Takbeeraat Supplementaire dans namaz Eid et Bakr Eid

"عن كثير بن عبد الله عن ابيه عن جده ان النبى صلى الله عليه وسلم كبر فى العيدين فى الاولى سبعا قبل القراءة وفى الآخرة خمسا قبل القراءة" (الترمذى)

Traduction:

« Katheer Bin Abdullah rapporté de so papa (Hazrat Abdullah) et li de Katheer Bin Abdullah so dada (Hazrat Amr Bin Auf ‎(Radiyallahou anhou‎)‎) ki Nabi ‎(Sallallaahou A'laihi Wasallam)‎‎‎‎ ti faire 7 takbeer dans premier rakaat de namaz Eid avant (faire) Qiraat et 5 takbeer dans deuxième rakaat avant (faire) Qiraat.» (Tirmizi)

Position hadice:

Concernant ça hadice-là Imam Tirmizi dire:

حديث جد كثير حديث حسن وهو احسن شئ روى فى هذا الباب عن النبى صلى الله عليه وسلم"

« Ça hadice ki Katheer so dada fine rapporté, li ene hadice Hassan. Et c’est le meilleur hadice ki fine être rapporté de Nabi ‎(Sallallaahou A'laihi Wasallam)‎‎‎‎ concernant ça sujet la »

D’après ceki Imam Tirmizi fine déclaré, ça hadice-là d’abord li hassan et deuxièmement c’est le meilleur hadice ki fine rapporté concernant le nombre de takbeer supplémentaire ki ena dans namaz Eid et Bakr Eid. Coumsa même selon le العلل الكبرى (Al-Ilal Al-Kubra) de Imam Tirmizi, Imam Boukhari fine qualifié ça hadice-là de meilleur hadice ki fine être rapporté lors ça sujet-là.

Mais après tout li bon conné ki ena ene rawi nommé كثير بن عبد الله dans sanad ça hadice-là ki fine être critiqué sévèrement par banne savants de hadice. Selon le Meezanul-I’tidaal de Allaamah Az-Zahabi, li fine être qualifié de grand menteur par Imam Shafi (R) et Imam Abou Dawood (R). Selon Ibn Hibbaan li ena banne hadice ki li fine fabriqué et ki li rapporté de so dada en passant par so papa. Banne savants de hadice couma Ibn Ma-ine, Darqutni, Nisai et Abou Hatim aussi zotte ena ene l’opinion assez négatif lors li.

Authentification hadice c’est ene question de l’opinion

Si malgré tout ça-là, Imam Boukhari et Imam Tirmizi fine accepté ça hadice-là, c’est acoze ki d’après zotte le rawi Katheer Bin Abdullah li ene rawi valable ou bien acoze ki ça fine être rapporté de plusieurs sources ki ranne li solide dans so l’ensemble. Tres souvent nou joine banne situation semblable dans domaine de hadice. Parceki l’appréciation ki ene savant de hadice li faire lors ene centaine hadice, c’est ene question de jugement et de l’opinion. Et ça li varié de personne à personne. Selon circonstance, selon banne donnés et selon la façon de voir et analyse les choses.

Bref ça hadice-là li capave être ene des meilleur hadice lors ça sujet-là d’après certain savants de hadice mais pou la majorité li pas ene hadice sahih (authentique).

Hadice Hazrat Abdullah Bin ‘Aas ‎(Radiyallahou anhou‎)‎

عن عبد الله بن عمرو بن العاص قال قال النبى صلى الله عليه وسلم التكبير فى الفطر سبع فى الاولى وخمس فى الآخرة والقراءة بعدهما كلتيهما (ابو داؤد)

Traduction:

Hazrat Abdullah Bin Amr Bin Al-‘Aas ‎(Radiyallahou anhou‎)‎ rapporté ki Nabi ‎(Sallallaahou A'laihi Wasallam)‎‎‎‎ fine dire: "(le nombre de) takbeer dans namaz Eid-ul fitr c’est 7 (takbeer) dans premier rakaat et 5 (takbeer) dans deuxième rakaat. Et la récitation Qour’aan li trouve après takbeer dans tout le deux rakaat." (Abou Dawood)

Position hadice:

Ena ene Rawi nommé Abdullah Bin Abdurrahmaan dans sanad ça hadice-là ki li ene rawi controversé. D’après Imam Nisai et Abou Hatim, li ene rawi faible. D’après Al-Ijli, Ibn Hibbaan et Ibn-ul-Madeeni li ene narrateur authentique. D’après le التلخيص الحبير de Allaamah Ibn Hajar Al-Asqalaani, ça hadice-là fine qualifié de authentique par Imam Ahmad, Ali Ibnul-Madeeni et Imam Boukhari aussi. Si ça hadice-là li pas très authentique, li bizin ene hadice Hassan (bon et passable) au moins. Et quand nou prend en considération banne lezot hadice, nou capave déclare li sahih aussi dans so l’ensemble.

Hadice Hazrat Aisha ‎(Radiyallahou anhou‎)‎

"ان رسول الله صلى الله عليه وسلم كان يكبر فى الفطر والاضحى فى الاولى سبع تكبيرات وفى الثانية خمسا" (ابو داؤد)

Traduction:

Dans namaz Eid et Baqr Eid Rassouloullah ‎(Sallallaahou A'laihi Wasallam)‎‎‎‎ ti pé faire 7 takbeer dans premier rakaat et 5 takbeer dans deuxième rakaat. (Abou Dawood)

Position hadice:

Ena ene Rawi nommé ابن لهيعة (Ibn Lahi’a) dans sanad ça hadice-là ki en principe li ضعيف عند اهل الحديث (faible auprès banne savants de hadice) selon les dires de Imam Tirmizi. Mais li même personnellement li fine qualifié so hadice de Hassan à plusieurs reprises dans so livre de hadice ki reconnaite par Jami At-Tirmizi ki forme parmi dans Siha Sittah (six livres authentiques dans hadice).

