemin dans difficulté cote tout vine incapable et impuissant. C'est li même ki ena capacité ouvert la porte cote pena la porte. C'est li même ki donne la victoire. Et c'est li même ki pou faire jugement jour Qiyamah. C'est li même ki ouvert le coeur ene dimoune pou accepté imaan.

Ça nom-là li ene message de l'espoir ki indique nou la porte ki nou bizin tappé dans tous nou banne problèmes. Surtout nou bizin invoque Allah Ta'ala par ça nom-là pou dimane li ouvert nou le coeur pou Deen et donne nou la volonté pou applique li. Le zikr Ya Fattaah capave servi comme ene lumière quand ene dimoune li senti li perdi et comme ene soulagement dans difficulté et ene moyen pou renforcir Imaan.

[Extrait de Al Jamiat Vol.6 No.3]

Al-Fattaah

Al-Fattaah li dérivé du verbe Fataha. Le mot Fataha fine servi dans Qour'aan-e-Kareem principalement dans trois sens :

• Ouvert
• Victoire
• Ranne jugement

Si nou dire Allah Ta'ala « Al-Fattaah » c'est acoze ki c'est li même capave ouvert chemin quand ene personne pas capave. Li ouvert chemin cote pena chemin. Li ena remède pou tout maladie. Li ena solution pou tout problème. Narien pas impossible pou li. Li ena capacité faire ceki li envi quand li envi. Pena narien ki capave mette obstacle dans so chemin. Li capave faire ene pli grand montagne passe dans trou ene z'aiguille si li oulé

C'est li même ki ouvert la porte bénédiction pou so banne Creatures. La porte de bénédiction li trouve dans so control. Ça li pas trouve dans la main personne. «Ceki Allah li ouvert pou l'humanité comme bénédiction, pena personne ki capave bloque ça et ceki li bloqué, pena narien ki capave largue ça apart Li. Et Li Tout Puissant li Tout Sage. » (V2/S35)

Li même ki pou faire jugement jour Qiyaamat. Li même « Maitre du jugement dernier ». (Sourah Fatihah) Allah Ta'ala li aussi Al-Fattaah acoze ki c'est li même ki ouvert le coeur pou imaan.

[Extrait de Al Jamiat Vol.6 No.4]

Al-Aleem

Al-Aleem signifié celui ki conne tout. Et c’est Allah Ta’ala. Pena personne apart Allah Ta’ala ki conne tout. Li conne tout kitchose avec tout so détaille. Pena narien ki échappe so connaissance. Li conne chaque changement ki chaque atome dans l’existence pé subir à chaque fraction seconde. Li conne tout ceki pé passé dans l’esprit ene dimoune. Couma li conne tout ceki li pencore pensé. Li conne le futur couma li conne le passé. Allah Ta’ala conne ceki ene ti fourmi noire pé faire dans marée noire dans ene gros roche ki enterré nette dans la terre. Donc inutile dimandé ceki Allah Ta’ala conné. Bizin dimandé ceki li pas conné. La réponse c’est ki pena narien ki Allah Ta’ala pas conné. Tout ceki existé li trouve dans connaissance Allah Ta’ala. Donc Allah Ta’ala li conne tout.

Méditation lors ça attribut-là li amène ene dimoune pou réglé so la vie d’après Deen. Parceki li pou conné et li pou conscient ki li devant kikene ki pé guette tout ceki li pé faire. Ça pou crée ene genre de hésitation ki pou empêche li faire tout ceki pas bizin. Le degré de ça hésitation-là li pou en fonction du degré de ça conviction ki Allah Ta’ala pé guette li et li au courant de tout ceki li pé pensé et li pé faire. Ça même hésitation ki Rassouloullah ‎(Sallallaahou A'laihi Wasallam)‎ fine qualifié li de véritable « Hayaa ». C’est-à-dire ene sens de pudeur ki empêche ene personne faire ceki pas bizin.

[Extrait de Al Jamiat Vol.6 No.5]

Al-Qaabidh et Al-Baasit

 Qaabidh li dérivé de Qabadha et Baasit li dérivé de Basata. Qabadha veut dire serré et Basata signifié largué, étalé, élargir.

Allah Ta’ala li manifesté dans la vie ene individu comme Al-Qaabidh et Al-Baasit parfois par mette li dans difficulté et parfois par donne li facilité. Par rapport à mette dans situation difficile, li appelle Al-Qaabidh et par rapport à donne facilité et soulage banne dimoune dans zotte problème li appelle Al-Baasit. La richesse et la pauvreté li vine de coté Allah Ta’ala. Ena dimoune li reste dans cadre quand li pauvre couma ena dimoune ki suive so deen quand li ena. Le contraire aussi li vrai. C'est-à-dire ena dimoune li dérouté quand li gagne la monnaie couma ena dimoune faire kitchose ki pas bizin quand li tombe dans le besoin. C’est Allah Ta’ala li tout seul conne ki kitchose li bon pou ki sanla. Donc ceki li décidé, ça même pli bon pou ene dimoune. Allah Ta’ala li pas manque narien dans so trésor. Li ena tout mais li donne chakene d’après so nécessité et ene quantité ki bon pou li.

« Et pena kitchose ki pena so trésor cote Nous. Mais Nou necque dessane de temps à autre en ene quantité défini. » (V21/S16)

Quand pena la pluie, nou appelle li la sécheresse. Et si ena trop boucou la pluie, li vine inondation. Ni la sécheresse bon ni inondation. Bizin ene quantité la pluie ki bénéfique sans faire ditort. C’est Allah Ta’ala li tout seul conne ça quantité-là. Donc c’est li même ki donne ceki bizin donné en ene quantité et qualité à celui ki bizin donné et dans moment ki bizin donné.

« … Et certainement c’est Allah ki ouvert et serre provision pou celui ki li oulé parmi so banne serviteurs… » (V82/S28)

[Extrait de Al Jamiat Vol.6 No.6]

Al Mou’izzou - Al Mouzillou

Mou’izzou li ene dérivé de izz ou bien izzah ki signifié gloire, dignité, prestige etc. Li indique aussi la rareté c'est-à-dire ça signifié ‘être rare’. Ene kitchose rare li normalement appréciable ou bien banne bon kitchose zotte impé rare même. Acoze ça Azeez li traduire par ‘rare, cher et puissant’ etc. Mais généralement, li signifié gloire, dignité, prestige etc.

Al Mou’izzou signifié Celui ki accorde la gloire, dignité, prestige. Al Mouzillou c’est le contraire de ça c'est-à-dire celui ki ena capacité déshonoré. Et c’est Allah Ta’ala. Li trouve uniquement dans la main Allah Ta’ala. Dans Qour’aan-e-Kareem Allah Ta’ala ordonne Nabi ‎(Sallallaahou A'laihi Wasallam)‎ pou dire :

"... تعز من تشاء وتذل من تشاء ..."

…To même ki donne dignité à celui ki to oulé et To même ki déshonore celui ki to oulé … (V26/S3)

Dans ene l’autre place Allah Ta’ala dire :

"... فان العزة لله جميعا ..."

… Tout l’honneur pou Allah … (V139/S4)

Zordi jour dimoune néglige boucou principe de Deen sous l’impression ki ena l’honneur et prestige dans ene l’autre système. Et pourtant ça li pas trouve aukene part. li trouve uniquement dans la main Allah Ta’ala.

