Bans Ulaama dans le passé fine considere Ibn Arabi comme Kaafir a cause so croyance lor Wahdat ul Wujoud;

Answer

Wa alaikumus salaam. Nous maintenir nous position ki nous fine publié lor nous la gazette Al Jamiat. Si ena banne Aalim ki fine critique li mais ena plisse ki sa ki fine approuve li. Donc nous ensame avec la majorité et nous considère Hazrat Sheikh Ibnul Arabi comme ene de banne grand wali Allah. Sa zafaire attribué kufr envers banne Ulama li pas ene kitsoz nouveau sa. Banne Ulama couma Imam Bukhari et Ibne Taymiyyah aussi pas fine reste a l'abri de sa. Quant a wahdatul wujood li pas ene croyance sa, mais li ene l’état d'esprit. Parfois ene dimoune li tellement approché avec Allah cote li conne seulement Allah et li pas trouve narien divant li. La façon ki nous comprend Wahdatul Wujood et ki nous fine cité dans Al-Jamiat nous pe reproduire li ici. " Littéralement ça signifié l’unité de l’existence. C'est-à-dire ene seule kitchose ki existé. Ça c’est ene terme ki fine servi par banne ‘Oulamaa de haute calibre. Etant ambiguë, ça fine être interprété dans différent façons. Mais so interprétation claire et simple c’est ki l’existence Allah ta’ala même ki parfait, complet et réel. Apart li, tout ceki existé, na pas représente narien divant so l’existence. Pareil couma l’éclairage ene la bougie pas représente narien divant l’éclairage soleil dans plein lijour. Coumsa même tout kitchose existé par Allah Ta’ala. Tout kitchose ki arrivé à n’importe cote ça, pé arrivé par l’ordre Allah Ta’ala. L’existence Allah Ta’ala li domine tout l’existence. Pouvoir et Qoudrat Allah Ta’ala li manifesté partout dans tout kitchose. Regard ene dimoune ki entouré, dominé et envailli par le matérialisme reste braqué lors la forme superficielle et extrême de so l’entourage. Li pas dépasse plis ki ça - li reste emprisonné dans le monde matériel. Mais ene personnage pieux et sincère so regard li casse ça banne barrière-là pour finalement témoigne l’omniprésence divine partout. Et ça faire li trouve Allah même Allah partout. Li pareille couma ene X-ray ki pas trouve la peau extérieure. Li perce la peau et li trouve lezos et la moelle dans lezos. Donc Wahdatoul Woujoud li pas plis ki ça et d’après ça l’interpretation-là, perna narien de shirk la dans. Au contraire li ene degrés très avancé de la piété et de taqwa ki nous capave appelle li ‘‘Ihsaan’’ dans langage hadice. Eski nou pou blâme ça personne ki ena ene regard perçant-là ou bien nou flatte ça l’autre là ki so regard ena défaut ? Nou laisse le soin de décidé à chacun selon so l’intelligence. [Extrait de Al Jamiat Vol.1 No.11] Wahdatoul Woujoud et ene erreur: Ene causé de sagesse dire ki bizin adresse dimoune d’après so niveau. Malheureusement le sujet de Wahdatoul Woujoud ki ti causé auparavant dans ene milieu ki ti à la hauteur pou comprend ça, fine rente dans z’oreille banne ki perna l’aptitude pou comprend li. Donc d’après principe, banne ki comprend li faudré pas zotte cause ça avec banne ki pas capave comprend li afin pou pas crée confusion. Et banne ki pas capave comprend, faudré pas zotte critique banne personnes ki comprend pou ene kitchose ki zotte même zotte pas capave comprend. Alors couma li ene erreur cause ene kitchose divant banne ki pas capave comprend, coumsa même li ene erreur critique ou camarade quand ou même pas comprend. [Extrait de Al Jamiat Vol.2 No.8]