I’tikaaf

Définition:

Le mot I’tikaaf littéralement signifié reste engagé dans ene certaine action. D’après shariah ça veut dire reste dans masjid.

I’tikaaf  pendant les derniers dix jours de Ramadhaan

Rassouloullah (Sallallaahou Alaihi Wasallam) fine observe I’tikaaf pendant les dernier dix jours de ramadhaan. Li fine faire ça régulièrement tous les années apart ene seul l’année ki li pas ti faire et ti remplace li dans le mois shawwaal. Ça fine amène banne juristes et banne ‘Oulama pou conclure ki li sounnat mou’akkadah. 

L’importance Sounnat Mou’akkadah

Néglige ene sounnat mou’akkadah li ene péché. C’est ene péché impé moins grave ki péché néglige ene waajib ou ene faraz. La différence c’est ene différence technique ki servi zisse pou différencié entre plusieurs catégories de pratique mais en li même li très important. Acoze ça faudré pas servi ça différence de gravité-là comme ene l’encouragement ou ene prétexte pou néglige ene sounnat parceki ça tigite-là aussi li bien néfaste en li même. A noté ki néglige ene sounnat mou’akkadah régulièrement li ene indication de légèreté dans Deen et manquement de mouhabbat pou nou bien-aimé Nabi Mouhammad (Sallallaahou Alaihi Wasallam). Pli ene dimoune ena l’habitude néglige ça, pli so péché continué vine grave. Ça explication-là li applique pou tou sounnat mou’akkadah en général.

Mais I’tikaaf pendant les dix derniers jours li ene sounnat ki pas applique lors chaque individu parceki dans l’époque Nabi (Sallallaahou Alaihi Wasallam) ti ena ene quantité Sahaba-e-Kiraam ki pas ti faire li et Nabi (Sallallaahou Alaihi Wasallam) pas fine faire aukene remarque lors zotte. Ça amene nou pou comprend ki c’est ene responsabilité et ene devoir ki capave déchargé et acquitté par ene parti de banne habitants de ene localité. Ça ene parti-là li capave ene seul personne aussi. Donc si ene personne aussi faire li alors tous banne habitants de ça localité-là pou acquitté de zotte responsabilité. Sinon zotte tous pou coupable. Ça genre de sounnat-là appelle sounnat mou’akkadah alal kifayah.

Règlements général concernant I’tikaaf

Etant donné ki I’tikaaf veut dire reste dans masjid continuellement, alors ene personne ki dans I’tikaaf li bizin pas sorti depi dans masjid excepté pou banne besoins naturel et indispensable ki pas capave faire dans masjid couma alle toilette, faire wazou en cas wazou fine cassé et sorti pou faire ghussal si ghussal fine cassé. Coumsa même si ene dimoune fine sorti en dehors masjid pou donne azaan, alors ça aussi li ene raison valable ki pas casse I’tikaaf.

Ki veut dire Masjid ?

Pou le besoin de I’tikaaf, masjid signifié ça l’endroit ou l’espace ki fine être désigné comme jamaat khana par l’autorité concernée. Donc ene personne dans I’tikaaf li bizin continué reste dans ça l’espace ki nou appelle jamaat khana. Alors li pas pou en droit sorti dans la varangue ou vine dans sahan ou bien cote wazou khana. Si li fine sorti en dehors masjid sans ene raison valable, alors so I’tikaaf pou annulé.

Sorti depi dans Masjid par oubli

A noté ki sorti depi dans masjid par oubli aussi li annule I’tikaaf. Coumsa même si fine bizin amène li l’hôpital, alors ça aussi li annule so I’tikaaf.

Ki bizin faire si I’tikaaf fine annulé ?

D’abord bizin conné ki ena gounah et péché dans casse I’tikaaf pendant les derniers dix jours de ramadhan. Apart faire istighfaar, la personne li bizin remplace I’tikaaf-là aussi. Mais li ena droit remplace necque ça jour ki so I’tikaaf ti cassé. Li pas nécessaire remplace tous les dix ou neuf jours. Mais li pli bon et li sounnat pou remplace tous les dix jours ou neuf jours après le roza de ramadhan. Li bizin garde roza aussi quand li remplace so I’tikaaf.

Par M.R.Meerun