Masnoune Qiraat dans banne namaz faraz

Banne sourah ki Rasouloullah r ti ena l’habitude récite dans banne namaz faraz li trouve dans la dernière partie de Qour’aan-e-Kareem. C'est-à-dire apartir Sourah Al-Hujuraat (49) ziska la fin. Ça banne sourah-là appelle zotte Moufassal. Ça banne sourah-là appelle zotte Mufassal probablement acoze ki ça banne sourah-là zotte bien courte comparé avec banne lezot sourah. Ça li nécessite mentionne Bismillah ki sépare ene sourah de l’autre sourah avec ene fréquence pli rapproché. Le mot Moufassal même signifié ene kitchose ki fine séparé de ene l’autre kitchose. Séparation ene sourah de l’autre sourah li bien fréquent dans ça dernière partie-là. Acoze ça appelle zotte Moufassal. D’après ene l’autre sens, Moufassal signifié ene kitchose déterminé, établi et stable. Donc d’après ça deuxième sens-là, ça banne sourah-là appelle zotte Moufassal acoze ki ena bien tigite amendement dans ça banne sourah-là. Moufassal li divisé en trois catégories :

طوال المفصل (Tiwaal-ul-Moufassal)

اوساط المفصل (Ausaat-ul-Moufassal)

قصار المفصل (Qisaar-ul-Moufassal)

طوال المفصل Li commencé apartir Sourah Al-Hujuraat (49) ziska Sourah Al-Bourouj (85)

اوساط المفصل Li terminé avec Sourah Al-Bayyinah (98) et قصار المفصل li alle ziska la fin Sourah An-Naas (114).

Li sounnat pou récite banne sourah ki trouve dans catégorie Tiwaal-ul-Moufassal dans faraz de namaz Fajar et Zohar. Et Ausaat-ul-Moufassal li sounnat dans namaz Assar et Esha. Et Qisaar-ul-Moufassal li sounnat pou lire dans namaz Maghrib.

D’après principe, bizin lire ene quantité et dans ene façon ki li pas vine lourd lors banne mouswalli. Si ene Imam ena l’habitude lire lente, alors li lire ene tigite même pou pas embarrasse banne mouswalli avec longueur namaz. Rasouloullah r fine recommane pou faire namaz léger parceki ena tout qualité dimoune. Ena dimoune ki malade couma ena ki dans l’âge et ena aussi banne ki ena zot travail pou occupé. Donc bizin faire li dans ene façon léger en sorte ki ça encourage dimoune vine faire namaz. Ene personne ki ena kit travail pou occupé, li pou vine faire namaz si li conné ki Imam pas pou tardé dans namaz. Li pas pou pense pou postpone ou renvoye so namaz ou pas faire li même ditout si li conné ki Imam pena l’habitude tardé dans namaz. Au cas contraire soit banne mouswalli pou souffert ou bien li pas pou encourage zotte vine namaz.

Kitchose ki faire d’après sounnat li bien simple. C’est quand nou ajouté ki li vine compliqué. Namaz pas fine faire pou Imam casse so la gorge ou bien pou impressionne banne mouswalli avec so qiraat. C’est ene ibaadat ki pou pli profitable si suive tareeqah de Nabi r. Nou trouvé même scenario dans célébré nikah. Li pas prend plis ki quelques minutes. Mais avec banne ingrédients ajoutés et démesurés, ene cérémonie de nikah li plitôt paraite ene spectacle ki ene pratique de ibaadat. Ena des fois ene dimoune bizin ena assez le temps pou capave assisté ene nikah. Avec so banne zépices, ena des fois li capave prend ou ene heure temps aussi. Et pourtant, si bien guetté, li pas coute plis ki 5 minutes.

C’est ene l’époque de fitnah cote dimoune oulé montré ceki li été au lieu montré ceki Deen été et ceki dimoune-là bizin faire. Travail Deen pou faussé tanque pou ena banne mentalité similaire. Tout capave dressé et vine dans l’ordre si nou amène sounnat dans nou. Tout pou vine simple, facile et formidable.

[Extrait de Al Jamiat Vol.8 No.5]