Kikene so famille, so richesse, so travail narien pas capave donne li l’honneur. Vrai l’honneur c’est ene l’honneur ki reste pou tout le temps. L’honneur dans lizié dimoune li pas plis ki ene mirage ki li bon zisse pou embête ou lizié. Vrai l’honneur c’est Allah Ta’ala ki donné. Et ça li donne ça à celui ki reste dans so l’ordre quand même li capave paraite ene dernier misère. Mais Allah Ta’ala inspire so l’amitié dans le cœur dounia ki dimoune content li avec tout so le cœur. Li vine de coté Allah Ta’ala. Ça même ki nou appelle li le roi sans trône et sans couronne. Par contre quand Allah Ta’ala décidé, tous banne moyens ki ou ti habitué croire ena l’honneur, dignité ou prestige là dans, tout vine inservable.

« … Et celui ki Allah fine déshonore li, pena narien ki capave donne li l’honneur. Certainement Allah li faire ceki li envi. » (V18/S22)

Allah Ta’ala li créateur de tout ki existé. C’est li même ki fine accorde tout ceki li bizin. Allah Ta’ala fine établi ene moyen pou gagne ene kitchose. Difé faire gagne chaleur. De l’eau teigne la soif. Nourriture faire la faim passé. Coumsa même vrai dignité, l’honneur et prestige trouve dans pratique Deen.

Hazrat ‘Oumar ‎(Radiyallahou anhou‎)‎ fine dire :

«Nou ti ene dernier dimoune. Allah Ta’ala fine donne nou la dignité à travers l’Islam. Aster n’importe quand si nou essaye rode l’honneur dans ene l’autre façon ki ça, alors Allah pou dénigré nou ».

[Extrait de Al Jamiat Vol.6 No.8]

As-Sami’

As-Sami’ signifié celui ki tanne tout. Pena personne ki capave tanne tout apart Allah Ta’ala. Donc c’est necque Allah Ta’ala li tout seul ki As-Sami’. Allah Ta’ala li tanne ceki nou cozé doucement pareil couma li tanne ceki nou cozé fort. Allah Ta’ala li tanne ene fourmi marché quand même li capave être à l’intérieur ene roche ki fine enterré enbas la terre.

« … Pena aukene entretien discret ki déroulé à 3 personne ki li (Allah Ta’ala) li pas le 4eme ni capave ena li à 5 ki li (Allah Ta’ala) li pas le 6eme. Ni capave ena moins ou plus ki ça sans ki li (Allah Ta’ala) li avec zotte à cotte zotte été. Et plitard jour qiyamat li (Allah Ta’ala) pou informe zotte ceki zotte fine faire. Certainement Allah li au courant de tout kitchose. » (V7/S58)

Pena différence entre loin et prés pou Allah Ta’ala. Ni ena le problème réseau pou Allah Ta’ala. Non seulement li tanne ceki nou dire mais li conné ceki nou pé pensé dans nou le cœur. Donc pas nécessaire nou prononce kitchose quand nou dimandé avec Allah Ta’ala. Nou capave dimane li dans nou le cœur aussi.

« Invoque ou Rabb avec humilité et discrètement… » (V55/S7)

Nou capave communiqué avec nou Rabb cote nou été, n’importe ki l’heure et dans n’importe ki saison. Nou na pas dérange nou Rabb quand nou invoque li. 24 lors 24 nou Rabb li reste à nou disposition pou écoute nou et résoudre nou problèmes.

« Quand mo banne serviteurs dimane ou à propos moi, alors dire zotte ki mo prés (avec zotte). Mo repone l’appel de celui ki invoque moi … » (V 186/S2)

Conviction lors attribut As-Sami’ li amène ene dimoune pou pense bien avant li dire kitchose. Dans ça façon-là li protège li de banne méfaits graves ki causé par la bouche. En même temps la personne li pense Allah Ta’ala cote li été et li dimane tout ceki li bizin avec Allah Ta’ala. Ça li crée ene confiance dans li et ene rapprochement entre li et so Rabb. Li senti li à l’aise quand même li capave entouré de banne situations défavorables et difficiles. Li pas senti li tout seul. Ça li impé couma ça dimoune ki rente dans tout banne départements sans aukene frayeur acoze ki li ena numéro personnel de celui ki à la tète de ça banne départements-là.

[Extrait de Al Jamiat Vol.6 No.10]

Al Basweer

Al Basweer Li ene de banne attributs Allah Ta’ala ki signifié celui ki trouve tout. Narien pas capave cachiette avec Allah Ta’ala. Li conne tout et li trouve tout. Allah Ta’ala li trouve tout ceki ena dans la terre, dans la mer, dans l’atmosphère et tout ceki ena dans nou le cœur. Ça vocabulaire ki appelle cachiette li pas applique pou Allah Ta’ala dans aukene façon. Allah Ta’ala li trouve tout ceki nou faire dans ene la chambre noire cote pena personne et pena aukene camera. Si ou ti avoye demande quelque part et ou ti à content ki ça accepté mais zotte envi conne impé lor ou, alors zotte mette ene banne dimoune pou tire renseignement lor ou. Couma ou ti pou comporte ou dans ene situation pareille ? Eski ou pou osé faire kitchose déplacé ki pou faire rejette ou demande ? Définitivement non. Ou pou comporte ou bien et ou pou évite banne kitchose ki capave faire ou échoué quand même ça kitchose-là capave pas ça grave-là. Coumsa même ou pou bien prudent cote ou conné ki ena ene camera laba ki pé capté tout ou banne mouvement ou bien cote ena ou banne proches ou bien ou banne zenfants ki pé guette ou. Par respect ki ou ena pou banla, ou pou comporte ou bien. Quand ene dimoune li conscient ki Allah li Al-Basweer ki pé guette li partout, li pou comporte li bien partout. Pli li conscient de ça, pli li vine prudent dans so la vie. Ça vine prudent-là même ki nou appelle taqwa. Et être conscient ki Allah pé guette ou, ça fine être qualifié de Ihsaan par Rassouloullah ‎(Sallallaahou A'laihi Wasallam)‎. C'est-à-dire ou comporte ou couma dire ou pé trouve Allah Ta’ala ou bien Allah Ta’ala pé guette ou. Donc ihsaan li amène taqwa. Et ihsaan même li vine par l’abondance de zikrullah ki faire li rappelle ki ena ene ki pé guette li dans tous so banne activités et so banne mouvements. Pou développe l’état de Ihsaan, ene dimoune bizin pensé ki Allah Ta’ala pé guette li à chaque fois ki li tenté pou faire mauvais. Ziska ene certaine mesure ça pou diminué so tentation et li pou pli capave control li. Le monde pé pensé même tout banne mesure pou empêche le mal. Ki ena si zotte essaye sa aussi.

