Question:

Eski ene masbooq gagne droit participé avec Imam quand faire sajdah sahw ?

Réponse :

Masbooq veut dire ene personne ki fine rate ene parti namaz avec Imam. Par exemple li fine joine Imam dans premier rakaat après roukou' ou bien dans 2eme rakaat, etc.

D'après l'ordre ene mussalli pareil bizin attane Imam fini termine namaz avant li dibouté pou remplace so banne rakaat ki li fine raté. C.à.d. quand Imam fini faire 2eme salaam, li bizin levé pou remplace so banne rakaat. Si jamais Imam pé faire sajdah sahw, li bizin faire sajdah sahw li aussi. Mais faudré pas li faire salaam. Si par oublie li fine faire salaam, alors so namaz pas pou affecté. Couma li rappel ki li ena pou remplace namaz, li capave dibouté et complète so namaz à condition ki so l'estomac pas fine viré depi qibla et ki li pas fine causé, riyé, mangé, boire ou faire n'importe ‎ki action ki casse namaz. Mais eski li pou bizin faire ‎sajdah sahw quand li pé remplace so namaz ?‎

Si li ti faire ça salaam-là avant ou bien ensam avec ‎Imam, alors li pena pou refaire sajdah sahw. Mais si ‎so salaam li après Imam so salaam, alors dans ça cas-‎là li pou bizin faire sajdah sahw quand li remplace so ‎namaz. Si li fine faire salaam avec Imam avec ‎connaissance ki li ena pou remplace banne rakaat, ‎alors so namaz pou cassé et li pou bizin refaire namaz-‎là.‎

Anoté ki si par l'ignorance ene dimoune pensé ki li ‎bizin faire salaam avec Imam malgré ki li ena banne ‎rakaat pou remplacé, alors ça aussi li couma dire faire ‎salaam avec connaissance. Ça veut dire ki so namaz pou ‎cassé et li pou bizin refaire namaz.‎

[Extrait de Al Jamiat – Vol. 6 No. 8]