Fort et faible

A force de la force physique ki ene dimoune possédé, faire li gagne l’impression ki li même ki tout. Aveuglé par so la force, li échoué pou trouve ceki ena à l’autre coté de so la force. Li pas conné ki tout fort ena ene ki pli fort ki li. Ene fort ki pena pli fort ki li c’est Allah Ta’ala. Apart Allah Ta’ala, nou tou faible. 

Ene simple ti kitchose suffit pou jette nou enba. Parfois acoze ene ti blessure, ene dimoune bizin alle faire coupe so lipied couma parfois li alle perdi la vie même. Li capave déclare li fort mais li pas capave résisté conte ene ti virus ki capave donne li tout qualité complications. Athlète, barbellis ou n’importe ki ou capave été, ou vine impuissant divant banne microbes invisible et indétectable. Donc li bête pou nou prend nou pou fort. C’est ça même l’impression ki faire nou faire dominere lors banne ki nou considère zotte faible. Nou pas pensé ki ena pli fort ki nou ki capave agir avec nou pareil couma nou pé agir avec banne ki faible. Donc faudré pas nou faire dominere. Ene dimoune ki faire dominere, li pas gagne la prospérité. Li pou bizin cogné quelque part. Et ça pou bien pénible pou li. Ça li applique pou tous banne ki ena l’autorité. Prend depi so dirigeant ene l’état ziska so dernier berger, tous vine là-dans. Chakene ena ene prix à payé. Question pou sappé-là pas posé même.

Ene ki faible li capave vine fort si li gagne soutien de ene ki fort. Celui ki fine bénéficié soutien de la part de Allah Ta’ala li vine fort. Ça soutien-là nou gagne li par reste loyal et fidele à Allah Ta’ala. Loyauté et fidélité à Allah Ta’ala li trouve dans suive so Deen en observant le Moubaarak Tareeqah de nou bien-aimé Nabi ‎(Sallallaahou A'laihi Wasallam)‎.

Banne ki oulé nuire à banne ki vraiment Deendaar, zotte bizin calcule bien avant zotte exécute ceki zotte fine pensé. Zotte bizin revoir zotte décision et zotte plan. Parceki en réalité zotte pé gagne zaffaire avec Allah Ta’ala. Allah Ta’ala fine promette pou aide banne Deendaar. Banne ki envi nuire à banne Deendaar, en réalité zotte pé tappe zotte la tète avec ene gros roche. La tète pou crasé mais roche-là pou reste intacte.

[Extrait de Al Jamiat Vol.7 No.14]