D’après banne renseignements pli détaillé, li paraite ki li ene rawi authentique d’après Imam Ahmed (R) et Imam Malik (R). Mais selon la majorité, li pas ça authentique-là ki permette li supporte ene thèse li tout seul. Acoze ça li pas faire poids quand li rapporte quelque chose isolée. Si Imam Tirmizi fine qualifié so hadice de Hassan, c’est acoze ki li appuyé par lezot hadice ou bien acoze li pas contesté par lezot dans ceki li fine rapporté. D’après banne savants, Ibn Lahi’a ti ene narrateur authentique dans commencement. Mais quand so banne livres fine brulé et li fine commence rapporte hadice par cœur, li fine commence faire confusion. Donc banne ki fine tende hadice avec li auparavant, ça li authentique. C’est necque banne hadice ki fine être rapporté après ki so banne livres ti brulé ki zotte dans balance. Abdullah Bin Mubaarak et Ibn Wahab zotte fine rapporte hadice avec li avant ki so banne livres ti brulé. Etant donné ki ça hadice-là li rapporté par Ibn Wahab aussi de Ibn Lahi’a, d’après principe li bizin authentique. Après tous les pours et les contres, au moins ça hadice-là li capave bénéficié le rang de ene hadice Hassan.

La pratique de Hazrat Abou Hourairah ‎(Radiyallahou anhou‎)‎

"عن نافع مولى عبد الله بن عمر انه قال شهدت الاضحى والفطر مع ابى هريرة فكبر فى الركعة الاولى سبع تكيرات قبل القراءة وفى الآخرة خمس تكبيرات قبل القراءة" (موطا الامام مالك)

Traduction:

L΄esclave Hazrat Abdullah Bin Umar ‎(Radiyallahou anhou‎)‎ (nommé) Nafi (R) dire: « Mo ti assisté Namaz Baqr Eid et namaz Eid ensemble avec Hazrat Abou Hourairah ‎(Radiyallahou anhou‎)‎. Alors li fine faire 7 takbeer dans premier rakaat avant Qiraat et 5 takbeer dans deuxième rakaat avant qiraat." (Mou’atta Imam Malik)

Position hadice et explication:

Sanad de ça récit-là li ene sanad bien authentique. Imam Malik (R), Imam Shafi (R) et Imam Ahmad Bin Hambal R) fine base zotte lors banne récits semblable pou dire ki ena 12 takbeer supplementaire dans namaz Eid et Bakr Eid. Nou capave déduire aisément à la lumière de banne hadices de Nabi ‎(Sallallaahou A'laihi Wasallam)‎‎‎‎ et banne pratique de banne Sahaba-e-Kiraam ki fine rapporté lors ça sujet-là ki namaz Eid et Bakr Eid avec 12 takbeer supplémentaire li ene pratique ki basé lors banne preuves authentiques.

L’etude banne hadices concernant 6 takbeeraat supplementaire dans namaz Eid et Baqr Eid

"عن مكحول قال اخبرنى ابو عائشة جليس لابى هريرة ان سعيد بن العاص سئل ابا موسى الاشعرى وحذيفة بن اليمان كيف كان رسول الله صلى الله عليه وسلم يكبر فى الاضحى والفطر فقال ابو موسى كان يكبر اربعا تكبيره على الجنائز فقال حذيفة صدق فقال ابو موسى كذلك كنت اكبر فى البصرة حيث كنت عليهم قال ابو عائشة وانا حاضر سعيد بن العاص" (ابو داؤد)

Traduction:

Makhoul rapporté ki Abou Aisha ki ti ene compagnon de Hazrat Abou Hourairah ‎(Radiyallahou anhou‎)‎, fine informe moi ki Said Bin Al-Aas ‎(Radiyallahou anhou‎)‎ fine dimane Hazrat Abou Moussa Al-Ash’ari ‎(Radiyallahou anhou‎)‎ et Hazrat Houzaifah Al-Yaman ‎(Radiyallahou anhou‎)‎ à propos la façon ki Rassouloullah ‎(Sallallaahou A'laihi Wasallam)‎‎‎‎ ti pé faire takbeer dans namaz Baqr Eid et namaz Eid-ul-Fitr. Alors Hazrat Abou Moussa Al-Ash’ari ‎(Radiyallahou anhou‎)‎ fine repone ki Nabi ‎(Sallallaahou A'laihi Wasallam)‎‎‎‎ ti pé faire 4 rakaat pareil couma so takbeer ki li ti pé faire dans namaz janaaza. Lors ça Hazrat Houzaifah ‎(Radiyallahou anhou‎)‎ fine dire ki li fine bien dire. Après ça Hazrat Abou Moussa ‎(Radiyallahou anhou‎)‎ fine faire ressortir:

"Dans ça même façon mo ti pé faire takbeer quand mo ti gouverneur dans Basra. » Abou Aisha dire: « Mo ti présent cotte Said Bin Al-Aas ‎(Radiyallahou anhou‎)‎ (quand ça banne conversations-là ti déroulé)." (Abou Dawood)

Position hadice:

Ena 2 rawis dans sanad ça hadice-là en l’occurrence Abdurrahmaan Bin Thaubaan et Abou Aisha ki fine être critiqué par banne savants de hadice. Ça banne critiques-là laisse paraite ki ça hadice-là li pas authentique. Mais ena banne ‘Oulama ki fine repone ça banne critiques-là. Selon ene certaine l’opinion, Imam Ahmad et Yahya Bin Ma-ine fine qualifié Abdurrahmaan Bin Thaubaan de ene rawi faible. Mais d’après ceki Az-Zahabi fine rapporte dans so Meezaanul-Itidaal, le même Yahya Bin Ma-ine fine qualifié li de ene rawi passable. Ça montré ki ena 2 l’opinion contradictoire de la part de Yahya Bin Ma-ine concernant le rawi Abdurrahmaan Bin Thaubaan. Quant à banne savants de hadice couma Ali Bin Al-Madeeni, Usmaan Ad-Darimi, Abou Hatim, et Yaqoub Bin Shaibah, zotte tous fine qualifié li de authentique.

Imam Boukhari aussi fine rapporte hadice par li dans so الادب المفرد (Al-Adab Al-Moufrad). Imam Abou Dawood fine accepté li comme ene rawi correcte. Imam Tirmizi fine qualifié ene hadice rapporté par li de ene hadice Hassan dans so Jami At-Tirmizi. Ene rawi pareil au moins li bizin bénéficié le rang de ene rawi controversable ki d’après principe li acceptable et hadice rapporté par li, li ene hadice hassan ki çapave servi comme ene preuve.

Ene deuxième reproche ena concernant Abou Aisha. Ena pretanne ki Abou Aisha li ene rawi مجهول (inconnu). Mais d’après le تهذيب التهذيب de Allaamah Bin Hajar (R), ena deux rawi nommé Makhoul et Khalid Bin Ma’daan ki fine rapporte hadice avec Abou Aisha. D’après principe établi chez banne savants de hadice, ene rawi ki deux narrateurs authentiques rapporte hadice avec li, li nepli reste مجهول (inconnu). Etant donné ki banne critiques ki fine faire zotte pas fondé, ça hadice-là li ene hadice authentique. Li bon conné ki Imam Abou Dawood et Al Mounziri pas fine faire aukene remarque lors ça hadice-là. Ça li ene indication ki d’après zotte ça hadice-là li ene hadice authentique.

Explication :

Les 4 takbeer couma dans namaz janaza signifié 4 takbeer dans chaque rakaat. Ça 4 takbeer-là li inclu takbeer tahreemah dans premier rakaat et le takbeer pou alle dans roukou dans 2eme rakaat. Et pou Allaamah Tahawi, les 4 takbeer dans premier rakaat li comprend 3 takbeer supplémentaires et le takbeer pou alle dans roukou.

Dans certain récit ena mention de 9 takbeer. Ça signifié 5 takbeer dans premier rakaat et 4 takbeer dans 2eme rakaat. Les 5 takbeer dans premier rakaat li comprend le takbeer tahreemah + 3 takbeer supplémentaires + takbeer pou alle dans roukou. Et les 4 takbeer dans 2eme rakaat li comprend 3 rakaat supplémentaires + le takbeer pou alle dans roukou.

Faudré pas prend ça comme ene contradiction parceki contradiction c’est quelque chose ki pas capave réconcilié. Tanque ena réconciliation, pas capave ena contradiction. Ça explication ki fine donné pou explique les différent versions, li basé lors banne récit pli détaillé ki nou pou gagne l’occasion étudié plus devant.

Hadice de Al-Qasim (Ra)

الوضين بن عطاء (قال) ان القاسم ابا عبد الرحمن حدثه قال حدثنى بعض اصحاب رسول الله صلى الله عليه وسلم قال صلى بنا النبى صلى الله عليه وسلم يوم عيد فكبر اربعا واربعا ثم اقبل علينا بوجهه حين انصرف فقال لا تنسوا كتكبير الجنائز واشار باصابعه وقبض ابهامه / (شرح معانى الآثار)

Traduction:

Al-Wadween Bin ‘Ata rapporté ki Al-Qaasim Abou Abdurrahmaan fine informe li ki ene des banne sahaba de Rassouloullah ‎(Sallallaahou A'laihi Wasallam)‎‎‎‎ fine raconte li:

«Nabi ‎(Sallallaahou A'laihi Wasallam)‎‎‎‎ fine faire nou faire namaz jour Eid. Alors li fine faire 4-4 takbeer. Ensuite quand li fine terminé li fine viré, li fine guette nou et li fine dire: « Pas blié li pareil couma takbeer dans namaz janaza. Li fine faire signe avec so le doigts (dans le but pou démontré le nombre de 4) et li fine ploye so pouce (quand li fine démontré ça). » (Sharh Ma-anil Athaar)

Position hadice:

Après avoir cite ça hadice-là Allaamah Abou Jafar At-Tahawi (239H-321H) fine faire la remarque suivante:

"فهذا حديث حسن الاسناد وعبد الله بن يوسف ويحيى بن حمزة والوضين والقاسم كلهم اهل رواية معروفون بصحة الرواية" (شرح معانى الآثار)

« Ça c’est ene hadice ki so sanad li bon. (Banne narrateurs ki trouve dans so sanad couma) Abdoullah Bin Yousouf, Yahyah Bin Hamzah, Al-Wadween et Al-Qaasim, zotte tous zotte banne narrateurs bien renommé pou (zotte) l’authenticité dans rapporte hadice. » (Sharh Ma-anil Athaar)

Explication:

En sus de so l’authenticité, ça hadice-là li bien claire de par so sens ki pas laisse aukene doute ni kit confusion. C’est parceki dans ça hadice-là, Nabi ‎(Sallallaahou A'laihi Wasallam)‎‎‎‎ fine attire l’attention banne Sahaba-e-Kiraam lors le nombre supplémentaire de takbeer à 3 niveaux:

D’abord li fine faire li en pratique.
Deuxièmement li fine confirme ça avec ene déclaration verbale.
Et finalement li fine mette l’emphase par ene démonstration avec so banne les doigts ki démontré le nombre de quatre dans ene façon net et clair.

