Nou Nabi ‎(Sallallaahou A'laihi Wasallam)‎

Nou Nabi Hazrat Mouhammad ‎(Sallallaahou A'laihi Wasallam)‎ li le dernier Nabi. Pena kikene ki pou gagne Noubouwwat (prophétie) après li. Tout ceki déclare li Nabi après nou Nabi ‎(Sallallaahou A'laihi Wasallam)‎, li ene menteur. Tout ceki accepté kikene Nabi après nou Nabi ‎(Sallallaahou A'laihi Wasallam)‎, li sorti en dehors l’Islam. Li pas ene musulman quand même combien li capave paraite bon et gentil.

Hazrat Mouhammad ‎(Sallallaahou A'laihi Wasallam)‎ li Nabi pou entier l’humanité. So message c’est le dernier message divin ki concerne entier l’humanité ziska Qiyaamat.

Nou Nabi Hazrat Mouhammad ‎(Sallallaahou A'laihi Wasallam)‎ li pli grand Nabi et li même pli bon insan. Allah Ta’ala fine envoye li comme ene model parfait. Ene model ki bizin suive. C’est ene model indispensable pou la réussite réelle et éternelle. Pena narien apart déviation et l’égarement dans quitte so sounnat. Le bien être li ene kitchose impensable et impossible sans suive so sounnat. Ça la vie lors dounia-là li couma ene dessin ki gagne so vrai couleur quand vive li dans l’obéissance Allah Ta’ala. L’obéissance à Allah Ta’ala li pas réalisable sans suive le moubaarak tareeqah de Nabi ‎(Sallallaahou A'laihi Wasallam)‎.

Malgré tout ça-là si le monde en général fine échoué pou comprend ça grande personnalité-là c’est acoze banne musulmans même. Nou coupable et dans ene certaine sens nou complice dans l’attitude négatif ki dimoune pé adopté à nou Nabi ‎(Sallallaahou A'laihi Wasallam)‎. Si musulman ti suive nou Nabi ‎(Sallallaahou A'laihi Wasallam)‎ dans tous banne domaines et aspects de la vie, le monde ti pou gagne l’occasion découvert banne merveilles de ça message divin-là et la personnalité charismatique de nou Nabi ‎(Sallallaahou A'laihi Wasallam)‎. Nou fine laisse ça banne perles précieux-là reste cachiette dans banne pages de l’histoire et ceki nou fine faire et la manière ki nou fine comporte nou au nom de l’Islam li totalement erroné. Ça fine donne banne ki pas conné ene fausse l’image de Deen.

Dimoune ti bizin fini gagne ene l’idée de ceki nou Nabi ‎(Sallallaahou A'laihi Wasallam)‎ capave été par necque guette nou même. Mais malheureusement nou fine échoué dans assume nou responsabilité de ene bon ambassadeur de l’Islam. Nou pas fine faire narien plis ki gatte l’image de l’Islam. De ce fait nou fine commette ene grand l’injustice envers l’humanité par laisse Nabi ‎(Sallallaahou A'laihi Wasallam)‎ so tareeqah et so sounnat dissimulé. Par exemple nou pas trouve narien islamique dans mariage apart ça nikah ki Imam célébré. Là-dans aussi nou trouve calcule-là fine faussé par banne additions et substractions inutile. Finalement li vine difficile pou distingue ceki vrai de la fausseté. Par nou négligence dans pratique sounnat de Nabi ‎(Sallallaahou A'laihi Wasallam)‎ dans nou la vie, nou fine donne banne musulmans en particulier et le public en général ene fausse image de Deen. Et ça Deen maquillé-là fine prend place ça l’origine-là couma du lait dans boite fine remplace du lait naturel à tel point ki la nouvelle génération lève néné avec ça du lait naturel-là.

Ene kitchose bien important ki nou tous bizin conné ki d’abord nou nécessaire établir la prophétie de ça personnage pli distingué-là. Et ça pou établi par banne miracles ki li fine montré et ki prouvé dans ene façon bien authentique. Ene fois ki ça fine établi, nou pas pou ena aukene choix apart accepté tout ceki li fine dire, faire et approuvé si li établi de ene source digne de foi.

Ici nou bizin faire ressortir ki en général nou évalué personnalité ene dimoune par so comportement et par ceki li dire parceki c’est action ene dimoune ki définir so personnalité et so identité. En ceki concerne ene Nabi, le procédure li à l’inverse. C'est-à-dire nou pas juge le Nabi par so action parceki tout ceki ene Nabi faire, li bizin bon. Ene action li justifié par le fait ki Nabi fine faire li. Donc nou pas capave dire par exemple ki si li ti ene Nabi, li pas ti pou faire coumsa. Au contraire, nou bizin dire si Nabi fine faire ça, alors li bizin bon. Si nou comprend ça principe-là, tout banne objections ki capave vine dans la tète, pou élucidé automatiquement. C'est-à-dire pas capave ena objection lors ceki ene personne fine faire si fine arrivé établir ki la personne en question li ene Nabi. Nou bizin rejette nou perception, conception et nou l’expérience lors la base de ceki ene Nabi dire. Si li dire la nuit, nou bizin accepté li la nuit quand même nou trouve nou dans ene grand lizour. Tout ça-là acoze ki ene Nabi li guidé par Allah Ta’ala dans tout ceki li dire. Donc tout ceki nou Nabi ‎(Sallallaahou A'laihi Wasallam)‎ fine dire, fine faire et fine approuvé, li bon et justifié par le fait ki li ene Nabi. Pas capave mette en question ceki li fine dire ou ceki li fine faire.

[Extrait de Al Jamiat Vol.7 No.13]