« Prend ou garde conte la jalousie parceki la jalousie li dévore banne bonne actions pareil couma difé mange du bois. » (Abu Dawood)

« Banne dimounes pou dans bien tanque zotte pas éprouve la jalousie entre zotte même. » (Tabrani)

Ça partie enba cheville ki couvert avec izaar (pantalon/pyjama/loungi) li dans difé. (Boukhari)

[Extrait de Al Jamiat Vol.6 No.12]

Al-Hakam

Al-Hakam c’est ene celui ki so décision li ene décision finale. Ene décision ki narien pas capave empêche li réalisé. Pena personne apart Allah Ta’ala ki ena ça capacité-là. Par contre tout kitchose ki insaan faire et réalisé li couma dire ça nuage ki lors le ciel ki change-change forme constamment et ki finalement li désintégré et disparaite complètement. Nou ena banne facteurs couma cyclone, tremblement de terre, tempête, tornade, soleil, la pluie, la brise, tsunami, fraicheur, chaleur, maladie, épidémie, la sécheresse, inondation etc. ki capave empêche nou banne décision abouti ou bien ki capave anéantir dans ene clin d’œil tout ceki fine prend des années pou réalisé. C’est necque décision Allah Ta’ala ki li au delà de tout et ki pas influencé par narien. Pena narien ki capave modifié ou contourne décision Allah Ta’ala. Banne kaafir ti oulé brule Hazrat Ibrahim ‎(Alaihis Salaam)‎‎ et zotte fine mette li dans ene grand difé mais zotte zefforts fine échoué parceki Allah Ta’ala ti prend décision pou protège Hazrat Ibrahim ‎(Alaihis Salaam)‎‎. Donc Hazrat Ibrahim ‎(Alaihis Salaam)‎‎ fine reste sain et sauf. Au contraire li ti pli dans bien quand li ti dans difé ki en dehors. Pharaon ti donne l’ordre so l’armée pou touye tout ti baba ki prend naissance mais Allah Ta’ala fine protège Hazrat Moussa ‎(Alaihis Salaam)‎‎ et fine faire ene façon ki Pharaon même fine grandi li dans so palais. Coumsa même Allah Ta’ala fine toujours protège so banne serviteurs privilégiés dans tous l’époque et ça pou continué ziska qiyaamat. Personne pas pou capave teigne ene lumière ki Allah Ta’ala fine allumé. Décision Allah Ta’ala li suive so cours.

« Et si Allah mette ou dans kit la peine, alors pena narien ki capave soulage ou de ça apart Li même et si Li fine prend décision pou verse kit faveur lors ou, alors pena narien ki capave empêche ça … » (V107/S10)

[Extrait de Al Jamiat Vol.6 No.13]

Al-Adl

Adl signifié la justice. Nou appelle Allah Ta’ala Al-Adl parceki Allah Ta’ala li même la source de la justice. La justice trouve dans ceki Allah Ta’ala dire. La justice trouve dans ceki Allah Ta’ala faire. La justice trouve dans ceki Allah Ta’ala décidé.

Ene l'auto ki ti ena deux dimoune fine faire accident. Ene-là li bien même pas bon et l'autre-là li ene personnage pieux. Allah Ta’ala fine oulé ki ça personnage pieux-là fine mort et ça l'autre ki pas bon-là fine sapé. Dans ça cas-là nou dire ki ceki Allah Ta’ala fine faire, ça même li bon et c'est ça même ki la justice. Coumsa même ene madame fine mort après l'accouchement so ti bébé. Ça bébé-là pena personne apart so mama. Comme ene musulman nou bizin dire ki ceki Allah Ta’ala fine décidé ça même la justice.

Pas capave dire narien lors décision Allah Ta’ala parceki ceki Allah Ta’ala faire c'est ça même la justice. Et l'attitude négatif à l’égard la justice c'est l'injustice. Banne cas pareille li faire tous dimoune chagrin. Li pas dans capacité ene dimoune pou li pas chagrin. Acoze ça pena aukene blâme lors ene dimoune ki gagne chagrin dans banne cas pareille mais bizin accepté décision Allah Ta’ala parceki Allah Ta’ala li Al-Adl. Tout ceki li faire li juste et équitable.

Zulum (l’injustice) c'est ene kitchose ki Allah Ta’ala fine faire haraam lors li même couma li fine faire ça haraam lors banne dimoune. Zulum c'est ene défaut et Allah Ta’ala li au delà de tout défaut. Donc pena narien ki pas bon dans ceki Allah Ta’ala faire. A tel point si Allah Ta’ala mette tous banne bon dimoune dans jahannam et li mette tous banne mauvais dimoune dans jannat, alors là aussi li pas pou à l'encontre de la justice.

Souvent dimoune mette en questions banne la loi de Deen couma ampute la main ene dimoune ki coquin, lapide ene dimoune marié ki commette adultère, saute li cou ene assassin, batte 80 coup fouette ene ki mette fausse blâme de zina lors kikene, exécute ene ki quitte Deen. Zotte qualifié ça banne la loi-là de barbarie, de tyrannie ou de cruauté mais pourtant c’est banne la loi ki Allah Ta’ala fine prescrire. Le fait ki Allah Ta’ala li Al-Adl, banne la loi ki li fine prescrire aussi bizin juste, parfait et équitable. Pena aukene manquement ni kit faille dans la loi Allah Ta’ala. La loi Allah Ta’ala li protège banne ki vulnérable. Li soulage banne victimes. Li donne sécurité à banne ki faible. Li mette frein à banne abus de banne malfaiteurs à tout niveau afin ki insaan capave vive en paix et en sécurité parceki li protège ene dimoune so la vie, so l’honneur, so di bien et so la famille. Deen li vise pou nettoye la société de tout kitchose ki capave nuire la vie dimoune. Ça nettoyage-là parfois li nécessite coupe la main, lapidation ou bien saute li cou.

Parfois ena banne situations dans la vie ene dimoune cote li bizin choisir entre ceki pas bon et le pire. Nou pas faire ça par plaisir. Nou faire ça par obligation plitot. Ki sanla ki pou accepté faire ampute so le bras ou bien so li pied sans tombe dans contrainte pou prend ene décision pareille ! Similairement ene chef d’état pou trouve li logique pou crase ene avion ki pé vine attaque so pays malgré ki ça avion-là li capave ena banne innocents à bord. Raisonnement-là li simple. Bizin accepté pou sacrifié ene ti groupe innocents pou sécurise et protège la plus grande majorité. Li injuste pou mette en danger banne victimes et banne vulnérables dans le souci du bien être de banne malfaiteurs et banne coupables.

Allah Ta’ala li Al-Adl (juste) et banne la loi ki li fine prescrire li garanti la justice. L’injustice trouve dans pas accepté ça banne la loi-là ou bien dans cherche pou change li ou modifié li. Le désir ou le souhait pou remplace li par ene l’autre système li narien apart la déroute ki amène pou adopté le pire au détriment de ceki parfait, équitable et juste. Conviction ferme lors attribut Al-Adl, li faire ene dimoune pas bouleversé dans banne situations difficile. Li conscient ki tout arrivé de coté Allah. Donc li cherche recours à Allah Ta’ala même pou soulage li et pou tire li depi dans difficulté ki li été.

[Extrait de Al Jamiat Vol.6 No.14]

Al-Latweef

Latweef signifié ene ki rempli de bonté, d’indulgence et de tolérance. Couma li capave signifié ene ki ena connaissance de tout kitchose avec tous so banne détails. Li aussi signifié ene ki bien subtile dans ceki li faire. Ceki li faire li passe dans ene façon tellement discrète et inaperçue ki ranne li difficile à assimilé et saisir.

Allah Ta’ala li Al-Latweef parceki li tellement bon et généreux ki c’est li même ki accorde tout ceki tous so banne créatures bizin. Pena aukene nécessité, grand ou tipti, ki kikene apart Allah Ta’ala capave donné. Ena ki gagne boucou couma ena ki gagne tigite ou soit bien tigite. Là-dans aussi Allah Ta’ala li agir avec bonté envers so banne serviteurs. Li même conné ki sanla ki bizin donné et ki quantité bizin donné. Couma dire chakene gagne dose ki li bizin.