Li vrai ki banne hadice ki prouve douze takbeer supplementaire zotte authentique. Coumsa meme banne hadice ki prouve six takbeer supplementaire aussi zotte authentique. Mais le fait ki Nabi ‎(Sallallaahou A'laihi Wasallam)‎‎‎‎ fine mette l’emphase lors le nombre de six takbeer supplementaire à trois niveaux donne preference à ça deuxieme pratique-là. Sinon Nabi ‎(Sallallaahou A'laihi Wasallam)‎‎‎‎ so declaration verbale et so demonstration par signe le doigt pas pou ena so raison d’etre.

Consensus de banne Sahaba-E-Kiram dans le règne de Hazrat ‘Oumar ‎(Radiyallahou anhou‎)‎

عن ابراهيم قال قبض رسول الله صلى الله عليه وسلم والناس مختلفون فى التكبير على الجنائز لا تشاء ان تسمع رجلا يقول سمعت رسول الله صلى الله عليه وسلم يكبرسبعا وآخر يقول سمعت رسول الله صلى الله عليه وسلم يكبر خمسا وآخر يقول سمعت رسول الله صلى الله عليه وسلم يكبر اربعا الا سمعته فاختلفوا فى ذلك فكانوا على ذلك حتى قبض ابو بكر فلما ولى عمر وراى اختلاف الناس فى ذلك شق ذلك عليه جدا فارسل الى رجال من اصحاب رسول الله صلى الله عليه وسلم فقال انكم معشر اصحاب رسول الله صلى الله عليه وسلم متى تختلفون على الناس يختلفون من بعدكم ومتى تجتمعون على امر يجتمع الناس عليه فانظروا امرا تجتمعون عليه فكانما ايقظهم فقالوا نعم ما رأيت يا امير المومنين فاشر علينا فقال عمر بل اشيروا انتم على فانما انا بشر مثلكم فتراجعوا الامر بينهم فاجمعوا امرهم على ان يجعلوا التكبير على الجنائز مثل التكبير فى الاضحى والفطر اربع تكبيرات فاجمع امرهم على ذلك" (شرح معانى الآثار)

Traduction:

«Ibraheem (An-Nakh-i) fine rapporté ki Nabi ‎(Sallallaahou A'laihi Wasallam)‎‎‎‎ fine faire wafaat et banne Sahaba zotte ti encore divergé concernant le (nombre) de takbeer dans namaz janaza. Situation ti comme telle ki pena le nombre de takbeer ki ou envi tendé ki ou pas capave tendé. Ou tanne ene dire mo fine tanne Rassouloullah ‎(Sallallaahou A'laihi Wasallam)‎‎‎‎ faire 7 takbeer. L’autre dire mo fine tanne Rassouloullah ‎(Sallallaahou A'laihi Wasallam)‎‎‎‎ faire 5 takbeer. Ene l’autre dire mo fine tanne Rassouloullah ‎(Sallallaahou A'laihi Wasallam)‎‎‎‎ faire 4 takbeer. Alors zotte fine ena divergence lors-là et zotte fine continué ena divergence ziska ki Hazrat Abou Bakr ‎(Radiyallahou anhou‎)‎ fine faire wafaat. Quand Hazrat ‘Oumar ‎(Radiyallahou anhou‎)‎ fine vine khaleefah et fine trouve divergence de banne Sahaba concernant ça sujet-là, ça fine inquiète li boucou. Li fine faire appelle banne Sahaba-e-Kiraam de Rassouloullah ‎(Sallallaahou A'laihi Wasallam)‎‎‎‎ et fine dire zotte: « C’est zotte ki jamaate de Sahaba de Rassouloullah ‎(Sallallaahou A'laihi Wasallam)‎‎‎‎. Quand zotte pou donne différent l’opinion divant banne dimoune, banne-là aussi (à zotte tour) pou ena divergence après zotte. Et si zotte réuni lors ene seul kikchose, banne dimoune là-aussi zotte pou rassemblé lors ça. Alors guette ene point commun ki zotte capave tombe d’accord lors la. » (Quand Hazrat ‘Oumar ‎(Radiyallahou anhou‎)‎ fine mette ça devant banne Sahaba-e-Kiraam) Couma dire li fine réveille zotte. Alors zotte fine dire: « C’est ene très bon l’idée O Ameer-Ul-Moumineen (le chef de banne musulmans). Conseille nou (ceki ou trouve bon). » Hazrat ‘Oumar ‎(Radiyallahou anhou‎)‎ fine repone: « Plitôt zotte même conseille moi parceki mo aussi mo pas plis ki ene humain couma zotte même. » Alors banne-là fine concerté entre zotte même et (finalement) zotte fine tombe d’accord pou faire le (nombre de) takbeer dans namaz janaaza pareille couma le (nombre de) takbeer ki ena dans namaz Baqr Eid et namaz Eid. C'est-à-dire 4 takbeer. Alors Hazrat ‘Oumar ‎(Radiyallahou anhou‎)‎ fine faire zotte tombe d’accord lors ça même (décision). »

