Vrai l’obéissance

Ene morceau hadice dire :

« Observe taqwa avec Allah Ta’ala acote ou été… »

Observe taqwa veut dire vive dans l’obéissance Allah Ta’ala. Nou obéir Allah Ta’ala par exécute so banne commandements et abstenir de tous banne kitchose ki li fine interdit. So banne commandements par exemple faire namaz, garde roza dans Ramadhan, donne zakaat etc. et banne kitchoses ki fine interdit couma coquin, coze menti, l’intérêt etc. Ene dimoune li vine obéissant quand li observe et considère tous les deux. Et li bizin faire li partout acote li été. Couma li faire li dans ramadhan, coumsa même li faire li en dehors ramadhan. Couma li agir bien divant dimoune, coumsa même li agir bien quand li tout seul. Couma li faire bon dans so l’endroit et divant banne dimoune ki li conné, coumsa même li faire bon quand li à l’extérieur ou dans ene lot l’endroit cote dimoune pas conne li. Li dimane ene bon traitement et ene formation pou capave développe ene volonté pareil. Ça formation-là pou faire la personne senti li accompagné quand même li tout seul. Li pou faire li senti présence Allah Ta’ala et accompagné par Allah Ta’ala acote li été. Pou apprane lire Qur’aan, ene dimoune li alle maktab et madrassah. Pou comprend Qur’aan li bizin alle Darul Uloom. Mais pou ça formation ki faire dimoune senti présence Allah Ta’ala, ça li bizin alle dans Khaanqah cote ene Sheikh Kamil. Sans ça li pratiquement impossible pou ene dimoune vine vraiment obéissant.

[Extrait de Al Jamiat Vol.8 No.3]