Allah Ta’ala li protège ene certaine catégorie par accorde zotte en abondance couma li protège ene l’autre catégorie par accorde zotte tigite. Pou certain l’abondance li ene fardeau ki néfaste pou li. Et ene l’autre catégorie la pauvreté li couma dire ene kitchose bien léger dans ene gros du vent ki empêche li reste stable. Donc Allah Ta’ala li même conné ki sanla ki bizin gagné pou li reste stable ou bien pou so fardeau li diminué.

Allah Ta’ala li Al-Latweef dans le sens ki ceki li faire li bien subtile ki pas capave saisi par tout un chacun. Li unir par séparation couma li sépare par l’union. C'est-à-dire li unir deux personne par sépare zotte d’abord. Li crée banne l’événements ki amène vers séparation. Mais en réalité c’est ça même l’événement ki résulte en l’union pou de bon. Ena des fois li unir deux personnes pou sépare zotte pou tout le temps. Ça li dépanne couma Allah Ta’ala li crée et servi banne l’événements. Li capave servi ene seul kitchose pou deux personne dans deux différents façons. Ene seul genre de richesse li servi pou ene so prospérité et pou destruction ene l’autre. Ene seul difé mais li servi comme punition pou ene et comme ene source de bien etre pou ene l’autre. C’est dans ça l’optique-là ki ena des fois ene dimoune ena raison considère l’échec dans so l’examen comme ene facteur important de so succès. Donc Allah Ta’ala li servi échec pou donne succès et parfois succès li débouche vers ene point moins favorable. Ça li capave faire nou comprend ene tigite cote Allah Ta’ala dire :

« To tire vivant depi dans ene kitchose mort et To tire kitchose mort depi dans ene kitchose vivant … »

Nou appelle Allah Ta’ala Al-Latweef parceki so connaissance li englobe tout kitchose. Pena ene dernier atome aussi dans l’univers ki li pas dans connaissance Allah Ta’ala. Tout développent ki capave pé arrivé n’importe dans ki place, Allah Ta’ala li au courant de ça et c’est li même ki amène ça développent-là. Allah Ta’ala fine crée tout kitchose et li conne tous banne détails de tout banne kitchose. Ou capave cachiette ene kitchose ki pli tipti ki ene atome dans ene grand désert mais ça li pas pou cachiette avec Allah Ta’ala. Allah Ta’ala trouve ça kitchose-là pli bien ki nou trouve ene kitchose ki li dans nou plat la main.

Allah Ta’ala li Al-Latweef parceki li rempli de bonté et de grâce. Li accorde grand grand récompense pou simple simple action. Par exemple récompense ki li accordé pou ene dimoune ki faire tasbeeh après namaz faraz. D’après hadice ene personne ki faire 33 fois Subhanallah, 33 fois Alhamdulillah et 33 fois Allahou Akbar et ensuite li lire ene fois :

"لا إلـه إلا اللّٰـه وحده لا شريك له له الملك وله الحمد وهو على كل شيئ قدير"

alors so banne péchés pou être pardonné quand même li capave ene quantité égale à l’écume ki ena dans la mer. Pli ene dimoune médite lors ça nom-là, pli li pou approché avec Allah Ta’ala. Li pas pou trouve aukene chemin apart reste dans so l’obéissance. Li pou toujours ena l’espoir lors Allah Ta’ala. Et ça pou garde li toujours gai, confiant et enthousiaste.

[Extrait de Al Jamiat Vol.7 No.1]

Al Khabeer

Al Khabeer signifié ene ki ena tout information. Pena aukene information ki li pas conné. Ena ene seul être ki ena ça. Et ça c’est Allah Ta’ala.

Allah Ta’ala li conne tout ceki ena dans la terre et tout ceki ena dans le ciel. Allah Ta’ala ena connaissance de chaque atome dans l’univers. Allah Ta’ala ena tout l’information concernant chaque atome.

Donc Allah Ta’ala ki conne la façon pli approprié ki bizin pou vive dans ça le monde-là. Allah Ta’ala dans so capacité Al-Khabeer fine recommane nou couma bizin vive lors ça la terre-là. Li fine averti nou de banne kitchose ki néfaste pou nou bien être. L’ensemble de ça recommandation et avertissement-là c’est Deen ki représenté par le livre Allah Ta’ala, Qur’aan-e-Kareem et le moubaarak sounnah de Nabi ‎(Sallallaahou A'laihi Wasallam)‎. Vive sans suive Deen li couma dire écoute ene braconnier par rejette ene professionnel ou ene expert dans le domaine. La conviction ferme et sincère dans attribut Al-Khabeer li amène nou pou accepté et suive ceki fine préconisé et recommandé par Qour’aan et sounnah. C’est ene croyance ki ranne nou ene ti pé pli conscient de nou banne activité du fait ki Allah Ta’ala en so capacité Al-Khabeer li totalement au courant de tout ceki nou pé faire. Jamais ene dimoune ki ena pudeur capave faire ene kitchose blâmable si li ranne li compte ki dimoune pé guette li. Coumaniere ene dimoune capave faire peché quand li conné ki Allah Ta’ala pé guette li ? Normalement bizin ena ene faiblesse et ene manquement dans croyance ki bizin ena dans attribut Al-Khabeer de Allah Ta’ala. Si necque nou ti encourage développement la croyance ki Allah Ta’ala li Al-Khabeer ki au courant de tout ceki nou pé faire, alors ça ti pou dispense nou de ene quantité département ki nou fine institué pou sauvegarde sécurité et la paix. Dimoune-là so conscience même ti pou sufi pou surveille li et garde li dans contrôle dans ene façon pli efficace. Pas ti pou bizin la police ou bien agent secret pou ça travail-là.

[Extrait de Al Jamiat Vol.7 No.2]

Al-Haleem

Haleem li dérivé de Hilm ki signifié tolérance ou indulgence.

Normalement c'est ene qualité ki permette ene dimoune garde so calme dans banne moments défavorable. Li pas agir avec colère ni li bouleversé. Li pas laisse li emporté par banne situations les plus irritantes.

Quand nou dire Allah Al-Haleem, ça signifié ki Allah Ta'ala li pas prend sanction toute suite pou banne péché et erreurs ki dimoune pé faire lors la terre. Dimoune pé reste lors la terre ki Allah Ta'ala fine crée et li pé servi tout ceki li bizin apartir de ceki Allah Ta'ala même fine mette lors la terre. Pena narien ki li pé servi ki pas apartenir à Allah Ta'ala. Après tout ça-là, li faire ibaadat pou ene l'autre. Li ena reconnaissance pou ene quantité divinités ki li même li fine faire avec so la main. Et ça aussi apartir banne matières ki Allah Ta'ala même fine crée. Ena ki pas accepté même ki Allah Ta'ala existé. Ena ki accepté li mais li attribué tout qualité kitchose ki pas digne à Allah Ta'ala. Allah Ta'ala li guette tout ça-là et li pé guetté couma insaan pé commette banne immoralité, bestialité et banne bêtises. Missié pé prend missié comme partenaire. Madame pas hésité pou alle ek madame. Manque de pudeur fine faire ça insaan-là tombe dans bassesse à tel niveau ki li fine permette li marié avec zanimau. Mais Allah Ta'ala pé donne ça insaan-là encore le temps pou li repentir.

Et li boucou facile pou gagne pardon avec Allah Ta'ala. Ene dimoune capave fine commette tout qualité péché pendant ene siècle. Mais li pas difficile pou être gracié. Apeine li dimane pardon avec Allah Ta'ala sincèrement, Allah Ta'ala pardonne li toute suite sans tenir compte de la gravité de so banne péché.

