L’importance de nourriture halaal

Creation Insaan

Allah ta’aalaa fine donne l’existence a insaan a travers ene le corps et ene rouh (ame). La dans ceki pli important c’est so rouh parceki ene le corps sans ene rouh li pou seulement ene cadavre malgré ki li capave bien joli, robuste et bien battu.

Allah ta’aalaa pé dire:

“Certainement celui ki fine purifié so nafs, li fine gagne reussite.” (As Shams - 91:9)

Rassouloul-laah e fine dire:

“… Certainement ena ene morceau dans le corps. Si li correct, entier le corps pou correct et si li affecté, entier le corps pou affecté. Certainement sa morceau la c’est le coeur.” (Boukhari – rapporté par Hazrat Nou’man Ibn Bashir t)

Mais sa le corps là aussi ena so l’importance parceki ene rouh pas capave existé sa ene le corps. Bizin ena ene le corps a travers ki sa rouh là capave existé.

Pou ki sa le corps là reste en forme et en bonne santé, Allah fine mette certaine necessité ki sa le corps là bizin tel que manger, boire, linge, etc… Et pou nou capave subvenir sa banne necessité là, nou pou bizin acquerir et gagne banne revenus et l’argent. C’est le systeme ki Allah ta’aalaa fine metté dans sa le monde là.

Revenue bizin halaal

Mais pou nou acquerir sa l’argent là et sa banne revenues là, l’Islam fine preconisé ki zotte bizin halaal. Faudré pas ki li vine de ene source haraam.

Allah ta’aalaa pé dire:

“O banne messagers! Mange banne kitchose ki pure (halaal) et faire banne bon actions. Certainement mo conné ceki zotte faire.” (Al Mou’minoun – 23:51)

Sa verset là montré ki si ene personne consomme nourriture halaal, so banne actions aussi pou sorti bon parceki Allah ta’aalaa fine mentionne bon action tout de suite après nourriture halaal. Ene l’exemple claire c’est ki quand ene carburant (l’essence, mazoute etc …) dans ene machine li correct, li pure et pena melange et saleté, so rendement aussi li correct et machine là marche bien. Et si ena melange et saletè, pas seulement machine pas pou marche bien, mais li pou aussi affecté et en panne.

En d’autres mots, si nourriture pou halaal, banne actions pou sorti correct, pou ena envie pou faire bon action, pou ena noor dans le coeur et pou ena degout pou banne gounaah. Et de l’autre coté si nourriture pas halaal, pou ena tendance pou faire mauvais action, pas pou ena noor dans le coeur et pou ena ene desinteressement et degout pou banne bon actions.

Nou realiser aussi depi sa aayat là ki quand Allah fine ordonne a banne prophetes (ki banne insaan ki Allah meme fine choisir et zotte ma’soum - innocent) pou consomme nourriture halaal, sa la loi là pou plus appliqué pou nou - pou banne simple musulman couma nou. Donc nou bizin plus faire attention lors sa sujet là.

Celui ki consomme nourriture haraam, so dou’aa pas accepté

Parmi banne mefaits de rozi haraam, c’est ki sa personne là so dou’aa pas accepté malgré ki li capave pé demande dou’aa avec beaucoup devotion et sincerité et malgré ki li capave dans beaucoup difficulté et li merité ki so dou’aa accepté.

Rassouloul-laah e fine dire:

“O bann dimoune! Certainement Allah ta’aalaa li pure et li accepté seulement banne actions ki pure. Et certainement Allah fine donne meme l’ordre a banne croyants ki li fine donne a so banne messagers (Rassoul) – li fine dire: (O banne messagers! Mange banne kitchose ki pure (halaal) et faire banne bon actions, certainement mo conné c’est ki zotte pé faire.) Et Allah fine dire: (O banne ki fine amene imaan! Mange banne kitchose pure ki nou fine accorde zotte.) Et puis Rassoulou-laah e fine faire mention de ene personne ki fine faire ene longue voyage, so cheveux chifonné et plein la poussière, li leve so deux la main vers le ciel (li faire dou’aa) et li dire: O mo Rabb! O mo Rabb! Tandis ki so nourriture haraam, so boire haraam, sa linge haraam et li fine nourri avec haraam, donc comment Allah pou accepté sa personne la so dou’aa.” (Mouslim et Tirmizi – rapporté par Hazrat A. Hourairah r.a)

