Mayyits de Covid-19

Procédures pou Ghoussal, Namaz Janaazah et enterrement d’après ceki l’autorité pé envisagé

JUM fine être informé de manière informel ki apart banne changements ultérieurs, l’autorité pou procède de la façon suivante avec le corps de banne Mayyits musulmans de Covid-19 :

1. Si Mayyit-là li ene madame, alors c’est banne nurses ki pou occupe so le corps et si li ène missié alors c’est banne infirmiers ki pou occupe li.

2. Si ena pou mette Kafan avec mayyit-là, alors la famille ou l’organisation bizin fini donne l'autorité kafan pou metté, parceki c’est seulement l'autorité ki pou autorisé pou occupe le corps-là.

3. L'autorité pou scelle le corps la dans ene caisse.

4. L’autorité fine prend disposition pou transporte le corps-là à Bigara, Curepipe, cote pou faire l’enterrement.

5. L’autorité pou donne permission à seulement quelques membres la famille pou faire Namaaz Janaazah.

Vue ki l’autorité fine prend banne dispositions et banne stands à propos banne mayyits de COVID-19, nou avise le publique pou coopéré et pou prend banne mesures de précaution nécessaires en respectant, autant ki possible, banne normes Islamiques.

Précisions et recommandations de la part de JUM: Ghoussal /Tayammum de Mayyit et autres.

• Nou faire rappel le principe ki dans situation normal, li Farz Kifaayah lors banne musulmans pour mette Kafan avec ene Mayyit, donne li so Ghoussal et faire so namaz janaazah. (Fardh Kifaayah veut dire ki li pas nécessaire ki tout dimoune observe li. Mais li pas permette aussi ki personne pas observe li.)

• Si pas capave donne ghoussal dans façon normal, alors li pou suffit pou jette de l’eau lors le corps Mayyit-là en entier, même avec so linge. Banne staffs dans l’hôpital (même si zotte pas Musulman) capave faire li, si possible.

• Si l’autorité fine fini mette le corps-là dans ene sac, alors capave net jette de l’eau lors sac-là même.

• Si tout ceki fine mentionné là-haut, li être interdit par la loi ou li pas possible, en dernier recours nou capave donne Mayyit-là Tayammum, quand même avec ene le gant.

• Quand pé place Mayyit dans caisse, bizin bien rappel dans ki position et dans ki côté fine mette so la tête.  De la même façon, bizin assuré ki quand pe enterre Mayyit, bizin mette li lors so côté droit en direction de Qiblah, comme d’habitude.

• Namaz janaazah li ene Dou’aa en faveur ene mayyit et li ena so l’importance. Donc, bizin pas enterre ene mayyit sans ça. Et le corps/caisse (coffin) bizin présent pou Namaz Janaazah compté. Sinon pena namaz Janazah dans l’absence le corps.

C’est l’autorité ki pou jugé ki pou possible et ki pas pou possible dans banne différents scenarios. Mais si ena kit organisation islamique spécialisée ki pou prend charge ou supervise banne rites funéraires, en respectant banne normes et mesures de précaution et de sécurité, l’autorité li fortement recommandé pou considère zotte.

Nou pou envoye ene comminuqué, quand le Ministère concerné pou concrétise so décision finale concernant banne rites ki pou autorisé.

«Ki Allaah Ta’aala protège nou tous dépi ça maladie-là, donne patience à banne familles ki pe passe par ça test-là et donne nou Taqwaa & Hidaayah. Aameen»

Jazaakumullahu khairaa

Jamiat-Ul-Ulama De Maurice (JUM)