Véritable zikr

« En réalité zikr c’est l’obéissance à Allah Ta’ala. Celui ki fine obéir Allah Ta’ala, alors absolument li fine faire zikr. Par conte ene ki pas obéir Allah Ta’ala, alors li pas ene zaakir quand même li faire boucou tasbeeh et faire boucou tilaawat-ul-Qur’aan. » (Hazrat Saeed Bin Jubair ‎(Radiyallahou anhou‎)‎‎)

Ene dimoune ki considère halal haram dans tout banne aspects de la vie, c’est ene dimoune Mouttaqui. C'est-à-dire ene dimoune ki ena taqwa. Ene dimoune pareil li pense toujours Allah Ta’ala. Chaque kitchose ki li faire, li calcule bien avant li faire li. Li guette bien si li permette ou bien non. Ça qualité personne-là li boucou pli bon ki ene dimoune ki faire tasbeeh et tilaawat nuit et jour mais ki pas abstenir de banne péchés. Dans ça sens-là, la personne ki abstenir de banne péchés li ene vrai zaakir parceki li possède l’essence même de zikr. Quant à ene personne ki négligent dans so Deen li ene zaakir superficiel. Li paraite ene zakir mais zikr pencore pénétré dans so le cœur. Li bon conné si ene zikr pareil li pas satisfaisant, li pas inutile aussi. Vaut mieux ça ki pas faire zikr et reste engagé dans péché. Mais bizin continué faire zikr afin ça pénétré dans le cœur. Quand zikr pénétré dans le cœur, dimoune-là gagne dégout avec péché et li senti fraicheur et la joie de ibaadat.

Tout kitchose li vine avec le temps. Si ene dimoune oulé vine ene vrai zakir, alors rarement ça capave arrivé du jour au lendemain. Li dimane stabilité, persévérance et vigilance pendant ene bon boute le temps pou li paraite kitchose. Idéal li pas résultat et fruit de ene seul jour. Derrière ça ena boucou la peine et zeffort pou nou trouve li couma li été. Bizin continué faire zikr dans forme et façon ki li été mais avec ene détermination pou améliore li. Faudré pas découragé avec so forme actuelle parceki tout kitchose même li incomplet et ena manquement dans so stage préliminaire. Ça tâtonnement dans cozé ki nou expérience li dans l’enfance li ena so contribution dans éloquence ene dimoune. Ça tombe tombé dans marché-là dans l’enfance fine contribué énormément dans nou long jump, high jump etc. ki nou pé capave faire li aisément zordi. Donc continué zikr sans relâche quand même li pas paraite ça efficace-là dans commencement. Avec zeffort et continuité, tout kitchose capave amélioré.

[Extrait de Al Jamiat Vol.8 No.1]