Tahiyyat-ul-Masjid

عن ابى قتادة السلمى ان رسول الله صلى الله عليه وسلم قال اذا دخل احدكم المسجد فليركع ركعتين قبل ان يجلس (البخارى)

Traduction:

Hazrat Abou Qataadah As-Salami rapporté ki Rassouloullah ‎(Sallallaahou A'laihi Wasallam)‎‎‎‎ fine dire: "Quand kikene parmi ou rente dans masjid, alors li faire deux rakaat avant li assizé." (Sahih Boukhari)

Explication:

Selon ene groupe, l'ordre pou faire deux rakaat quand rente dans masjid li ene l'ordre obligatoire. Selon ça groupe-là, ene dimoune ki rente dans masjid, li obligé faire deux rakaat avant li assizé. Mais d'après le Joumhour et la grande majorité, ça l'ordre-là li ene l'ordre de recommandation. Donc li moustahab et li recommandé pou faire deux rakaat avant assizé. Parceki selon l'ijma' (consensus) et l’unanimité des ‘Oulama de tous bord, li permette rente dans masjid sans wazou. Personne pas dire le contraire. Si ça deux rakaat-là ti obligatoire, li pas ti pou permette rente dans masjid sans wazou. Parceki si ene dimoune gagne droit rente dans masjid sans wazou, alors ki manière Shariat capave oblige li faire deux rakaat quand li pas gagne droit faire namaz sans wazou? Donc oblige faire ça deux rakaat-là, c'est ene façon pou dire ki pas gagne droit rente dans masjid sans wazou. Or c'est ene kitchose ki personne pas fine dire jamais. Donc d'après l'ijma' (consensus), ça deux rakaat-là li recommandé seulement. Et dire ki li obligatoire, li nécessite ene kitchose ki conte ijma'.

Banne l’heure ki Tahiyyat-ul-Masjid pas autorisé

Etant donné ki ça deux rakaat-là li moustahab et nafil, alors c’est banne règlements de nafil ki pou appliqué lors ça. C'est-à-dire couma aukene namaz nafil pas permette dans l'intervalle entre soubh swadiq ziska levé du soleil, alors tahiyyat-ul-masjid aussi pas pou permette dans ça l'intervalle-là. Coumsa même pena nafil après namaz assar. Ça veut dire ki si ene dimoune pé rente dans masjid après ki li fine fini faire namaz assar, li bizin pas faire ça deux rakaat-là. Par contre avant faire namaz assar, couma li gagne droit faire so sounnat, coumsa même li capave faire deux rakaat tahiyyat-ul-masjid si li oulé.

A noté ki si ene dimoune li rente directement dans namaz sounnat ou bien li joine dans namaz faraz, alors ça li dispense li de tahiyyat-ul-masjid.

Préparé par M.R.Meerun