Position hadice:

Ibraheem An-Nakh-i pé rapporte ça de Hazrat ‘Oumar ‎(Radiyallahou anhou‎)‎ ki li pas fine zoine. Ça faire ça récit-là vine ene récit “Mounqati”. C'est-à-dire ene récit ki dans so sanad ena rupture entre 2 rawi. Mais ene rupture ki trouve entre Ibraheem An-Nakh-i et banne Sahaba-e-Kiraam couma Hazrat ‘Oumar ‎(Radiyallahou anhou‎)‎, Hazrat Ali ‎(Radiyallahou anhou‎)‎ et Hazrat Abdullah Bin Mas’oud ‎(Radiyallahou anhou‎)‎ li tolérable d’après banne savants de hadice. D’ailleurs d’après ceki fine rapporté dans عقود الجواهر (ouqoudul-jawahir) de Allaamah Az-Zubaidi, Ibraheem An-Nakhi fine tanne ça récit-là à travers plusieurs personnes, de Hazrat ‘Oumar ‎(Radiyallahou anhou‎)‎. D’après l’ordre, li fine bizin tanne ça par banne célèbre narrateurs couma Alqamah et Al-Aswad etc. parceki zotte ti parmi banne ki ti reste régulièrement dans la compagnie de Hazrat ‘Oumar ‎(Radiyallahou anhou‎)‎. Donc ça récit-là li ene récit acceptable et valable ki satisfaire banne critères pou être considéré comme authentique.

Explication:

D’après le sounan de Al Baihaqui ça réunion-là ti faire dans la caze Hazrat Abou Mas’oud Al-Ansaari ‎(Radiyallahou anhou‎)‎. Hazrat ‘Oumar ‎(Radiyallahou anhou‎)‎ ti réuni banne Sahaba-e-Kiraam zisse pou fixé le nombre de takbeer dans namaz janaza. Après discussion et concertation, zotte fine tombe d’accord lors 4 takbeer. Pou zotte vine lors ça décision-là, entre autre, zotte fine servi le nombre de takbeer ki ena dans namaz Eid et Baqr Eid comme repère et référence. Ça montré ki le nombre de 4 takbeer dans chaque rakaat de namaz Eid ti ene zaffaire bien commun et normal pou banne Sahaba-e-Kiraam. C’est ça même ki fine faire zotte prend li comme ene référence pou fixé le nombre de takbeer dans namaz janaza.

Hadice Hazrat Umar ‎(Radiyallahou anhou‎)‎

عن سعيد بن المسيب قال قال عمر بن الخطاب رضى الله عنه كبرنا مع رسول الله صلى الله عليه وسلم اربعا قال فامر عمر باربع يعنى تكبير العيدين والجنائز" (مسند ابى محمد عبد الله بن يعقوب الحارثى)

Traduction:

Said Bin Al-Mousayyad (R) fine rapporté ki Hazrat ‘Umar ‎(Radiyallahou anhou‎)‎ fine dire: « Nou fine faire 4 takbeer ensam avec Rassouloullah ‎(Sallallaahou A'laihi Wasallam)‎‎‎‎. Said Bin Al-Mousayyad (R) dire: Alors Hazrat Umar ‎(Radiyallahou anhou‎)‎ fine donne l’ordre pou faire 4 takbeer c'est-à-dire dans namaz de tous les deux Eid (Eid-ul-Fitr et Eid-ul-Adha) et namaz janaza. (Mousnad Abou Mohammad Abdullah Bin Yaqoub Al-Harithi)

Explication:

Ça hadice-là li confirme le fait ki Nabi ‎(Sallallaahou A'laihi Wasallam)‎‎‎‎ ti faire 4 takbeer dans namaz Eid. Sa 4 takbeer-là c’est le nombre de ene rakaat. Là-dans ena les 3 takbeer supplémentaires, et ça ene takbeer-là c’est le takbeer normal c'est-à-dire le takbeer tahreemah dans premier rakaat et le takbeer pou alle dans roukou’ dans deuxième rakaat. Si Hazrat Umar ‎(Radiyallahou anhou‎)‎ fine donne l’ordre pour faire ça même quantité takbeer, c’est acoze ki li reconnaite ça comme ene pratique de Nabi ‎(Sallallaahou A'laihi Wasallam)‎‎‎‎. Ça façon faire namaz Eid ti tellement normal pou banne Sahaba-e-Kiraam dans l’époque Hazrat Umar ‎(Radiyallahou anhou‎)‎ ki zotte fine prend ça même pratique comme ene référence et ene base pou fixé le nombre de takbeer dans namaz janaazah.

D’après le Mouswannaf Bin Abou Shaibah, Said Bin Al-Mousayyab ti pé faire 9 takbeer. Ça 9 takbeer-là c’est le total de banne takbeer normal et banne takbeer supplémentaire. C'est-à-dire trois takbeer supplémentaires + le takbeer tahreemah et le takbeer pou alle dans roukou’ dans premier rakaat. Dans deuxième rakaat nou ena les 3 takbeer supplémentaires + le takbeer pou alle dans roukou’. Au total li faire 9 takbeer.

La pratique de Said Bin Al-Mousayyab li renforci le bien fondé de ceki li fine rapporté de Hazrat Umar ‎(Radiyallahou anhou‎)‎.

