NAMAAZ JUMUAH PENDANT COUVRE-FEU

JUM pé avise le publique pou pas rassemblé banne dimounes pou faire Jumuah dans Masjid pendant couvre-feu.

Nou bizin toujours respecté banne protocoles de couvre-feu et évite faire banne groupes. Alors bizin, pas réunir personne dans voisinage et faire tous Namaaz sois individuellement ou bien collectivement avec banne membres de la maison seulement.

Voilà quelques consignes ki capave adopté si pé faire Jumuah la maison.

1. Au minimum pou bizin ena 4 missiés. Si ene parmi ça 4 là pas majeur (Baaligh), Jumuah pas pou valide.

2. Façon faire Jumuah : -

•  Donne Azaan quand l’heure zohr rentré après Zawaal (c.à.d. à 12 :25) et puis faire 4 Rakaats Sunnah.
•  Rédonne Azaan encore ene fois.
•  Celui ki pé faire Imaam, pou lire premier khutbah en arabe, après li pou assize lors ene chaise pou quelques seconds.
•  Ensuite, li pou déboute pou lire deuxième Khutbah en arabe.
•  Après ça, li pou faire 2 Rakaats Namaaz Faraz de Jumuah.
•  A la fin, nou pou faire banne Namaaz Sunnah après Jumuah comme d'habitude.

N.B. ÇA FAÇON FAIRE JUMUAH KI FINE MENTIONNÉ-LA LI ZIS PENDANT COUVRE-FEU. APRÈS COUVRE-FEU, QUAND SITUATION RETOURNE NORMALE, PAS SUPPOSÉ FAIRE JUMUAH DANS ÇA FAÇON-LÀ.

3. Banne ki pas conné couma bizin faire Jumuah, ou bien zotte pas capave lire Khutbah, alors même si zotte à 4 ou plis ki 4 personnes majeurs, alors zotte bizin faire Namaz Zuhr.

4. Pou Khutbah valide, capave nette lire Surah Faatihah, Durood et ene ti Dua avec l'intention Khutbah.

5. Si ena moins ki 4 personnes, zotte pou bizin faire Namaz Zuhr même.

6. Banne madames aussi pou bizin faire namaz Namaz Zuhr même.

Jamiatul Ulama de Maurice
02 Sha’baan 1441 / 27 Mars 2020