COUVERT FIGURE

D’après shariat, en principe ene madame bizin couvert so figure. Li pas gagne droit découvert li divant ene zomme étranger. Si li faire ça, alors bizin conné ki li dans péché.

Seulement, couvert figure li pas faire ene madame vine deendaar. Apart ça bizin ena encore les zotte kitchose ki dans zotte l’ensemble faire ene dimoune vine deendaar. Ça li ene kitchose ki personne pas capave pretanne le contraire. Mais ça aussi li bien vrai ki ene madame deendaar pas capave marche lors la rue sans couvert so figure. Parceki li pé néglige ene l’ordre ki Allah Ta’ala fine donné. Ene personne ki casse l’ordre Allah Ta’ala, li pas capave ene dimoune Deendaar.

Ça li couma dire quatre la roue ki bizin ena pou ene l’auto roulé. Ene seule la roue pas sufi. Mais ça pas veut dire ki ça ene la roue-là perna so contribution et ki li pas important. Coumsa même necque couvert figure pas sufi pou faire ene madame vine deendaar. Bizin ena encore les zotte kitchose. Mais ça pas veut dire ki couvert figure pas important.

Ene l’autre bid’ah

Ene kitchose ou bien ene pratique ki fine pratiqué ouvertement dans publique dans l’époque Sahaba, Tabeïnes et Taba-Tabeïnes sans être contesté, ça li ene preuve ki ça kitchose-là li ene kitchose ki permette. Sinon ça ti pou être contesté.

Apart ça trois l’époque-là, shariah pas fine donne ça garantie-là concernant aukene pays ou aukene l’endroit. Si ene kitchose pé pratiqué dans ene pays ou dans ene l’endroit sans aukene problème, ça li pas ene preuve ki ça kitchose-là li permette. Li pou ene nouveauté et ene bid’ah si croire dans ene principe pareille parceki li pas ene principe de shariat.

Donc si ene pays pas dire narien lors découvert figure, ça pas veut dire ki li permette. Dans l’époque hajj ene quantité kitchose contre shariat traversé sans la moindre contestation. Eski ça veut dire ki li permette acoze ki ça pays-là pas dire narien lors-là ?

Taufeeq-e-Ilaahi

Taufeeq-e-Ilaahi c’est ça volonté pou pratique Deen ki Allah Ta’ala li inspire so serviteur. Nou bizin dimane ça taufeeq-là avec Allah Ta’ala. Si nou trouve ene kitchose difficile pou pratiqué, faudré pas nou essaye pou prouvé ki li pas important. Ça li ene kitchose bien grave ça! Nou bizin accepté nou faiblesse à coze ki nou pas pé capave mette li en pratique. Nou bizin dimane Allah Ta’ala dou’aa pou gagne le Taufeq et la volonté. Quand Allah Ta’ala donne la volonté, kitchose difficile aussi vine facile. Mais sans ça taufeeq-là, kitchose ki bien bien facile aussi vine boucou difficile.

Coumsa même quand nou pé trouve la barbe d’après sounnat et couvert figure difficile ou bien nou perna ça dans nou la vie, faudré pas ça faire nou dire ki la barbe ou bien couvert figure pas important. Ça appelle cachiette ou défaut derrière banne fausse argument. Et ça même ki shariat qualifié li de Kibr (l’orgueil) ki empêche ene dimoune accepté la vérité.

Bizin pas difforme banne données dans shariat pou justifié ou défaut. Ene bon musulman bizin toujours accepté la vérité. La volonté pou accepté la vérité c’est ene moyen pou Allah Ta’ala verse so faveur. Par ça faveur-là, kitchose ki ti difficile pou vine facile Insha-Allah !