Salaat-ul-Ishraaq et Salaat-ud-Doha

عن انس بن مالك قال قال رسول الله صلى الله عليه وسلم: من صلى الصبح فى جماعة ثم قعد يذكر الله حتى تطلع الشمس ثم صلى ركعتين كانت له كاجر حجة وعمرة قال قال رسول الله صلى الله عليه وسلم تامة تامة تامة 

Traduction:

Hazrat Anas ‎‎(Radiyallahou anhou‎)‎‎ rapporté ki Rassouloullah ‎(Sallallaahou A'laihi Wasallam)‎‎‎‎ fine dire: "Celui ki faire namaz fajar avec jamaat et ensuite li reste assizé li faire zikrullah ziska ki soleil levé et après ça li faire deux rakaat, li pou ena ene récompense pareil couma récompense ene hajj et ene 'oumrah. Hazrat Anas ‎‎(Radiyallahou anhou‎)‎‎ dire ki Rassouloullah ‎(Sallallaahou A'laihi Wasallam)‎‎‎‎ fine dire: "Complète, complète, complète" (c'est-à-dire li pou ena ene récompense de ene hajj complète et de ene 'oumah complète)." (Tirmizi)

Position hadice:

Imam Tirmizi fine qualifié ça hadice-là de ene hadice حسن غريب. Coumsa même Tabraani fine rapporte ça hadice-là de Hazrat Abou Umamah ‎(Radiyallahou anhou‎)‎ avec ene très bon sanad. Donc ça hadice-là li ene hadice sahih.

Explication:

Ena deux namaz dans la première partie de la journée. Ene dans commencement quand soleil fini monté dans hauteur ene pique ou deux piques dans l'horizon à l’est. Ça namaz-là li reconnaite par صلاة الاشراق.

Et ene deuxième namaz quand soleil fini couvert ene quart de so trajet dans la journée. Ça li tombe à peu près 10hrs ou 10hrs et demi dans la journée. Ça namaz-là appelle صلاة الضحى ou bien namaz chaaste.

Dans ene hadice ki trouve dans Abou Dawoud et dans ene l'autre ki trouve dans Tabraani, Rassouloullah ‎(Sallallaahou A'laihi Wasallam)‎‎‎‎ fine appelle ça namaz ki faire dans ça premier l'heure-là صلاة الضحى aussi. C'est-à-dire couma fine appelle namaz chaaste صلاة الضحى, coumsa même fine appelle namaz Ishraaq aussi صلاة الضحى. Donc fine appelle tous les deux par ene seul nom. Le fait ki ena deux namaz dans la première partie de la journée, ça li raporté clairement dans ene hadice ki trouve dans Tirmizi et ki rapporté par Hazrat Ali ‎(Radiyallahou anhou‎)‎. Selon ça hadice-là, Hazrat Ali ‎(Radiyallahou anhou‎)‎ dire:

"كان رسول الله صلى الله عليه وسلم اذا كانت الشمس من ههنا كهيئتها من ههنا عند العصر صلى ركعتين واذا كانت الشمس من ههنا كهيئتها من ههنا عند الظهر صلى اربعا ..." (الترمذى)

Traduction:

"Quand soleil ti pé vine dans l'est dans position ki li été dans l'ouest l'heure assar (c'est-à-dire dans même l’altitude par rapport à l’horizon), Rassouloullah ‎(Sallallaahou A'laihi Wasallam)‎‎‎‎ ti pé faire 2 rakaat. Et quand soleil ti pé vine dans l'est dans position ki li été dans l'ouest l'heure zohar, Rassouloullah ‎(Sallallaahou A'laihi Wasallam)‎‎‎‎ ti pé faire 4 rakaat …" (Tirmizi)

Explication:

Ça hadice-là montré ki ena deux namaz ki Nabi ‎(Sallallaahou A'laihi Wasallam)‎‎‎‎ ti pé faire :

1. Ene namaz de deux rakaat dans commencement la journée. D'après la version de Nisaaï, ça premier namaz-là Rassouloullah ‎(Sallallaahou A'laihi Wasallam)‎‎‎‎ ti pé faire li ene ti mama après levé du soleil. C'est-à-dire quand soleil fini monte dans l'horizon hauteur ene pique ou deux piques.
2. Et ça deuxième-là c'était ene namaz de 4 rakaat ki Nabi ‎(Sallallaahou A'laihi Wasallam)‎‎‎‎ ti pé faire quand soleil ti pé fini monte assez haute dans le ciel.

Premier namaz-là appelle Salaat-ul-Ishraaq et deuxième-là reconnaite par Salaat-ud-Doha ou bien namaz chaaste.

