Aide de coté Allah Ta’ala

Dans le passé, nou ena ene quantité l’événement ki fine arrivé avec banne Sahaba-e-Kiraam, banne Tabeines et banne Taba-Tabeines. Banne l’événements couma ça banne personnages pieux-là fine bénéficié aide dans difficulté de la part Allah Ta’ala. Pourtant visiblement pas ti ena aukene chemin sorti. Mais Allah Ta’ala fine aide zotte dans ene façon miracle. Nou prend le cas de Hazrat Mariam ‎(Alaihis Salaam)‎‎ ki ti renferme li dans ene l’endroit et ki ti consacré et engage li totalement dans ibaadat. Dans banne tafseer Qur’aan-e-Kareem li mentionné ki li ti pé gagne banne nourritures et fruits ki pas trouve là-bas et ki conte saison. Et pourtant personne pas ti ena l’accès apart Hazrat Zakariyyah ‎(Alaihis Salaam)‎‎. Mais quand Allah Ta’ala oulé, ki pas capave arrivé. Allah Ta’ala pas bizin la porte pou traversé. Allah Ta’ala pas bizin la clé pou ouvert la porte. Li ena capacité lors tous kitchose.

Hazrat Safeenah ‎(Radiyallahou anhou‎)‎‎, ki ti en voyage pou accomplir ene mission de Nabi ‎(Sallallaahou A'laihi Wasallam)‎ fine zoine ene lion dans so trajet. Hazrat Safeenah ‎(Radiyallahou anhou‎)‎‎ dire ki li fine approche avec ça lion-là pou faire conné ki zotte lors ene mission de la part de Nabi ‎(Sallallaahou A'laihi Wasallam)‎ et ki zotte fine perdi chemin. Lion-là fine montré zotte chemin et li fine allé.

Hazrat Abdullah bin Umar ‎(Radiyallahou anhou‎)‎‎ ti en voyage. Pendant so trajet li fine trouve ene groupe banne dimoune pé dibouté. Quand fine dimandé, fine conné ki ena ene lion lors zotte chemin. Alors Hazrat Abdullah Bin Umar ‎(Radiyallahou anhou‎)‎‎ fine dessane depi lors so chameau et li fine alle cote lion-là et li fine trappe so zorreille et fine avance li depi lors chemin.

Ene fois deux Sahaba fine sorti depi cote Nabi ‎(Sallallaahou A'laihi Wasallam)‎. Ti pé faire bien noir mais Allah Ta’ala fine éclair zotte chemin avec ene l’espèce la lampe. Quand zotte fine arrive lors ene point pou séparé pou chakene alle so la caze, alors chakene fine être accompagné par ene la lampe ziska ki zotte fine rente chez zotte.

Hazrat Umme Aimane ‎(Radiyallahou anhou‎)‎‎, ene Sahabiyah ti en voyage de hijrat. Li ti roza et li ti bien soif mais pas ti ena narien pou boire. Ene cou li fine trouve ene sceau delo pé appendant depi le ciel ki ti attaché avec ene la corde couleur blanc. Li fine boire ça delo-là ziska ki so la soif fine passé. Li dire ki après ça l’événement-là jamais li fine gagne soif pourtant li fine expose li expressément à banne situations ki provoque la soif. Li dire ki li ti pé garde roza dans banne jours ki faire bien chaud mais là aussi li pas ti pé gagne soif.

Ena boucou l’événements similaires ki fine mentionné dans banne livres. Quand nou lire ça banne l’événements-là, nou gagne ene grand consolation ki nou banne problèmes ki nou ena dans différent domaines et à plusieurs niveau aussi bizin ena ene solution. Et solution-là li pas aukene part apart ki li trouve dans la main Allah Ta’ala. Nou aussi nou banne problèmes capave resoude pareille couma banne ki ti avant zotte problèmes fine resoude. Ena ene seul façon. Nou renforci nou fidélité et loyauté avec Allah Ta’ala par pratique Deen avec stabilité et sincérité.

[Extrait de Al Jamiat Vol.7 No.14]