Méditation lors attribut Al-Haleem li amène insaan à être reconnaissant envers Allah Ta'ala et reconnaissance à son tour li amène vers soumission totale et l'obéissance intégrale.

[Extrait de Al Jamiat Vol.7 No.3]

Al –‘Azweem

‘Azweem li dérivé de Azmat. Azmat signifié excellence et grandeur. Allah Ta’ala li ‘Azweem dans le sens ki li dépasse toute imagination dans so l’essence même. Li au delà de toute dimension. Li excellent dans tout. Li eternel. Li pena aukene commencement et li pou existé pou tout le temps. Li au delà de tous banne manquements et défections. Li ena capacité lors tout kitchose. Li conne tout. Narien pas en dehors de so connaissance. Li incomparable dans so l’essence et banne attributs.

Donc ceki capave exprimé par dire Soubhanallah et Al Hamdoulillah, ça capave dire li dans dire Al-‘Azweem. C'est-à-dire Allah li excellent. Si excellence dans ene talent ou ene mérite li ene critère pou être admiré, alors Allah Ta’ala li pli mérite ça. Si ene dimoune li senti li attiré par ene talent, alors li bizin attiré à Allah Ta’ala ki li même l’unique créateur de tout. De ce fait c’est pli grand l’honneur pou vive pou le plaisir Al-‘Azweem.

[Extrait de Al Jamiat Vol.7 No.4]

Al-Ghafoor

Allah Ta’ala li Al-Ghafoor. Ça signifié ki Allah Ta’ala li Grand Pardonneur. Li pardonne tout dimoune ki dimane li pardon. Ena des fois li pardonne sans dimane pardon aussi. Li pardonne tout qualité péché. Pena aukene péché ki pas pardonnable. Sauf ene dimoune ki fine mort lors shirk ou kufr. Alors ça qualité dimoune-là pas pou être pardonné. Apart ça Allah Ta’ala li pardonne tout péché et li pardonne tout dimoune.

Si ene dimoune fine passe entier so la vie dans faire toute sorte péché grave. Ça dimoune-là aussi li ena pardon si li dimane pardon avec sincérité. Dimane pardon avec sincérité veut dire d’abord arrête faire péché-là et ki la personne li regretté lors ceki li fine faire et li prend decision ferme pou pas refaire li.

Dans ene hadice qudsi Allah Ta’ala dire :

« O zenfant de Adam, mo pou gracié toi malgré tout ceki fine capave arrivé de to part tanque to invoque moi et to garde l’espoir lors moi. Et ça pas dire moi narien. Si to banne péchés zotte arrive dans hauteur nuage lors le ciel et après ça to dimane moi pardon, mo pou pardonne toi et ça pas dire moi narien… »

Allah Ta’ala li Al-Ghafoor parceki li pardonne ene personne à chaque fois ki li dimane pardon quand même ça capave fine répété 70 fois aussi dans ene journée. Par exemple ene personne fine commette ene péché. Li regretté et li dimane pardon. Après ene ti moment li refaire ça péché-là et li dimane pardon. Passe ene ti moment li retombe là-dans et li redimane pardon. Nou insaan nou pou dire ki ça personne-là pé badiné avec  Allah Ta’ala. Mais Allah Ta’ala pou pardonne li à chaque fois ki li dimane pardon avec ene l’intention ferme pou pas refaire li quand même ça li répète 70 fois dans ene seul journée. Quand ene dimoune dimane pardon, Allah Ta’ala li conné si ça dimoune-là li pou récidivé ou bien non. Mais Allah Ta’ala li pas agir d’après ceki li conné concernant ça dimoune-là. Allah Ta’ala li pardonne li necque lors so l’intention ki li fine faire. Pourvu ça dimoune-là li pena aukene l’intention pou li refaire ceki li pé regretté quand li pé dimane pardon.

Voila couma Allah Ta’ala li Al-Ghafoor ki li pardonne ene dimoune malgré ki li au courant li pou refaire ça péché-là et cela zisse acoze so l’intention pou pas refaire li. Donc banne récidivistes aussi zotte ena pardon cote Allah Al-Ghafoor.

Ene dimoune li fine dimane pardon pou ene certaine péché à plusieurs reprises mais à chaque fois li rechuté. Acoze ça li sous l’impression ki li pas pou capave arrête ça péché-là et conséquemment li condamné à commette ça ziska so la mort. Résultat c’est ki li arrête dimane pardon et li continué reste noyé dans ça péché-là. Or li pas coumsa. Parceki à chaque fois ki li fine dimane pardon avec ene l’état d’esprit ki li pas pou refaire li, alors so péché fine effacé. Malgré ki li fine récidivé à plusieurs reprises, so péché fine être pardonné à chaque fois ki li fine dimane pardon.

Donc faudré pas ene dimoune découragé et arrête dimane pardon si plusieurs fois li pas fine capave respecté so l’engagement ki li fine prend avec Allah Ta’ala. Personne pas capave donne aukene garantie concernant so comportement dans l’avenir. Malgré ki ena la possibilité pou retombe dans péché ki dimoune-là pé engage li pou pas commette li, dimoune-là bizin toujours continué dimane pardon. Et so péché pou être gracié malgré l’existence ene possibilité semblable. Sinon shaitaan pou mette nou dans l’égarement par décourage nou de la grâce Allah Ta’ala. Conséquemment dimoune-là pou reste noyé et absorbé dans tout sorte péché sans le moindre remords.

Mais faudré pas et à jamais être encouragé et gagne l’audace pou commette péché sous l’impression ki Allah Ta’ala li Al-Ghafour et Grand Pardonneur. Ça appelle abuse la bonté. C’est ene bassesse ki capave empêche la personne gagne la volonté pou repentir.

[Extrait de Al Jamiat Vol.7 No.6]

Ash-Shakoor

Shakoor li dérivé de shoukr ki veut dire remercié. Quand ça li attribué à Allah Ta’ala, à ce moment-là li signifié appréciation. Allah Ta’ala li Ash-Shakoor acoze ki li apprécié tout ceki so serviteur faire comme bon. Li accorde récompense énorme pou banne actions ki capave paraite bien simple et facile. Li accorde dix à 700 récompense pou chaque roupie ki ene dimoune dépensé dans so chemin. D’après ene hadice rapporté par Hazrat Abou Hourairah ‎(Radiyallahou anhou‎)‎, Allah Ta’ala li récompense 2 millions fois pou ene bonne action. Coumsa même ene fois Subhanallah ou ene fois Alhamdulillah li rapporte ene quantité sawaab ki capave rempli l’espace entre le ciel et la terre.

Tout ça-là acoze ki Allah Ta’ala li ena capacité lors tout kitchose et trésor Allah Ta’ala li inépuisable. Tout ceki nou gagné comme récompense énorme pou ene simple action, li pas dire narien pou Allah Ta’ala quand même li bien boucou pou nou. Couma dire Allah Ta’ala fine tire ene goute de l’eau depi dans l’océan. En réalité li pas représente ene goute aussi.

