Le reflet

Tout dimoune ena pou dessane enba la terre. Ça même ki appelle Qabar. Situation ki ene dimoune pou faire face dans Qabar li pou reflecté ceki li fine faire la haut la terre. Ene dimoune soucieux, intelligent et ki vraiment oulé so bien être réel, pou toujours réglé so la vie en fonction de ceki li pou récolté comme résultat de so comportement lors dounia. L'échec total li trouve dans amène la vie sans prend compte banne conséquence.

Selon ene hadice Tirmizi, qabar li ene jardin parmi banne jardin de jannat ou bien ene fossé parmi banne fossé dans l'enfer. Ça dépanne lors la façon ki ene dimoune fine comporte li la haut la terre. Chaque action ki ene dimoune faire lors la terre, li augmente ça difé-là ou bien li embellir so jardin. Ça veut dire ki chaque kitchose pou ena ene l'effet et ene reflet. Ene dimoune capave décide l'effet et reflet ki li ti à content gagné dans so qabar à travers so comportement lors la terre. Tout kitchose ki haraam et ki Allah Ta'ala pas content, li rempli qabar ek difé. Coumsa même la jalousie, l'orgueil, la gourmandise c'est banne caractère vile et haraam ki pena aukene utilité apart augmente ça difé-là. Dimoune en général ena tendance évite banne ki d'après zotte capave mette barre dans la roue. Et li tout à fait normal et naturel ki ene dimoune li envi prospéré dans la vie. Mais pas tous dimoune ki content prospérité so prochain. Donc li tout à fait normal ki ene dimoune li prend so garde conte ene ki capave ranne li difficulté. De l'autre coté, ça même dimoune li pas guette so propre comportement. Li pas réalisé ki so pli grand l'ennemi c'est so mauvais comportement lors  la terre ki capave brise so l'avenir pou l'éternité dans certaine cas. Sinon li capave mette li dans ene la peine pou ene bon boute le temps.

Donc chaque dimoune bizin conné ki so pli grand l'ennemi et véritable l'ennemi c'est péché et désobéissance Allah Ta'ala. Au moins li bizin évite péché couma li évite poison ou bien couma li reste loin de ene dimoune ki li juge li dangereux et néfaste pou so bien être.

Pena bien être dans casse l'ordre Allah Ta'ala. Désobéissance Allah Ta'ala li rempli qabar avec la flamme difé. Ki bien être nou pé attane alors dans ene kitchose ki pou faire nou souffert dans nou qabar.

[Extrait de Al Jamiat – Vol. 6 No. 8]