Faire campagne pou madame vine dans masjid

Zordi jour quand nou pé faire campagne en faveur madame vine assisté namaz dans masjid, d'abord ça campagne-là li ene campagne ANTI-SUNNAH. Parceki banne ki lire hadice, comprend hadice et ena connaissance de hadice, zotte tous d'accord ki c'était necque ene simple l'autorisation éclipsée par ene préférence faire namaz dans la caze. Et ça aussi li ti ene concession avec certaine conditions. Faudré pas prend li comme ene obligation. Jamais Rassouloullah r ti faire ene campagne pareille. D'après so l'attitude et so déclaration, nou trouvé ki li ti préfère madame faire namaz dans ene l'endroit pli cachiette ki capave dans so la caze. Ça permette nou dire aisément ki faire campagne pou madame vine dans masjid c'est ene campagne ki pas corresponde avec le sounnah de Nabi r.  C'est ene campagne conte Nabi r. Et aussi ene campagne conte ceki li ti souhaité et li ti recommandé.

Question:

Ki position ça namaz ki banne madame faire en jamaate entre zotte même?

Réponse :

Namaz avec jamaate pou banne madames acote ene madame même ki diboute couma Imaam li ene namaz ki pas fine être appréciée par banne ‘Oulama couma Imam Abou Hanifah (R), Imam Malik (R) et Imam Ahmad Bin Hambal (R). Dans ene hadice Rassouloullah r fine dire :

"لا خير فى جماعة النساء الا فى المسجد او فى جنازة قتيل" (احمد/الطبرانى)

Traduction :

“Na perna aukene bienfait dans namaz avec jamaate pou banne madams à moins si li dans masjid ou bien dans namaz janaza ene personne ki fine être assassinée.”

 (Musnad Ahmad/Tibraani)

Le sanad ça hadice-là li contenir ene narrateur nommé ابن لهيعة ki so position li controversé chez banne savants de hadice. Mais ça pas empeche ça hadice-là servi comme ene preuve parceki hadice ene narrateur ki so position li controversé, li ene hadice passable et bon ki ena la capacité soutenir ene argument.

Le hadice pé montré ki ça namaz en jamaate ki banne madames faire zotte tout seul, li ene namaz ki perna aukene bienfait. Selon ene l’autre rapport, Hazrat Ali t fine dire:

"لا تؤم المرأة" (المدونة لمالك)

Traduction :

“Ene madame pas bizin diboute Imam.” (Al-Moudawwanah de Imam Malik)

Ça rapport-là fine rapporté dans ene facon authentique. D’apres ça aussi nou trouvé ki li pas bon pou ene madame diboute comme Imam.

Nou ena banne rapports selon lesquels Hazrat Aisha t, Hazrat Umme Salmah t et ene Sahabiyyah nommé Umme Waraqah t ti pé diboute Imaam pou banne madames. Alors ça pas ti ene pratique régulière. Ça fine pratiqué tellement rare, couma dire li pas ti existé même. Si li ti ene façon appréciable pou faire namaz, alors zotte ti pou pratique li régulièrement.

Astere nou ena hadice ki dire ki na perna aukene bienfait dans faire namaz dans ça facon-là. Et de l’autre coté nou trouve banne Sahabiyah fine pratique li. Ça amene nou dans ene situation acote nou ena deux choix :

a)    Nou faire namaz avec jamaate acoze ki li permette seulement malgré ki li na pas appréciable,

b)    Ou bien nou pas faire li acoze ki li ene facon indesirable quand même li paraite permette.

Dans ene situation pareille, la logique d’apres Shariah exige de nou ki nou evite faire ene kitchose indesirable quand meme ça prive nou de ene manque à gagné. Parceki dans pas faire li perna aukene peché. Par contre dans faire li ena ça possibilité-là. Donc li préférable pas faire li. Ena ene principe ki dire :

"دفع المضرة خير من جلب المنفعة"

Vaut mieux evite ene desavantage ki gagne l’avantage.

C'est-à-dire si ene l’avantage li cause ene désavantage, vaut mieux pas alle pou ça l’avantage-là afin pou évite ça désavantage-là.

Tout ça là montré ki la facon pli correct et pli appréciable pou banne madames, c’est faire namaz individuellement. Faire namaz avec jamaate dirigé par ene madame comme Imaam et ça aussi dans ene façon régulière, li ene façon indésirable et détestable.

Par M R Meerun