Prescription de Nabi ‎(Sallalaahou Alaihi Wasallam)‎

Ene prescription médicale li faire so l’effet couma bizin quand respecté so dosage et so fréquence. Si fine prend médicament-là en plis ou moins ki fine prescrire ou bien sans respecté kit condition, alors non seulement li pas pou ena ene l’effet désirable mais dans certaine cas li capave faire di tort aussi. Ça même arrivé concernant la pratique de Deen. Ena ene façon pou accomplir ene ibaadat. Ene ibaadat li capave ena banne mérites et vertus immense mais si fine mal faire li sans respecté banne principes, alors pou ena péché dans place récompense. Par exemple namaz li ene grand ibaadat. Mais li pas autorisé faire li quand soleil pé levé ou bien quand li pé couché. Ene dimoune gagne péché si li faire namaz dans ça banne l’heure-là. Ene fois ene personne ti pé faire namaz dans l’heure ki soleil ti pé levé. Hazrat Ali ‎(Radiyallahu Anhou)‎ fine empêche li. La personne fine dire : « O Ali. Eski to croire Allah pou puni moi acoze mo pé faire namaz ? » Hazrat Ali ‎(Radiyallahu Anhou)‎ fine dire : « Non li pas pou puni toi acoze namaz mais li pou puni toi acoze to fine contredire le sounnat de so Nabi ‎(Sallalaahou Alaihi Wasallam)‎. »

Ça montré ki pratique Deen li pareil couma ene prescription médicale ki bizin respecté. C’est ene erreur si ene dimoune pas respecté ça. Li faire erreur-là par diminué ou bien par augmenté. Si li diminué, appelle ça تفريط (tafreet) et augmenté appelle li افراط (Ifraat). Tout les deux pas bon. L’équilibre entre les deux li vine par suive sounnat de Nabi ‎(Sallalaahou Alaihi Wasallam)‎. Nou perdi banne bénéfices et récompenses de ene ibaadat quand nou faire li sans respecté le moubaarak sounnat de Nabi ‎(Sallalaahou Alaihi Wasallam)‎. Suivre le sounnat de Nabi ‎(Sallalaahou Alaihi Wasallam)‎ li tellement essentiel et important ki si fine faire Qailullah (la sieste) avec l’intention pou établir sounnat, alors li boucou pli bon ki faire tahajjud sans respecté sounnat. Pourtant nou bénéficié et nou reposé par faire Qailullah et nou gagne la peine levé dans au milieu la nuit pou faire tahajjud. Ena grand sacrifice dans levé pou faire tahajjud mais malgré ça li inferieur à ene la sieste ki fine pratique li avec l’intention pou observe sounnat de Nabi ‎(Sallalaahou Alaihi Wasallam)‎. La différence entre les deux pratiques li vine par observe sounnat. Ene pratique li vine appréciable et valeureux quand fine faire li d’après sounnat quand même li paraite ene simple pratique. So le contraire aussi li vrai. C'est-à-dire ene pratique ki paraite énorme et ki ena difficulté dans faire li mais si pas fine pratique li d’après sounnat, alors li pas appréciable.

L’enthousiasme et fanatisme li pas sufi pou capave pratique Deen convenablement. Ceki important c’est conne le paramètre de chaque action. Et ça li définir avec précision par les nobles fouqaha (juriste). Sinon fanatisme et l’enthousiasme c’est banne facteurs ki dévié dimoune et mette zotte dans l’égarement. Mais dimoune-là li reste dans l’impression ki li lors droit chemin. Acoze ça li arrivé faire banne pratiques ki pas ibaadat par prend li pou ibaadat. Ça li reconnaite par bid’ah. Et parfois, tellement aveuglé par so l’enthousiasme et fanatisme, li servi banne moyen haraam pou établir ene pratique de Deen.

C’est ça même facteur ki faire dimoune faire namaz nawafil couma namaz tasbeeh, namaz awwabeen etc. avec jamaat ki qualifié de strictement indésirable par banne fouqaha. Li vrai ki ça banne namaz-là zotte renferme banne vertus et banne mérites immense. Similairement namaz avec jamaat aussi li ena so mérite. Mais ça aussi li vrai ki jamaat li pas applique pou tout namaz. Et namaz awwabeen et namaz tasbeeh c’est banne namaz cote jamaat pas appliqué. Li pas le sounnat tareeqah pou faire ça banne namaz-là avec jamaat. Acoze ça, banne fouqaha fine qualifié ça de makrouh tahreemi ou bien ceki nou capave appelle strictement indésirable.

Le public arrivé tombe dans banne erreurs semblable d’abord acoze zotte aveuglé de zotte fantaisie et deuxièmement acoze l’ignorance ki empêche zotte évalué banne conséquences néfastes de ceki zotte pé faire. Zotte lizié braqué lors seulement les soi-disant bénéfices actuelles et temporaires. Mais fouqaha zotte reste lors zotte garde par vision et clairvoyance ki zotte fine bénéficié avec la lumière et connaissance approfondi de shariah. Ça amène zotte pou prend en considération de ceki ene pratique capave produire à la longue dans l’avenir si pas fine mette ene frein avec ça. Mais dimoune ki pas comprend, zotte trouve drôle ki ene pratique ki visiblement aussi efficace capave être qualifié de strictement indésirable. Li tout à fait normal si le public pas arrivé comprend ça. Ceki anormal et détestable c’est quand zotte pas accepté soumette à banne verdicts de banne fouqaha et zotte vine montré zotte pli conne Deen ki banne fouqaha.

[Extrait de Al Jamiat Vol.8 No.4]