Façon respectable

Kitchose ki nou oulé, nou capave gagne li dans mauvais façon couma nou capave gagne li dans bon façon aussi. Ki faire bizin passe par z’imposte ou la fenêtre si capave passe par la porte ? Ene bon dimoune ki ena dignité et la décence, li pou toujours choisir ene façon respectable et honorable pou faire ene kitchose.

La façon respectable et honorable c’est la façon ki Allah Ta’ala content. La façon détestable c’est la façon ki Allah Ta’ala détesté. Gagne richesse par coquin, par joué dans casino, par joué le course, par malhonnêteté, par faire transaction ki ena l’intérêt ou par faire commerce de banne marchandises et produits ki pas approuvé par shariah c’est banne façons détestables ki ranne ene dimoune détestable dans lizié Allah Ta’ala. Pena l’avenir dans vine détestable dans lizié Allah Ta’ala. Mille dimoune capave flatte ou pou ceki ou été mais ça li couma ene nuage lors le ciel ki pas prend le temps pou change forme. L’honorable ki ou été c’est pou ene tigite le temps. Vrai l’honneur li trouve dans être l’honorable dans lizié Allah Ta’ala. C’est ene l’honorable ki reste l’honorable pou tout le temps. Ene dimoune li vine l’honorable dans lizié Allah Ta’ala quand li soumette li à Allah Ta’ala.

La soumission à Allah Ta’ala li vine à travers suive ça Deen ki nou bien aimé Nabi r fine amené. Deen c’est le seul moyen ki ranne ene personne digne, respectable et honorable. Pena aukene chemin pou gagne ça apart chemin Allah Ta’ala. Pena aukene la porte cote capave gagne ça apart la porte Allah Ta’ala.

[Extrait de Al Jamiat Vol.8 No.5]