Valeur récompense cotte Allah Ta'ala

Chaque bonne action ena ene récompense ki shariah fine promette. Et récompense-là li pas ene récompense simple. Valeur ene récompense li mesure en fonction de celui ki accorde ça récompense-là. Cadeau ene simple dimoune et ene le roi ena so différence ki pas nécessaire dire. Allah Ta'ala le Créateur Suprême so récompense li inégal, inestimable et incomparable. Eski ena kit mesure ki capave mesure li ? Définitivement non. Ceki fine dire nou c'est necque pou donne nou ene l'idée. Sinon c'est ene kitchose apart et au delà de nou compréhension et imagination. Deux rakaat sounnat fajar li pas égal mais meilleur ki le monde et tout ceki li contenir. La terre dans dounia nou acheté par perche.

Ena place acheté li par toise couma ena place li vendé ou loué par mètre carré. Ça dépanne région ki ou oulé acheté. Dimoune ki dans le domaine, zotte conne très bien so valeur.

La terre entier dounia ki so valeur pou été !!! Tout ceki la terre contenir li inclure tous so banne richesse en divers forme et tous so banne ressources. Ene jour so 2 rakaat sounnat fajar so valeur nou fine causé !!! Ene kitchose ki nou faire li tous les jours pendant ene cinquantaine d'années, ki so valeur pou été ? Ça c'est seulement ene item. Aster valeur 2 faraz de fajar ki pou été ?

[Extrait de Al Jamiat Vol.7 No.12]