Recherche nourriture halaal li obligatoire lors chaque musulman

Rassoulou-laah e fine dire:

“Recherche nourriture halaal li obligatoire lors chaque musulman.” (Twabraani - rapporté par Hazrat Anas r.a )

Rassoulou-laah e fine dire:

“Recherche nourriture halaal li ene obligation après l’obligation de namaz.” (Twabraani - rapporté par Hazrat Abdoullah ibn Mas’oud r.a )

Celui ki consomme ene bouchée haraam, aucaine so bon action pas accepté pendant 40 jours

Hazrat Ibn ‘Abbaas y fine dire: “Quelqu’un fine recite sa aayate là cote Rassoulou-laah e: (O banne dimounes! Mange ce ki ena dans la terre ki halaal et pure.) Hazrat Sa’d ibn Abi Waq-qaas fine dibouté et li fine dire: O Messager d’Allah demande dou’aa avec Allah ki li faire moi vine moustajaaboud da’wah (celui ki so dou’aa tout le temps accepté). Rassoulou-laah (e) fine dire: O Sa’d! Mange norriture halaal, to pou vine moustajaaboud da’wah. Mo faire serment par Allah ki quand ene personne mette ene morceau haraam dans so ventre aucaine so bon action pas accepté pendant 40 jours et n’importe ki la viande ki fine grandi avec haraam, li merité pou alle dans l’enfer.” (Tabraani)

NOTE:- Ici nou bizin noté ki bon action pas accepté veut dire ki sa personne là pas gagne sawaab a moins ki li repentir et faire tawbah sincerement. Quand a so responsabilité et devoir de faraz, li definitivement dechargé. Li absolument couma ene z’enfant ki fine donne ene l’examen et so resultat vini ki li fine fail.

Rassoulou-laah e fine dire:

“Celui ki fine acheté ene linge avec 10 dirham et ena ene dirham la dans ki haraam, Allah pas pou accepté aucaine namaaz de sa personne là tant ki ene parti de sa linge là pou lors sa personne là…” (Ahmad - rapporté par Hazrat Ibn ‘Oumar r.a )

Pou ena ene l’epoque cote dimoune pas pou prend contre depi cote sa zotte fine gagne zotte l’argent

Rassoulou-laah e fine dire:

“Pou arrive ene l’epoque cote ene personne pas pou prend compte cote li fine gagne so du bien; depi halaal ou bien haraam.” (Boukhari et Nassai - rapporté par Hazrat A. Hourairah r.a )

Bon nouvelle pou celui ki so nourriture halaal

Rassoulou-laah e fine dire:

“Twoubaa (bon nouvelle ou bien ene pieds dans jannat) pou sa personne là ki so nourriture li halaal…” (Twabraani)

Celui ki so revenue li halaal et li depense li lors li et les autres, li pou moyen de purification pou li

Rassoulou-laah e fine dire:

“N’importe ki sanla ki acquerir l’argent halaal et li acheter nourriture et linge avec sa pou li et pou ene l’autre parmi creature Allah, sa l’argent li ene moyen pou li gagne pardon Allah et purifier li …” (Ibn Hibban et Haakim)

Reaction de Hazrat Abou Bakr r.a quand li fine arrive consomme ene kitchose haraam inconsciemment

Hazrat ‘Aisha (radwiyal-laahou ‘anhaa) fine dire ki mo papa (Hazrat A. Bakr (r.a) ) ti ena ène esclave ki ti pé amene revenue pou li et li ti pé manger depi sa. Ene jour esclave là fine amene kitchose et Hazrat A. Bakr (r.a) fine mange depi la dans. Esclave là fine dire: “Est ce ki ou conné ki eté sa?” Hazrat A. Bakr r.a fine dire: “Ki eté sa?” Esclave là fine dire: “Mo ti pé faire longaniste pou ene dimoune dans l’epoque jaahiliyyah et pas ti conne faire longaniste bien; plutot mo ti pé trompe li. Donc pou sa travail là li fine paye moi. Et sa kitchose ki ou fine mange li sorti la dans meme.” Alors Hazrat A. Bakr (r.a) fine mette so la main (dans so la gorge) et li fine vomi tout kitchose dans so ventre. (Boukhari)

PAR M R MEERUN