Hadice Hazrat Abdullah Bin Mas΄oud ‎(Radiyallahou anhou‎)‎

"عن ابن مسعود رضى الله عنه كان رسول الله صلى الله عليه وسلم يكبر فى الفطر والاضحى اربعا تكبيره على الجنائز" (عقود الجواهر)

Traduction:

«Hazrat Abdullah Bin Mas΄oud ‎(Radiyallahou anhou‎)‎ rapporté ki Rassouloullah ‎(Sallallaahou A'laihi Wasallam)‎‎‎‎ ti pé faire 4 takbeer (dans chaque rakaat) namaz Eid et Baqr Eid pareille couma so façon takbeer ki li ti pé faire dans namaz janaazah.» (Uqoudul-Jawahir)

Position hadice et explication:

Ça hadice-là li ene hadice authentique. Et tout banne ki fine rapporte la pratique de Hazrat Abdullah Bin Mas’oud ‎(Radiyallahou anhou‎)‎, zotte fine rapporte li dans ça même façon. Selon ene récit ki trouve dans le Mouswannaf Abdurrazaaq, Hazrat Al-Qamah (R) et Hazrat Al-Aswad (R) dire:

ان ابن مسعود رضى الله عنه كان يكبر فى العيدين تسعا اربعا قبل القراءة ثم يكبر فيركع وفى التانية يقرأ فاذا فرغ كبر اربعا ثم يركع (مصنف عبد الرزاق)

Traduction :

«Hazrat Abdullah Bin Mas’oud ‎(Radiyallahou anhou‎)‎ ti pé faire 9 takbeer (au total dans les deux rakaat) namaz Eid et Baqr Eid. C'est-à-dire 4 takbeer (takbeer tahreemah + 3 takbeer supplémentaires) avec Qiraat. Ensuite li ti pé faire takbeer et li ti pé alle dans roukou’. Et dans deuxième rakaat, d’abord li ti pé faire qiraat. Quand li fini faire qiraat, li ti pé faire 4 takbeer (3 takbeer supplémentaires et 1 takbeer pou alle dans roukou’) et li ti pé faire roukou’.» (Mouswannaf Abdurrazzaaq)

Selon banne hadices et banne récits authentiques, nou ena banne Sahaba-e-Kiraam couma Hazrat Abou Moussa Al-Ash’ari ‎(Radiyallahou anhou‎)‎, Hazrat Houzaifah ‎(Radiyallahou anhou‎)‎ et Hazrat Said Bin Al-Aas ‎(Radiyallahou anhou‎)‎ aussi fine faire aligne zotte avec Hazrat Abdullah Bin Mas’oud ‎(Radiyallahou anhou‎)‎. A la base de ça, banne ‘Oulama fine conclure ki namaz Eid avec 6 takbeer supplémentaires couma ça li rapporté et enseigné par Hazrat Abdullah Bin Mas’oud ‎(Radiyallahou anhou‎)‎, li faire pli boucou poids. Et surtout quand Nabi ‎(Sallallaahou A'laihi Wasallam)‎‎‎‎ fine mette l’emphase lors ça nombre là ki li pas fine faire li lors le nombre de 12 takbeer.

La pratique Hazrat Jabir ‎(Radiyallahou anhou‎)‎

"عن جابر بن عبد الله وسعيد بن المسيب قالا تسع تكبيرات ويوالى بين القراءتين" (مصنف ابن ابى شيبة)

Traduction:

Rapporté de Hazrat Jabir Bin Abdullah ‎(Radiyallahou anhou‎)‎ et Hazrat Said Bin Al-Mousayyeb (R) ki zotte fine dire ki ena 9 takbeer (en tout dans namaz Eid et Baqr Eid). Et li bizin faire tous les deux récitations de Qour’aan ene après l’autre sans interruption (par banne takbeer supplémentaire). (Mouswannaf Ibn Abou Shaibah)

Explication:

Les 9 takbeer représente le takbeer tahreemah + 3 takbeer supplémentaire + le takbeer pou ale dans roukou’ dans le premier rakaat. Et les trois takbeer supplémentaire + le takbeer pou alle dans roukou’ dans le 2eme rakaat.

Ça explication-là fine donné et fine élaboré dans ene récit rapporté par Al-Aswad ki trouve dans le Mouswannaf Abdurrazzaaq:

ان ابن مسعود كان يكبر فى العيدين تسعا تسعا اربعا قبل القراءة ثم كبر فركع وفى الثانية يقرأ فاذا فرغ كبر اربعا ثم ركع (مصنف عبد الرزاق)

Traduction:

(Hazrat Abdullah) Bin Mas’oud ‎(Radiyallahou anhou‎)‎ ti pé faire 9-9 takbeer dans chakene de namaz Eid et Baqr Eid. (C'est-à-dire) li ti pé faire 4 takbeer avant Qiraat. Ensuite li ti pé faire roukou. Et dans deuxième rakaat, d’abord li ti pé faire Qiraat. Quand li ti pé termine (qiraat) li ti pé faire 4 takbeer et li ti pé faire roukou. (Mouswannaf Abdurrazzaaq)

Dans ene l’autre récit rapporté par Al-Aswad (R) même et ki trouve dans le Mouswannaf Abdurrazzaaq, ça explication-là li ene ti pé pli clair:

عن ابن مسعود فى الاولى خمس بتكبيرة الركعة وبتكبيرة الاستفتاح وفى الركعة الاخرى اربعة بتكبيرة الركعة" (مصنف عبد الرزاق)