Hadice Hazrat Mou'aaz Bin Anas ‎(Radiyallahou anhou‎)‎

عن سهل بن معاذ بن انس الجهنى عن ابيه ان رسول الله صلى الله عليه وسلم قال: "من قعد فى مصلاه حين ينصرف من صلاة الصبح حتى يسبح ركعتى الضحى لا يقول الا خيرا غفر له خطاياه وان كان اكثر من زبد البحر" (ابو داؤد)

Traduction:

Shahl Bin Mou'aaz Bin Anas Al-Jouhani rapporté de so papa (Hazrat Mou'aaz Bin Anas ‎(Radiyallahou anhou‎)‎) ki Rassouloullah ‎(Sallallaahou A'laihi Wasallam)‎‎‎‎ fine dire: "Celui ki reste assizé dans so place cot li fine faire namaz quand li termine namaz fajr ziska ki li accomplir les deux rakaat de doha en sorte ki (entre ça deux namaz-là) li pas cause narien apart ceki bon, alors so banne péchés pou être pardonné quand même si ça li plis ki l'écume (ki ena dans) la mer. (Abou Dawoud)

Explication:

Dans ça hadice-là, Salaat-ud-Doha signifié namaz Ishraaq. Normalement pli bon place pou faire namaz nafil c'est la caze. A moins si ena quelque chose ki prouve le contraire. Ça hadice-là prouvé ki ça deux rakaat-là pli bon faire li dans masjid même. Donc pli bon place pou namaz Ishraaq c'est masjid.

Le nombre minimal de namaz Ishraaq li deux rakaat d'après ça hadice-là. Mais pena narien ki empêche faire plis ki ça. Ene dimoune ena droit faire la quantité ki li oulé parceki pli ene dimoune faire nafil, pli li dans so l'avantage. Mais li sufi faire 2 rakaat pou gagne ça banne récompense spécifiques ki fine mentionné dans banne hadices.

D'après banne 'Oulama, banne péchés ki pardonné par faire ça deux rakaats-là, c'est banne péchés mineurs. Quant à banne péchés majeurs, en principe soit bizin faire tawbah pou être pardonné ou bien si Allah Ta'ala oulé, li pardonne pou celui ki li oulé. Ça li dans la main Allah Ta'ala. 

Salaat-ud-Doha

"عن معاذة انها سألت عائشة رضى الله عنها كم كان رسول الله صلى الله عليه وسلم يصلى صلاة الضحى قالت اربع ركعات ويزيد ما شاء الله" (مسلم)

Traduction:

Mou'aazah rapporté: "Mo fine dimane (Hazrat) Aisha ‎(Radiyallahou anhou‎)‎ combien rakaat namaz Doha (Chaaste) Rassouloullah ‎(Sallallaahou A'laihi Wasallam)‎‎‎‎ ti habitué faire? Li fine dire: 4 rakaat et (parfois) li ti pé faire plis la quantité ki Allah Ta'ala oulé." (Mouslim)

Explication:

Le nombre de rakaat ki Nabi ‎(Sallallaahou A'laihi Wasallam)‎‎‎‎ ti ena l'habitude faire dans namaz Chaaste, c'était 4 rakaat. Mais parfois-parfois li ti pé faire plis ki ça aussi selon circonstance et selon l'occasion. Par exemple à l'occasion de la conquête de Makkah, li ti faire 8 rakaat. Coumsa même selon ene hadice ki rapporté dans Al-Mou'jam Al-Kabeer de Tabraani avec ene sanad (chaîne de narration) passable, Rassouloullah ‎(Sallallaahou A'laihi Wasallam)‎‎‎‎ fine recommane pou faire namaz Chaaste de 2 à 12 rakaat aussi.

L'heure Salaat-ud-Doha ou bien namaz Chaaste

"عن زيد بن ارقم قال خرج رسول الله صلى الله عليه وسلم على اهل قباء وهم يصلون فقال صلاة الاوابين اذا رمضت الفصال" (مسلم)

Traduction:

Hazrat Zaid Bin Arqam ‎(Radiyallahou anhou‎)‎ rapporté ki Rassouloullah ‎(Sallallaahou A'laihi Wasallam)‎‎‎‎ fine arrivé traverse cote banne habitants de Quba pendant ki zotte ti pé faire namaz. Alors li fine dire: "Namaz de Awwaabeen (banne ki incline vers Allah Ta'ala) c'est dans ça moment (de la journée) quand li pied banne ti chameau commence brûlé." (Mouslim)

Explication:

D'après la version ki trouve dans Sounan Ad-Darimi, banne habitants de Quba ti pé faire namaz après levé du soleil dans gramatin quand Nabi ‎(Sallallaahou A'laihi Wasallam)‎‎‎‎ ti vine cotte zotte. Et selon la version de Mousnad Ahmad, ça namaz-là c’était Salaat-ud-Doha ou bien namaz Chaaste.

