Riba

Hazrat Abdullah Bin Hanzalah ‎(Radiyallahou anhou‎)‎‎ rapporté ki Rassoulullah ‎(Sallallaahou A'laihi Wasallam)‎ fine dire : « Ene dirham (pièce d’argent) de Riba (l’intérêt) ki ene dimoune consommé dans ene l’état ki li au courant (de ça), ça li pli grave ki commette 36 fois zina (adultère). » (Musnad Ahmad/Darqutni)

Ene dimoune ki faire péché avec connaissance, ça li bien grave. Et ça hadice-là pé faire référence à ene péché ki fine commette avec connaissance.

Mais si ene dimoune fine faire li par négligence aussi, so gravité li pas moins. Parceki li fine arrivé faire li acoze ki li pas fine prend compte. Similairement ene dimoune ki pas fine faire aukene zeffort pou conné et apprane aussi li pou coupable divant Allah Ta’ala. Boucou parmi nou croire ki plitot zotte pas conné même pou zotte capave ena ene prétexte et ene chemin sorti. Mais c’est ene erreur ki nou faire. Ça li pas sufi pou épargne nou de gravité ene péché.

Fine considère ça péché-là pli grave ki adultère acoze ki transaction l’intérêt li représente déclare la guerre avec Allah Ta’ala. Donc so gravité li évidente. Mais en même temps nou bizin conné ki sanction zina dans dounia li pli grave. So punition pou ene célibataire li 100 coup fouette. Mais faudré pas nou minimise gravité de zina. En li même li bien bien grave mais l’intérêt li encore pli grave ki zina dans certaine aspect. Donc à aukene moment nou bizin pas servi ça comparaison-là pou tombe dans la bassesse de zina. Au contraire nou bizin servi ça comparaison-là pou saisir la gravité de riba. Nabi ‎(Sallallaahou A'laihi Wasallam)‎ fine amène ça comparaison-là pou donne ene l’idée pli claire de la gravité de Riba. Donc li fine compare li avec zina ki so gravité li ene gravité visible et tangible.

Riba so niveau de bassesse li évident par le fait ki selon ene hadice rapporté par Hazrat Abou Hurairah ‎(Radiyallahou anhou‎)‎‎, Rassoulullah ‎(Sallallaahou A'laihi Wasallam)‎ fine dire : « Riba ena 70 degré. So degré pli moins grave li couma dire ene dimoune alle dans ménage avec so mama. »

Ça donne nou ene l’idée de ceki so degré pli grave capave été. Imagine ene coup so 70eme degré-là couma li pou été si so pli moins-là même li difficile pou tendé.

Prête Rs 100 et réclame pou rembourse Rs 110. Ça nou tous conné ki li l’intérêt. Ena certaine kitchose ki nou prend li pou normal et simple mais pourtant li l’intérêt. Exige ene service de la part ene ki ou fine prête li la monnaie, ça aussi d’après shariah li compte dans l’intérêt. Par exemple ou fine prête ene commerçant ene la monnaie. Aster ou atane pou gagne ene concession impé de trop pou banne marchandises ki ou acheté cote li. Et ça concession-là ou pas ti habitué gagné auparavant. Donc d’après Shariah, en réalité c’est ene l’intérêt ki ou pé envi gagné. Donc tout l’avantage ou service ki ou envi gagné par prête kikene ene la monnaie c’est Riba (l’intérêt).

[Extrait de Al Jamiat Vol.7 No.14]