Fine rapporté de (Hazrat Abdullah) Bin Mas’oud ‎(Radiyallahou anhou‎)‎ ki dans premier rakaat ena 5 takbeer ki inclure le takbeer pou alle dans roukou’ et le takbeer quand commence namaz (takbeer tahreemah). Et dans deuxième rakaat ena 4 takbeer ki inclure le takbeer pou alle dans roukou’. (Mouswannaf Abdurrazzaaq)

Note :

Faire tous les deux qiraat ene après l’autre veut dire pas interrompe li par banne takbeer supplémentaires. C'est-à-dire dans premier rakaat d’abord pou faire banne takbeer supplementaires et après ça pou faire récitation Qour’aan. Et dans deuxième rakaat pou faire récitation Qour’aan d’abord et ensuite pou faire banne takbeer supplémentaire avant alle dan roukou’. Donc dans premier rakaat takbeer supplementaire pou avant récitation Qour’aan et dans deuxième rakaat takbeer supplémentaires pou vine après récitation Qour’aan.

La pratique Hazrat Abdullah Bin Abbaas ‎(Radiyallahou anhou‎)‎

عن عبد الله بن الحارث قال صلى بنا ابن عباس يوم عيد فكبر تسع تكبيرات خمسا فى الاولى واربعا فى الآخرة ووالى بين القراءتين" (مصنف ابن ابى شيبة)

Traduction :

« Abdullah Bin Al-Haarith dire : (Hazrat Abdullah) Bin Abbaas ‎‎(Radiyallahou anhou‎)‎‎ fine faire nou faire namaz jour Eid. Alors li fine faire 9 takbeer (en tout). 5 dans premier rakaat et 4 dans deuxième rakaat. Et li fine faire tous les deux Qiraat ene après l’autre. » (Mouswannaf Ibn Shaibah)

Position hadice:

C’est ene récit ki fine qualifié de authentique par Imaam Al-Baihaqui, Allaamah Bin Hajar Al-Asqalaani et Allaamah Bin Hazm.

Explication :

Les 5 takbeer dans premier rakaat li représente le takbeer tahreemah, les 3 takbeer supplémentaire avant récitation Qour’aan et le takbeer pou alle dans roukou’. Et les 4 takbeer dans 2eme rakaat li représente les 3 takbeer supplémentaire après récitation Qour’aan et le takbeer pou alle dans roukou’. Ça montré ki le nombre de takbeer supplémentaire pou tous les deux rakaat c’est six takbeer.

Réconciliation entre différents nombre de takbeer supplémentaires

Mais si ça fine être interprété et exprimé dans différent façon, c’est acoze ki chakene fine guette li dans ene différent l’angle. Ena ki fine compte li ensemble avec banne takbeer normal couma ena ki pas fine inclure li couma ena ki fine supprime takbeer tahreemah parfois. Banne ki fine compte ensemble, fine dire ki ena 9 takbeer en tout (5 dans premier rakaat et 4 dans deuxième rakaat) et banne ki pas fine inclure li fine appelle li 6 takbeer en plis et banne ki fine guette li rakaat par rakaat sans inclure takbeer tahreemah, fine appelle ça 4 takbeer c'est-à-dire dans chaque rakaat.

La version de 12 takbeer par Hazrat Abdullah Bin Abbaas ‎(Radiyallahou anhou‎)‎

Nou ena aussi ene version selon laquelle Hazrat Abdullah Bin Abbaas ‎(Radiyallahou anhou‎)‎ ti pé faire 12 takbeer dans namaz Eid et namaz Baqr Eid. Ça veut dire ki Hazrat Abdullah Bin Abbaas ‎(Radiyallahou anhou‎)‎ ti ena différent façon pratique namaz Eid. Ceki pli intéressant ki les différents récits ki prouve le différent nombre de takbeer pratiqué par Hazrat Abdullah Bin Abbaas ‎(Radiyallahou anhou‎)‎, zotte tous authentique. Ça fine divise banne ‘Oulama dans deux camps. Ene dire ki ou capave pratique le nombre ki ou envi parceki zotte tous authentique. Donc bizin prend les différent nombre à titre égal. Mais la deuxième catégorie de ‘Oulama dire ki bizin analyse les différents nombre de takbeer rapporté par Hazrat Abdullah Bin Abbaas ‎(Radiyallahou anhou‎)‎ à la lumière de ceki fine rapporté par lezot Sahaba-e-Kiraam. Quand nou faire ça l’exercice-là nou trouve le récit de six takbeer supplémentaire ena pli boucou poids parceki ça li confirmé par banne Sahaba-e-Kiraam couma Hazrat ‘Oumar ‎(Radiyallahou anhou‎)‎, Hazrat Abdullah Bin Mas’oud ‎(Radiyallahou anhou‎)‎, Hazrat Moughirah Bin Shou’bah ‎(Radiyallahou anhou‎)‎, Hazrat Huzaifah ‎(Radiyallahou anhou‎)‎ et Hazrat Abou Moussa Al-Ash’ari ‎(Radiyallahou anhou‎)‎. Et d’ailleurs selon ene récit ki trouve dans Sharh Ma-anil Athaar de Allaamah At-Tahaawi, Rassouloullah ‎(Sallallaahou A'laihi Wasallam)‎‎‎‎ ti faire li dans ça façon-là même et ti attire l’attention banne Sahaba-e-Kiraam aussi lors ça même façon. Donc la pratique de Hazrat Abdullah Bin Abbaas ‎(Radiyallahou anhou‎)‎ ki conforme à ça, pou ena priorité lors so pratique ki paraite isolé.

