Faqeer

Ena deux types de l’existence. Ene ki so l’existence li éternelle. Li pena aukene commencement ni la fin. Li existé par li même. Pena narien ki fine faire li existé. C’est Allah Ta’ala.

Apart Allah Ta’ala, tout ceki existé, li existé par Allah Ta’ala. Chaque atome dans l’univers li dépanne lors Allah Ta’ala totalement dans so l’existence. Pena aukene kitchose dans aukene moment ki li pas dépanne lors Allah Ta’ala. Ene kitchose li pas constitué ou désintégré et reconstitué par li même. A chaque niveau et à chaque étape de so transformation et so développement li dépanne entièrement lors Allah Ta’ala. Narien pas capave dispense li de la volonté divine.

Ene vrai Faqeer li pas ene kikene ki nou appelle li misérable. Ene vrai faqeer c’est ene kikene ki senti au fond de li même ki li bizin Allah Ta’ala à chaque fraction seconde dans tout ceki li été et dans tout ceki oulé vini. Dans ce sens, la qualification faqeer li ene qualité louable et appréciable de ene serviteur. Li pas ene déshonneur ou quelque chose blâmable. C’est ene qualité et ene l’état d’esprit ki ene serviteur bizin inculquer et développé pou li vine ene bon musulman.

Quand nou bizin ene kitchose, malgré li capave pénible ou dégoutant, li vine ene kitchose appréciable parceki nou confiant ki le bien être ki nou bizin li dépanne lors ça kitchose-là. Par exemple ene piqure ki faire gagne boucou dimal ou bien ene médicament bien amère ki bien difficile à avalé. Nou fine prend l’exemple ene kitchose pénible ou dégoutant dans le but pou démontré le rôle ki le besoin et la nécessité joué dans nou la vie et dans nou comportement. Nou façon d’agir avec ene dimoune li dépanne lors l’importance ki ça dimoune-là ena dans ranne nou la vie agréable. Nou pas pou casse la tète avec ene ki pena l’importance dans nou bien être. Par contre nou pou cherche mille et ene chemin pou réconcilié avec kikene ki nou ti ena ene problème avec li auparavant si nou juge li indispensable ou bénéfique plutard. Ça scenario-là habitué trouvé dans domaine politique. Ça li faire l’ennemi vine camarade et camarde vine l’ennemi.

Si tout ça-là vrai, alors pou ki raison Allah Ta’ala pas bizin vine nou but principal quand narien pas bougé sans so l’ordre ? Tous banne raisons ki faire nou content kikene, ki faire nou galoupe derrière kikene, ki faire nou supplié kikene, ki faire nou humilié nou divant kikene, ki faire nou expose nou la vie, ki faire nou accepté subir toute sorte difficulté, tous ça banne raisons-là zotte trouve pli bien dans Allah Ta’ala. La santé, l’honneur, dignité, richesse et le bien être en général sans réserve, tout trouve dans la main Allah Ta’ala. Tout ceki nou bizin, li trouve dans la main Allah Ta’ala. C’est Allah Ta’ala li tout seul ki ena capacité donne nou ceki nou bizin et satisfaire nou banne nécessités. Ene pli grand le roi aussi li bizin Allah Ta’ala dans tout ceki li été. Dans ce sens pena personne indépendant. Nou tous faqeer divant Allah Ta’ala pou même ene dernière ti kitchose aussi.

Acoze ça, tout ceki ene dimoune capave faire pou ene dimoune ki li pensé capave aide li, li bizin faire plis ki ça pou Allah Ta’ala.

Jamais ene dimoune pou déplaire kikene ki ranne li boucou service. Coumsa même ene dimoune bizin pas déplaire Allah Ta’ala quand li conné ki li doit Allah Ta’ala dans tout ceki li été et dans tout ceki li ena. Pas déplaire Allah Ta’ala veut dire pas casse aukene l’ordre Allah Ta’ala. Et ça li dépanne lors ki quantité li senti ki li dépanne lors Allah Ta’ala parceki pli ene dimoune senti li dépanne lors Allah Ta’ala, pli li attaché avec Allah Ta’ala. Et pli li attaché, pli li respecté l’ordre Allah Ta’ala.

[Extrait de Al Jamiat Vol.8 No.4]