Ene personne fine coupe ene branche ki ti versé dans chemin cote banne dimoune ti pé bizin traversé et ki ti pé gène zotte. Rassouloullah ‎(Sallallaahou A'laihi Wasallam)‎ informe nou ki Allah Ta’ala fine gracié ça personne-là lors ça simple geste-là. Ceki pli étonnant c’est ça madame perverse ki ti être graciée par donne de l’eau à ene li chien ki ti pé mort de soif. Couma dire Allah Ta’ala fine ignore tous banne erreurs ki ti ena lors papiers l’examen zisse acoze ene seul numéro ki ti bien faire. Insaan parfois li blié tout bon ki ene dimoune fine capave faire pendant toute longue so la vie acoze ene simple ti erreur. Par contre Allah Ta’ala li pardonne acoze ene simple geste ki fine accomplir avec mérite. Ça ki appelle Ash-Shakoor. C’est ene ki possède ene tresor infini même ki capave ena ça genre de générosité immense-là. Et ça li pas ene l’autre apart Allah Ta’ala. Couma Allah Ta’ala li inégal, coumsa meme en temps ki Ash-Shakoor, so récompense aussi li incomparable.

Si ene personne li gagne ene tigite parfum de Ash-Shakoor, li pas pou capave résisté sans montré shoukr pou Ash-Shakoor. Shoukr li réalisable par dispose tout banne faveurs Allah Ta’ala d’après la façon ki Allah Ta’ala content en suivant le moubaarak tareeqah et sounnat de nou bien-aimé Nabi ‎(Sallallaahou A'laihi Wasallam)‎.

[Extrait de Al Jamiat Vol.7 No.8]

Al-‘Aliyy

C’est ene nom ki dérivé de « ‘Uloo » ki signifié hauteur, grandeur, suprématie. Allah Ta’ala appelle li Al-‘Aliyy parceki vrai grandeur li appartenir à li même. C’est Allah Ta’ala même ki pli exalté et suprême. Li incomparable parceki pena narien couma li ni ena kitchose ki ressemblé li. Allah Ta’ala li noble et li content et apprécié la noblesse.

Pli ene dimoune médité lors ça attribut-là, pli li vine humble. Li vine facile pou li combatte so vantardise et l’orgueil ki ena dans li. Coumsa même li conne la porte ki li bizin tappé dans so banne moments difficiles. Et en même temps li arrête fatigue li et perdi so le temps derrière banne ki jamais capave utile pou li. Li arrivé conné ki pena aukene grandeur dans être vantard. Au contraire pena pli grand malheur ki être vantard. Li ranne ene dimoune dégoutant et détestable dans dounia et prive li de jannat dans aakhirat. La vrai noblesse trouve dans taqwa. Pli ene dimoune ena taqwa pli li ene dimoune noble et pli li vine appréciable dans lizié Allah Ta’ala.

Quand nou invoque Allah Ta’ala par ça attribut-là et nou dire «Ya ‘Aliyy», nou bizin conne différencié entre Al-‘Aliyy et Hazrat Ali ‎(Radiyallahou anhou‎)‎. Parceki ena ene banne ki zotte signifié Hazrat Ali ‎(Radiyallahou anhou‎)‎ quand zotte dire : Ya ‘Aliyy. Et ça li représente shirk ki li ene péché pli grave ki tous banne péchés.

[Extrait de Al Jamiat Vol.7 No.9]

Al-Kabeer

Kabeer veut dire grand. Nou appelle Allah Ta’ala Al-Kabeer parceki tout grandeur appartenir à li même. Pena narien pli grand ki Allah Ta’ala. Li même pli grand. Ça nou dire ça zisse pou gagne ene l’idée. Sinon pena narien ki capave comparé avec Allah Ta’ala. Li incomparable et li grand dans tous banne aspects. Li eternel. Tout kitchose apart li, zotte pou périr. C'est-à-dire narien pas ti existé. Allah Ta’ala fine accorde tout kitchose l’existence. Apart Allah Ta’ala tout kitchose capave arrête existé. Li pena narien dans li ki capave qualifié de manquement ou de mauvais. Le fait même ki Allah Ta’ala li eternel li sufi pou montré ki li au delà de tout et li surpasse tout. Li contrôle tout et li ena pouvoir lors tout kitchose. Ene personne ki ena imaan lors Allah Al-Kabeer pou toujours faire en sorte ki li pas commette narien ki indigne. Li pou toujours senti li en sécurité avec Allah Ta’ala. Li pou toujours connecté avec Allah AL-Kabeer. Jamais li pou tombe dans la bassesse. Pli li médite lors Al-Kabeer, pli ça ranne li confiant, humble, doux et affectionné.

[Extrait de Al Jamiat Vol.7 No.10]

Al-Kabeer

Al-Kabeer veut dire grand, excellent et célèbre. Allah Ta’ala li Al-Kabeer parceki li excellent et grand dans tous banne aspects et par tous rapports. Li eternel. Le fait ki li eternel montré ki li pas influencé ni affecté par l’environnent et par n’importe ki kitchose. Li au delà de tout et li ena control lors tout kitchose. Narien pas existé sans li. C’est li tout seul ki ti existé de tout le temps et pou existé ziska jamais. Li excellent dans pouvoir, l’honneur et dignité. Li au delà de tout ceki blâmable ou tout ceki attribué à manquement. Pli ene dimoune médité lors Allah Ta’ala par rapport à so attribut Al-Kabeer, pli li gagne l’espoir et tranquillité. Li senti li en sécurité parceki li ena ene Rabb ki capave accorde li tout ceki li bizin quand li bizin et cote li bizin. Tout ceki capave vine ene obstacle pou le bien être de kikene, li trouve sous control total de Al-Kabeer. Donc celui ki conne développe so relation avec Allah Al-Kabeer, li fine conne l’unique chemin de bien être et salut eternel.

[Extrait de Al Jamiat Vol.7 No.11]

Al - Hafeez

Hafeez sorti apartir Hifz ki signifié protection. Donc Al-Hafeez signifié le Protecteur. Pena narien dans l'existence ki capave accorde protection tout le temps et dans tout situation parceki ça li nécessite ene connaissance ki couvert et englobe chaque atome ki existé et ene capacité absolue. Pena narien ki possède ça. Donc c'est necque Allah Ta'ala li tout seul ki so connaissance li ene connaissance ki couvert tout. Pena narien ki échappe so connaissance. Et c'est necque Allah Ta'ala li tout seul ki ena capacité lors tout kitchose. Pena narien ki capave ranne Allah Ta'ala incapable. Donc c'est necque Allah Ta'ala li tout seul ki Al-Hafeez.

Allah Ta'ala li conne chaque créature cote li été et dans ki situation li été. Li conne ki sanla ki li bizin et ki quantité li bizin li. Et li ena capacité accorde li ceki li bizin. Pena narien ki capave vine ene obstacle pou Allah Ta'ala. Récite ça attribut-là en abondance et invoque Allah Ta'ala par ça, li ene moyen bien efficace pou développe confiance dans Allah Ta'ala. Li ene moyen pou ene personne ki li dans la détresse et dans la peine, li senti li protégé en ceki concerne so la vie, so la famille, so dibien, so dignité et so l'honneur.

[Extrait de Al Jamiat Vol.7 No.12]

Al-Mouqeet

AL-Mouqeet so racine trouve dans le mot Qoot ki signifié ene nourriture ki transformé en l’énergie pou donne ene le corps le courage et la force. Allah Ta’ala li Al-Mouqeet parceki c’est li même ki li à la base de ça l’exercice-là et ça développement-là. C’est li même ki faire banne nourriture produire l’énergie physique et l’énergie morale/mentale. Li même ki accorde l’énergie spirituelle. Tout progrès ki ena dans le domaine physique, spirituel, scientifique et technologique, li dépanne lors ça l’énergie ki so source trouve uniquement dans la main Allah Ta’ala. Donc ena ene seul la porte pou tappé pou progressé dans n’importe ki domaine. C’est la porte Allah Al-Mouqeet. Pense Allah Ta’ala par so attribut Al-Mouqeet capave servi pou développe la force physique et spirituelle.

