Ki faire bizin faire khutbah en créole ?

Ki raison capave avancé pou faire khutbah en créole ?

Ena ene seul raison. Pena aukene raison apart ça ene raison-là. Zotte faire li avec l’impression ki c’est ene causerie ki dimoune bizin comprend. Ki arrivé si faire li en arabe dans ene l’endroit cote dimoune pas conne arabe ? Eski khutbah-là valable ou bien non ? Autant ki nou conné, pena personne ki fine dire ki li pas compté. Ça montré ki faire khutbah dans ene langage pou dimoune comprend li capave ene bon l’idée mais li pas ça essentiel et important-là. Sans dimoune comprend li aussi li valable. Pena narien ki pas bon ou indésirable. Parceki khutbah li plitot ene pratique symbolique ki rationnelle. Et ça coté symbolique-là li prédominant. So aspect symbolique li tellement fort ki ça l’idée faire comprend-là li perdi et évanouir complètement.

Assumons ki nou dans ene conférence cote fine réuni tout banne savants et banne érudits ki bien bien versé  dans Deen. Dans khutbah Jum’ah, Imam sahab fine traite ene sujet avec banne matériel ki l’audience li déjà conne boucou plis ki ça et comprend boucou plis ki ça. Eski ça khutbah-là ena so utilité ? Définitivement oui parceki pas pou ena namaz Jum’ah même sans ça. Si li ti necque ene causerie, ti capave supprime li étant donné ki banne ‘Oulama présent zotte conne boucou plis ki ça. Mais malgré ça, bizin faire li. Sinon namaz Jum’ah pas pou valable. Li pas pou permette faire 2 rakaat Jum’ah au lieu 4 rakaat Zohar.

Disons si nou mette ene enregistrement de ene causerie dans l’heure de khutbah au lieu ene kikene faire khutbah, eski ça enregistrement-là li pou dispense nou de la nécessité de khutbah ? Sans doute ça li pas pou sufi. Bizin ene kikene en chair et en os faire li pou namaz Jum’ah valable. Si khutbah so maqsad et so but ti causerie, alors li ti bizin sufi. Mais ena ene l’autre aspect pli important et prédominant. Et ça c’est so aspect symbolique ki pou réalisable quand faire li en arabe.

Khutbah ena ene structure ki bizin respecté. C’est ene dimoune ki bizin faire li. Li pas sufi pou réalise li par joué ene enregistrement parceki li pas ene causerie ki capave être disposé par ene moyen d’autre ki dimoune faire li.

Ena deux khutbah pou faire ki interrompu par ene ti pause en posture assizé. Ça deux khutbah-là faire en posture diboute. Li contre sounnat de Nabi ‎(Sallallaahou A'laihi Wasallam)‎ si faire li en posture assizé ou bien faire ene seul khutbah au lieu deux khutbah. Tous ça-là montré ki khutbah c’est quelque chose apart ki démarque li dans plusieurs façons de ene causerie. Ene Sahabi en l’occurrence de Hazrat Ka’ab Bin Ujrah ‎(Sallallaahou A'laihi Wasallam)‎ ti qualifié de خبيث (malpropre) ene ki ti pé faire khutbah en posture assizé. Li pas facile pou qualifié ene dimoune de malpropre. Li bizin ene kitchose bien grave même pou le Sahabi qualifié li de خبيث. Pou explique ceki le Sahabi fine dire, banne ‘Oulama dire ki c’est ene impureté ki trouve à l’intérieur de kikene même ki faire li oppose ene pratique établi. C’est ene personne indiscipliné et désordonné ki pou ena l’audace modifié ou change ene structure établi par la pratique de Nabi ‎(Sallallaahou A'laihi Wasallam)‎, banne Sahaba-e-Kiraam, Tabeines, banne Taba-Tabeines et banne ‘Oulama dans tous banne l’époque. Ça facteur dibouté-assizé là c’est ene facteur relativement moins important ki ça facteur langage-là. Si dans assizé au lieu dibouté li pé être qualifié de خبيث, alors imagine ene coup couma ene dimoune ki change langage arabe-là même pou être qualifié ? Sans doute li ene façon vraiment dégoutant et indésirable. C’est ça même ki banne Fouqahah (Juristes) appelle li Makrouh Tahreemi. Li bon conné ki persisté lors ene acte et pratique ki Makrouh Tahreemi li faire li vine dans degré de haraam.

En plis de tous ça-là ena ene point bien frappant. Si arrivé l’audience li constitué de banne sourds, alors là aussi bizin faire khutbah. Sans khutbah pas pou ena droit faire Jum’ah. D’après nou logique li pou ene gaspillage pou adresse ene l’audience ki pena faculté tendé mais pourtant bizin faire li.

Ça capave paraite n’importe comment ou bien ridicule mais ça aussi li vrai ki ena place cote nou bizin arrête servi nou logique et soumette nou à ceki Shariat préconisé. Faudré pas servi l’opinion dans banne contexte similaire. Bizin servi soumission. Ça aussi montré dans ene façon nette et claire ki khutbah li plitot ene pratique symbolique. Donc bizin laisse li couma li été. Couma capave traite khutbah de ene causerie et en conséquence applique banne principes de causerie quand pourtant li ene pratique ki bizin faire li, même si l’audience pas pé comprend ou bien pas pé tendé même ou bien zotte sourde ki pas pou capave tendé même !

[Extrait de Al Jamiat Vol.7 No.10]