Acoze ça, ça deuxième catégorie-là li autorise la pratique de 12 rakaat supplémentaire mais avec ene préférence pou la pratique de 6 takbeer supplémentaire.

Imaam Mouhammad (R) dire dans so Mou’atta:

"قد اختلف الناس فى التكبير فى العيدين فما اخذت به فهو حسن وافضل ذلك عندنا ما روى عن ابن مسعود"

Traduction :

« Banne dimoune (‘Oulama) fine ena divergence en ceki concerne (le nombre de) takbeer dans namaz Eid et Baqr Eid. Alors ceki to prend là-dans, li bon. Mais meilleur là-dans d’après nou, c’est ceki fine rapporté de (Hazrat Abdullah) Bin Mas’oud ‎(Radiyallahou anhou‎)‎. (C'est-à-dire le nombre de 6 takbeer supplémentaires). »

Takbeeraat supplémentaire dans Eideine

Principalement nou ena deux qualités hadice concernant le nombre de takbeeraat supplémentaire dans namaz Eid et Baqr Eid. D'après ene qualité hadice, ena 12 takbeer en plis et d'après ene l'autre catégorie de hadice, ena 6 takbeer en plis. Ça c'est la raison pou laquelle fine ena divergence entre banne Sahaba-e-Kiraam ziska ene certaine l'époque. D'après ene récit authentique ki trouve dans le Ma-anil Athaar de Allaamah At-Tahaawi, ti ena divergence en ceki concerne le nombre de takbeer dans namaz janaazah. Ça fine continué existé ziska ki Hazrat 'Oumar ‎(Radiyallahou anhou‎)‎ fine réuni banne Sahaba-e-Kiraam pou discute la question. Après consultation avec tous banne Sahaba-e-Kiraam, Hazrat 'Oumar ‎(Radiyallahou anhou‎)‎ fine conclure ki ena 4 takbeer dans namaz janaazah pareil couma ena 4 takbeer dans chaque rakaat de Salaat-ul-Eideine. A noté ki les 4 takbeer dans chaque rakaat signifié 3 takbeer + takbeer tahreemah pou le premier rakaat et 3 takbeer + takbeer pou alle dans roukou' dans deuxième rakaat.

Nou pou remarqué ki Hazrat 'Oumar ‎(Radiyallahou anhou‎)‎ fine prend les takbeeraat de Eideine comme référence et repère pou statué le nombre de takbeer dans namaz janaazah. Ça montré ki Salaat-ul-Eideine avec 3 takbeer en plis dans premier rakaat et 3 takbeer en plis dans deuxième rakaat ti ene pratique tout à fait normal et connu pou banne Sahaba-e-Kiraam dans l'époque de Hazrat 'Oumar ‎(Radiyallahou anhou‎)‎. En plis de ça, li approuvé et appuyé par fatwa de banne Sahaba-e-Kiraam couma Hazrat Abdullah Bin Mas'oud, Hazrat Abou Moussa Ash'ari ‎(Radiyallahou anhou‎)‎ et Hazrat Huzaifah ‎(Radiyallahou anhou‎)‎. C'est ene indication assez clair ki banne Sahaba-e-Kiraam ti unanime lors le nombre de 6 takbeer supplémentaire dans l'époque Hazrat 'Oumar ‎(Radiyallahou anhou‎)‎. Ça li capave être ene de banne raison ki fine amène banne 'Oulama couma Imam Abou Hanifah (R) pou dire ki ena 6 takbeer supplémentaire dans namaz Eid et Baqr Eid.

Li vrai ki ena ene quantité hadice lors 12 takbeer aussi. C'est acoze ça, en principe, Imam Abou Hanifah (R) accepté la pratique de 12 takbeer aussi comme ene pratique valable. Mais si malgré ça, Imam Abou Hanifah fine montré so préférence pou la pratique de 6 takbeer, c'est peut-être acoze ça décision ki Hazrat 'Oumar ‎(Radiyallahou anhou‎)‎ ti prend dans so l'époque en présence banne Sahaba-e-Kiraam. Li paraite ki la question de takbeer dans Eideine fine vine l'objet de divergence entre banne Sahaba-e-Kiraam pendant ene assez longue parcours. La décision de Hazrat 'Oumar ‎(Radiyallahou anhou‎)‎ fine stabilise li lors 6 rakaat supplémentaire dans so règne. Ça li ene point pli fort ki joué en faveur de banne ki pratique 6 takbeer au lieu de 12 takbeer.

Mais en principe, quand ene certaine pratique ki correct li en vigueur dans ene certaine l'endroit depi longtemps, bizin laisse li continué. Faudré pas essaye pou change li par ene l'autre pratique ki supposément meilleur. C'est-à-dire cote fine pratique 12 takbeer de tout le temps, bizin laisse li continué. Coumsa même cote fine pratique 6 takbeer de tout le temps, bizin pas change li. Ça c'est le système et la ligne de conduite ki Rassouloullah ‎(Sallallaahou A'laihi Wasallam)‎‎‎‎ fine enseigne nou et ki le Salaf fine toujours maintenir. Essaye pou change ene pratique correcte et ki basé lors preuve de shariat par ene l'autre, c'est ene genre de déviation et li vine par manque de maturité dans domaine de da'wah. C'est avec amertume et grand regret ki nou constaté ki actuellement l'Oummah pé subir ça genre de déviation-là avec complicité banne prédicateurs ki peut-être sincère mais ki manque la sagesse dans domaine de da'wah.

Préparé par M.R.Meerun