[Extrait de Al Jamiat Vol.7 No.13]

Al-Jaleel

Le mot Jaleel li vine apartir jalaal ki signifié la gloire, la majesté, la grandeur etc. Donc Al-Jaleel signifié celui ki grand, majestueux et ki ena la gloire. C’est ene attribut ki indique la perfection. Tout kitchose apart Allah Ta’ala li susceptible à l’imperfection. Donc c’est Allah Ta’ala li tout seul ki Al-Jaleel. Pena narien ki capave surpasse Allah Ta’ala. Tout mérite dans n’importe ki forme ki existé, li appartenir à Allah Ta’ala. Tout l’autorité ki trouvé dans n’importe ki forme, c’est ene cadeau et faveur Allah Ta’ala. Personne pena aukene capacité ni l’autorité par li même. C’est Allah Ta’ala ki accorde l’autorité. Tout dimoune ki ena ça à n’importe ki degré et dans n’importe ki niveau, li doit à Allah Ta’ala pou ceki li ena. Couma Allah Ta’ala li donné, coumsa même li capave prend li aussi. Faudré pas li fier de ceki li ena et li vine arrogant. Médité lors attribut Al-Jaleel li développe humilité dans ene dimoune. Li donne li l’espoir et soulagement dans banne moments difficiles. Li ranne li sincère et obéissant à Allah Ta’ala. Et ça ranne li confiant et positif dans so la vie. Parceki li ena ene seul visé et ene seul objectif à considéré. Et c’est Allah Al-Jaleel. Apart ça tout vine secondaire si li pas négligeable.

[Extrait de Al Jamiat Vol.7 No.15]

Al-Kareem

Kareem li vine apartir Karam ki ena plizir signification couma dignité, noblesse, générosité, prestige etc. Sans doute Allah Ta’ala li la source même de tous ça-là. Allah Ta’ala li digne. Li noble. Li généreux. Donc Allah Ta’ala li Al-Kareem. Tout valeur dignité prestige ki n’importe ki sanla capave possédé dans n’importe ki façon et dans n’importe ki mesure et ki dimension, c’est par faveur Allah Ta’ala.

Allah Ta’ala li Al-Kareem parceki li donné et ça aussi en abondance et ça aussi sans dimandé. Li Al-Kareem parceki li donné plis ki ou dimandé et pli bon de ceki ou dimandé. Allah Ta’ala li Al-Kareem parceki li donne nourriture à banne ki désobéir li aussi. Li donne nourriture à banne ki critique li et malparle li aussi. Li Al-Kareem parceki li pas retourne vide ene la main ki tallé devant li pou dimandé. Li pardonne le plus grand péché et pli grand pécheur aussi malgré ki li ena pouvoir et capacité pou donne punition ceki li envi sans kikene capave empêche li. So trésor li ene trésor ki pas diminué après avoir donne chakene so nécessité et so besoin. C’est ene trésor ki pas pou fini jamais ni li diminué par ene tigite aussi.

Ene dimoune ki oulé vrai dignité, li bizin attache li avec Al-Kareem. Ça li réalisable par ene seul façon. Exécute Al-Kareem so banne commandements en suivant le Moubaarak Tareeqah de nou bien aimé Nabi ‎(Sallallaahou A'laihi Wasallam)‎. Ene dimoune so degré de dignité et noblesse li pou en fonction de so degré de l’obéissance à Allah Ta’ala Al-Kareem.

إِنَّ أَكْرَمَكُمْ عِندَ ٱللَّـهِ أَتْقَىٰكُمْ

« … Certainement le plus noble parmi ou au prés d’Allah c’est celui ki pli mouttaqui (sérieux dans Deen) parmi ou … »

[Extrait de Al Jamiat Vol.8 No.1]

Ar-Raqeeb

Ar-Raqeeb signifié celui ki observe tout kitchose avec tout so détail. Pena narien ki échappe so connaissance. Croyance dans ça attribut-là li faire ene dimoune reste loin avec toute sorte péché. Li difficile pou désobéir Allah Ta’ala quand ena croyance ferme et solide ki tout pé passe divant Allah Ta’ala et ki li pé guetté ceki pé faire.

Méditation lors ça attribut-là li aidé pou résisté conte banne tentations et banne l’envi malsaine. A chaque fois ki ene dimoune li tenté pou faire mauvais, alors li bizin calculé pendant ene ti moment ki Allah Ta’ala pé guette li. Eski li joli pou faire ene betise quand Allah Ta’ala pé guette li ? Ça l’exercice-là li capave pas ça efficace-là dans commencement mais bizin pas découragé parceki li ena so l’effet à chaque fois ki li faire li. Avec le temps, ça li pou transforme en ene croyance et conviction ferme ki pou faire li gagne la honte avec Allah Ta’ala. Donc li pou évite péché dans la solitude pareille couma li évite li divant banne dimoune.

[Extrait de Al Jamiat Vol.8 No.2] 

Al-Moujeeb

Allah Ta’ala li Al-Moujeeb c'est-à-dire li reponne l’appel de so banne serviteurs. Li accepté dua de banne ki faire dua. Li écoute doléances de banne ki dans la peine et vine à zotte secours dans zotte banne difficultés. Li soulage banne ki dans problèmes. Allah Ta’ala dire : « Et quand mo banne serviteurs dimane ou apropos de Moi, alors (faire zotte conné) ki mo prés (avec zotte). Mo repone l’appel de tout celui ki invoque (Moi) dans ça moment quand li invoque Moi … » (V186/S2)

Allah Ta’ala fine promette dans ça verset-là pou repone l’appel de tous banne ki étale la main pou dimane li. Li pas retourne kikene la main vide. Donc fodé pas ene dimoune hésité pou dimandé quand li dans la nécessité et dans le besoin. La porte Allah Ta’ala li reste ouvert 24/24. Ene dimoune li capave dimane Allah Ta’ala l’heure ki li envi et l’heure ki li content. Ene personne ki médite lors attribut de Al-Moujeeb, pou toujours ena l’espoir. Jamais li pou découragé avec banne moments difficiles parceki li conné ki Allah Ta’ala Al-Moujeeb li toujours là pou écoute li et aide li. Li pas tout seul quand même li trouve li délaissé dans ene désert sans provision et sans support. Allah Ta’ala Al-Moujeeb li présent et so la porte grande ouvert.

[Extrait de Al Jamiat Vol.8 No.3]

Al-Waasi'

Waasi’ signifié large. Quand nou dire ça pou Allah Ta’ala, ça signifié ki Allah Ta’ala li au delà de toute dimension. Allah Ta’ala so Trône li couvert le ciel, la terre et toute la création. Allah Ta’ala li ena control et li ena l’autorité lors tout kitchose. Narien pas en dehors so royaume. So bénédiction et so grâce li ouvert pou tous. Tous bizin Allah Ta’ala. Narien pas indépendant dans aukene stage à aukene niveau par aukene rapport de so faveur. Allah Ta’ala so connaissance li englobe chaque atome de l’univers avec tout so banne détails.

Donc Allah Ta’ala li Al-Waasi’ parceki so connaissance, so pouvoir et so faveur pena aukene limite.