Ça veut dire quand Nabi ‎(Sallallaahou A'laihi Wasallam)‎‎‎‎ fine alle Quba, li fine trouve banne habitants là-bas pé faire namaz Chaaste dans gramatin après soleil levé. Lors ça Nabi ‎(Sallallaahou A'laihi Wasallam)‎‎‎‎ fine faire ressortir ki banne Awwabeen (banne ki zotte le cœur attaché avec Allah Ta'ala), zotte faire ça namaz-là ene ti pé plitard dans la journée quand banne ti chameau zotte commence gagne difficulté pou marché.

Ça montré ki namaz Chaaste so l'heure li fini rentré après soleil levé et li resté ziska ene ti pé avant zawaal mais so pli bon l'heure c'est ça moment quand la patte banne ti chameau commence brulé. Normalement la terre li commence chauffé à ene degré ki li brule la patte banne ti chameau quand soleil fini couvert so 1/4 trajet dans la journée. Ça li tombe à peu près entre 10hrs et 11hrs dans la journée.

Dans ça l'heure-là, surtout dans l'Arabie cote faire boucou chaud, dimoune so le corps li largué et li dimane repos. C'est ene personne ki so le cœur bien attaché même avec Allah Ta'ala ki pou préfère engage li dans namaz dans ça l'heure-là au lieu alle reposé. C'est acoze ça ki Nabi ‎(Sallallaahou A'laihi Wasallam)‎‎‎‎ fine appelle namaz Chaaste ki faire dans ça l'heure-là Salaat-ul-Awwabeen ou bien namaz de banne ki zotte le cœur bien attaché avec Allah Ta'ala. Ça namaz-là fine gagne ça nom-là en fonction de ça l'état d'esprit de ça personne ki pé faire ça namaz-là. Ene dimoune capave ena le même l'état d'esprit et la même dévotion pou ene l'autre namaz. Donc ça pas empêche qualifié ça l'autre namaz-là de Salaat-ul-Awwabeen. Dans ene hadice rapporté par Hazrat Abou Hourairah ‎(Radiyallahou anhou‎)‎ ki trouve dans Al-Moustadrak de Al-Haakim et ki qualifié de sahih (authentique) par Al-Haakim et Allaamah Az-Zahabi, Rassouloullah ‎(Sallallaahou A'laihi Wasallam)‎‎‎‎ fine dire:

"لا يحافظ على صلاة الضحى الا اواب قال وهى صلاة الاوابين"

Traduction:

"Personne pas capave être ponctuel et régulier lors Salaat-ud-Doha apart ene ki "Awwaab" (ene ki so le cœur bien attaché avec Allah Ta'ala). Et ça c'est namaz de banne "Awwabeen" (banne ki zotte le cœur bien attaché avec Allah Ta'ala)."

Explication:

Ça hadice-là montré ki accomplir namaz Doha ou bien namaz Chaaste régulièrement, c'est ene signe et ene indication ki la personne ki accomplir li, so le cœur li bien attaché avec Allah Ta'ala. Et si au lieu faire li gramatin bonheur, li faire li ene ti pé pli tard dans journée, ça indication-là vine pli fort.

Selon ene hadice, ena ene sadaqah ki appliqué lors chaque joint ki ene dimoune ena dans so le corps. D'après hadice, ene dimoune ena 360 joints dans so le corps. Ça veut dire tous les jours li doit 360 sadaqah ki paraite bien difficile surtout dans ene l’époque cote banne la pas ti ena suffisamment mangé boire. Mais Allah Ta'ala par so faveur immense fine facilite ça par permette insaan acquitté de ça responsabilité-là à travers plusieurs façons et banne moyen bien facile.

D’après ça banne moyen-là, li pas nécessaire possédé financièrement parceki d'après hadice, chaque tasbeeh en forme de Soubhaanallah, Alhamdulillah, Allahou Akbar et La-Ilaaha Illaalahou représente ene sadaqah. Coumsa même ordonne le bien ou empêche le mal li représente ene sadaqah. Et en général chaque bonne action ki ene dimoune faire, c'est ene sadaqah de so part. Ça veut dire ki si sadaqah-là li boucou, le moyen pou acquitté de ça banne sadaqah-là aussi li bien facile. Et d'après hadice, le moyen pli facile et pli simple pou acquitté de ça 360 Sadaqah-là, c'est necque accomplir 2 rakaat gramatin dans l'heure Chaaste.

Préparé par M.R.Meerun