Faire péché ouvertement

كل امتى معافى الا المجاهرين وان من المجاهرة ان يعمل الرجل بالليل عملا ثم يصبح وقد ستره الله فيقول عملت البارحة كذا وكذا وقد بات يستره ويصبح يكسف ستر الله عنه

(البخارى)

Traduction:

"Chaque membre de mo ummat pou être gracié excepté banne ki faire péché ouvertement. Li compte dans faire péché ouvertement ki ene dimoune li commette ene mauvaise action dans la nuit et après ça li joine gramatin dans ene l’état cotte Allah fine cachiette so péché mais li alle dire mo fine  faire tel tel zaffaire hier soir et pourtant li fine passe la nuit dans ene l’état ki so rabb fine cachiette li mais vine gramatin li alle enlève depi lors li ça voile ki Allah ti metté lors li. (Boukhari)

Explication :

Commette péché li bien grave parceki li représente désobéissance Allah Ta’ala. Dimoune ki faire li en cachiette li capave gagne la chance être gracié parceki li reconnaite ki li pé faire ene erreur. C’est acoze ça ki li pas faire li au claire. Li encore ena ene ti pé la honte et la pudeur. Acoze ça dans l’avenir li capave faire tawbah. Ena l’espoir ki li pou repentir et corrige so erreur. Le fait ki li faire li en cachiette, alors li pas pou ça dure-là aussi pou li repentir en cachiette et li dresse so la vie sans kikene conné. De l’autre coté le méfait de so péché li restreint à li même. Li pas vine encouragement pou lezot.

Par contre ene dimoune ki commette péché en public au vu et au su de tout un chacun, li vine ene dimoune sans pudeur et sans l’amour propre. Et c’est le sens de la honte et pudeur même ki empêche ene dimoune faire kitchose ki pas bizin mais quand ça li sorti depi dans ene dimoune, li vine ene proie facile pou shaitaan. Li joué avec li couma li content. Li vine en dehors control et li faire ceki li envi et ceki li trouve bon.

D’après ene hadice ki trouve dans Shahih Boukhari, Rassouloullah ‎(Sallallaahou A'laihi Wasallam) fine dire :

"ان مما ادرك الناس من كلام النبوة اذا لم تستحيى فاصنع ما شئت"

«Parmi banne paroles de la prophétie ki l’humanité fine recevoir c’est quand ou nepli ena la honte, alors faire ceki ou envi. » (Boukhari)

Dans ene stage pareil, ene dimoune ena bien tigite l’espoir ki li capave changé. Li vine esclave de so nafs et de so passion. C’est ene étape bien difficile cote ene dimoune li tombe dans l’égarement et dans la bassesse par commette toute sorte bêtise malgré li capave possède ene grande connaissance de Deen. C’est ça même étape ki Allah Ta’ala faire mention dans Qour’aan-e-Kareem cote li dire :

افرأيت من اتخذ الهه هواه واضله الله على علم وختم على سمعه وقلبه وجعل على بصره غشوة فمن يهدى من بعد الله افلا تذكرون 

«Ki ou pensé lors ça dimoune ki fine faire so passion vine so ilaah et Allah fine égare li en depit de connaissance et fine mette scellé lors so zorreille, so le cœur et fine mette ene voile lors so lizié. (S45/V23)

Et normalement c’est manque de pudeur même ki faire ene dimoune commette banne bêtises en public. Et à la longue li pli vine sans pudeur et li vine dans ene stage cote li apprécié ceki li faire sans aukene dégout, remord et regret. C’est ene étape bien grave cote ene dimoune so façon voir les choses même fini débalancé. Li apprécié mauvais et vine allergique avec ceki bon. C’est acoze ça Nabi ‎(Sallallaahou A'laihi Wasallam) ti pé dimane doah dans ça terme-là :

« O Allah! Faire nou trouve la vérité comme la vérité et donne nou la volonté applique li. Et montré nou la fausseté comme la fausseté et donne nou la volonté évite li. »

En sus de ça, so l’attitude li représente ene genre de defi et affront à l’égard Allah Ta’ala et so Rassoul ‎(Sallallaahou A'laihi Wasallam)‎ ki bien bien grave. Donc ene dimoune ki faire péché en public li aggrave so sort pou banne raisons suivantes :

1. Li casse l’ordre Allah Ta’ala
2. Li vine ene moyen pou propage le mal et li vine ene encouragement pou lezot.
3. Li enlève graduellement le dégout de péché depi dans le cœur public.
4. Li défié la loi divine.
5. Li vine sans pudeur ki finalement empêche li ena regret ou remord lors ceki li faire. Donc li pas faire tawbah. Donc ene personne semblable li diminué so chance pou être gracié.

D’après ça hadice-là ene dimoune ki faire péché en cachiette et plitard li dévoile ceki li fine faire à so banne camarade aussi pou mérite même sort de ene personne ki commette péché en public sans aukene regret et sans pudeur. Et après ça li vine ene encouragement pou lezot ki pé faire li couma li incite lezot ki pencore faire li. Alors zotte encouragé pou faire li et banne ki déjà faire li, zotte continué faire li. Et banne ki pé pense pou arrête faire li, zotte affaibli dans zotte décision ki zotte fine prend. Et finalement zotte néglige l’idée pou arrête li.

A la lumière de ça hadice-là li recommandé pou pas dévoile aukene péché. Par exemple pas bizin laisse dimoune conné si fine manque namaz dans so l’heure. Acoze ça bizin remplace li dans la caze ou bien faire li dans ene façon ki pas laisse dimoune conné. Acoze ça si ene dimoune pé remplace so witr dans masjid, alors li bizin pas lève so la main pou faire takbeer avant lire Qounoute afin pou dimoune pas conné ki li fine manque namaz witr. Li bizin necque dire Allahou Akbar sans lève la main et li lire doa Qounoute.

D’après hadice ene dimoune ki vine ene moyen pou lezot faire ene péché, li continué gagne péché tanque banne dimoune continué faire ça péché-là. Nabi ‎(Sallallaahou A'laihi Wasallam) fine dire :

"... من سن فى الاسلام سنة سيئة كان عليه وزرها ووزر من عمل بها من بعده من غير ان ينقص من اوزارهم شئ " (مسلم)

« Celui ki introduire ene mauvais principe dans l’Islam, alors li pou ena so péché lors li et péché de banne ki pratique ça après li sans ki pou diminué kitchose depi dans zotte péché »

(Sahih Muslim)

Mette pantalon ziska cheville li haraam pou banne zomme. Coumsa même pas garde la barbe aussi li haraam pou banne zomme. Mangé boire publiquement dans la journée dans le mois de ramadaan aussi li haraam. Banne madames ki marche lors la rue sans pardah aussi li ene pratique interdit.

Eski ça banne péché-là pas inclure dans faire péché en public ? Donc so gravité li claire et évident. Ça causé ki dire « si pas pé cachiette avec Allah Ta’ala, alors ki faire bizin cachiette avec dimoune » li ene inspiration satanique.