Chaque attribut Allah Ta’ala li ena ene message à so banne serviteurs. Ene personne ki concentré et médité lors ça attribut Al-Waasi’, pou arrivé conné ki li bizin pas désespéré dans la vie dans aukene situation parceki li ena ene créateur ki ena tout ceki li bizin. Li pou trouve la nécessité cherche recours à li même au lieu perdi le temps ailleurs. Li pou trouve la nécessité être loyal à Allah Ta’ala. Li pou choisir Allah Ta’ala même comme so recours réel.

[Extrait de Al Jamiat Vol.8 No.4]

Al-Hakeem

Hakeem li dérivé de Hikmah. Hikmah signifié la sagesse, la maitrise et la perfection. Pena narien ki parfait. C’est necque Allah Ta’ala tout seul ki parfait. Allah Ta’ala so travail li dépasse tout maitrise et li au delà de tout expertise. Acoze ça dans le vrai sens du mot, c’est Allah Ta’ala li tout seul ki Al-Hakeem. C’est acoze ki Allah Ta’ala so connaissance li parfait. So travail li parfait. C’est li même ki fine façonne chaque atome l’univers dans ene forme et ene dimension équilibré et approprié.

Si nou prend ça depi verbe Hakama ki veut dire gouverné, alors à ce moment-là li pou signifié ki tout l’autorité li trouve dans la main Allah Ta’ala. So décision li finale. Personne pas capave casse so décision. Ni kikene capave surpasse Allah Ta’ala dans so pouvoir et so l’autorité.

Quand le mot Hakeem li attribué à ene l’autre apart Allah Ta’ala, alors li signifié ene ki ena ene connaissance de Deen et ki so comportement li basé lors connaissance ki li ena. C'est-à-dire ene ki so comportement li pas trahir so connaissance ki basé et fondé lors banne principes établi et solide.

Méditation lors ça attribut-là faire ene dimoune soumette totalement divant décision Allah Ta’ala. A noté ki ça soumission-là pas empêche ene dimoune dimane dua mais ceki essentiel c’est ki nou laisse la décision finale à Allah Ta’ala et nou satisfait avec ceki arrive nou après ki nou fine faire dua.

[Extrait de Al Jamiat Vol.8 No.5]

Al-Wadoud

Wadoud li vine apartir le mot Woudd ki signifié l’amour, l’amitié et l’affection. Donc Wadoud signifié ene ki ena ça qualité-là par excellence. Nou appelle Allah Ta’ala Al-Wadoud parceki Allah Ta’ala li content so banne serviteurs plis ki ene mama content so ti bébé ki pé encore boire avec li.

Ça l’amitié-là li vine encore plis pou banne serviteurs ki vive dans l’obéissance Allah Ta’ala et ki sincère envers li. Allah Ta’ala li Al-Wadoud parceki so l’amitié li sans limite. C’est li même l’origine et la source de l’amitié ki trouve dans tout so banne formes. L’amitié ki nou trouvé dans l’univers c’est ene manifestation de ene particule ou ene étincelle narien ditout de ceki Allah Ta’ala possédé. Ça c’est seulement pou faire gagne ene l’idée. Sinon ça li pas diminué par ene iota aussi depi ceki Allah Ta’ala possédé.

Mais bizin mette ene kitchose dans la tête ki Allah Ta’ala so muhabbat et insaan so muhabbat ena différence. Muhabbat li ena l’effet lors insaan et ena des fois li emporté par ça. Mais ça banne kitchose-là pas arrivé pou Allah Ta’ala parceki narien pas affecté Allah Ta’ala et Allah Ta’ala li pas emporté ni influencé par kitchose. Li au-delà de tout et li contrôle tout et partout.

Tout banne kitchose ki mérite l’amitié pou ene certaine talent ou mérite ki trouve dans ene dimoune, li vine apartir Allah Ta’ala. Source de tout bienfait c’est Allah Ta’ala. Donc Allah Ta’ala li Al-Wadoud parceki ena tout dans li ki attire l’affection et l’amitié. L’euphorie ki ene dimoune ressenti pou kikene représente narien ditout divant ceki ene ressenti pou Allah Ta’ala quand li arrivé commence gagne ene ti l’idée ou aperçu de Al-Wadoud. Si insaan capave affolé pou ene lot insaan couma li, ki pourtant li, so talent et so charme li passagère, éphémère et temporaire, alors ki pou arrive li si li arrivé ressenti impé de coté Allah Ta’ala ?

L’amitié pou Allah Ta’ala et so Rasoul ‎(Sallalaahou Alaihi Wasallam) li essentiel pou imaan. Bizin content Allah Ta’ala et so Rasoul ‎(Sallalaahou Alaihi Wasallam) plis ki tout kitchose. Plis ki mama papa, plis ki zenfants, plis ki du bien et plis ki li content li même. L’amitié pou Allah Ta’ala li développé apartir obéissance pou Allah Ta’ala. C'est-à-dire par vive couma Allah Ta’ala oulé. Et l’obéissance li pas valable ni li acceptable tanque ki pas faire li en suivant Rasouloullah ‎(Sallalaahou Alaihi Wasallam). Donc muhabbat pou Allah Ta’ala li trouve dans suive Rasouloullah ‎(Sallalaahou Alaihi Wasallam). Pli nou suive Rasouloullah ‎(Sallalaahou Alaihi Wasallam), pli nou approché avec Allah Ta’ala et pli nou gagne l’amitié pou Allah Ta’ala.

« O Allah, accorde nou to muhabbat et muhabbat de to Nabi ‎(Sallalaahou Alaihi Wasallam) et donne nou la volonté pou suive so sounnat. »

Le fait ki Allah Ta’ala li Al-Wadoud, ça li exige de nou ki nou ena so l’amitié. Ene l’amitié ki dépasse tout l’amitié, ene l’amitié ki ranne tout l’amitié fade et sans saveur, ene l’amitié ki control tout nou tendance et tout nou sentiments. C’est ene niveau de l’amitié ki faire difficultés vine facile, ki faire passe la nuit dans ibaadat facile et délicieux, ki ranne banne pratiques rempli de sensation et jouissance vine détestable. Ça couleur-là nou trouve li bien claire dans la vie de banne Sahaba-e-Kiraam. Banne Tabeines, Taba-Tabeines, banne Aulia-Allah, banne Mashaikh et banne Ulama aussi fine gagne ça couleur-là en bon partie. Ena ene cozé ki dire ki l’entourage ene dimoune li indique la personnalité de ça dimoune-là. Et ça li bien vrai. Rassouloullah ‎(Sallalaahou Alaihi Wasallam) fine dire ki ene dimoune li ena tendance reste dans la manière ki so camarade intime été. Reste dans l’entourage de banne personnages pieux li ene moyen très efficace pou transforme caractère et manière ene dimoune pou de bon. Au contraire d’après banne Mashaikh, c’est ça même le seul moyen. Donc cotoye banne personnages pieux li indispensable pou le développement de ça l’amitié-là à ene degré et ene stage ki ranne tout kitchose secondaire divant l’amitié Allah Ta’ala et so Rasoul ‎(Sallalaahou Alaihi Wasallam). C’est ene l’amitié ki capave arrive à ene stage cote tout kitchose paraite insignifiant et dévalué divant l’amour Allah Ta’ala ziska donne la vie aussi, non seulement li vine facile mais li vine délicieux.

[Extrait de Al Jamiat Vol.8 No.6]