Sadaqat-ul-Fitr

C’est ene sadaqah ou ene donation ki bizin tiré à l’occasion de Eid-ul-Fitr.

 Ki sanla bizin tire Sadaqat-ul-Fitr ?

Li obligatoire lors ene dimoune ki ena le moyen ou bien le nisaab.

 Ki veut dire Nisaab ?

Le nisaab c’est la valeur de 612 grammes l’argent ki ene dimoune ena dans so possession en excès de so banne nécessité de base.

Nécessité de base signifié ene dimoune so la caze, so moyen transport, so banne zoutil travail et aussi so banne dettes ki li doit dimoune. Ça valeur-là li capave dans n’importe ki forme. Li capave en forme. Li capave en forme la monnaie liquide ou en forme marchandises commerciales couma li capave en forme banne objets dans la caze ki pas servi et ki fine metté zisse pou faire joli couma banne meubles ou banne ustensile ki dimoune gardé zisse pou joli. Ene dimoune ki ena ene la caze ki fermé ou bien ki li pé loué et ki li pas dépanne lors-là pou so vive aussi li ene kitchose en plis de so banne nécessités de base. Coumsa même ene terrain ou ene la terre ki li enplis de ça la terre ki li pé resté-là aussi pou être compté en ceki concerne le nissab. Banne matériaux couma ciment, disable, block, ferraille ki capave fine resté après construction pou compté dans banne kitchose en plis de so nécessité.

Dimoune ki ena ça valeur-là en forme ene seul item ou bien en forme plusieurs items ki li en excès de so banne nécessités de base et so banne dettes ki li doit, alors li ena le nissab. Donc li bizin tire sadaqat-ul-fitr.

.

Sadaqat-ul-fitr pou banne zenfants

Ene dimoune ki ena nisaab, li bizin tire sadaqat-ul-fitr pou li même d’abord et pou so banne zenfants mineurs. Si jamais zenfant-là li possède li nisaab, alors so papa capave servi depi dans so la monnaie même pou tire so sadaqah

Sadaqat-ul-fitr pou banne zenfants ki majeurs

Quant à ene zenfant majeur, so papa pas obligé tire sadaqat-ul-fitr pou li.  A moins si ça zenfant-là li pas sain d’esprit, alors so papa capave tire depi là-dans même pou donne so sadaqah.

Sadaqat-ul-fitr de la part madame

Ene missié li pas obligé tire sadaqat-ul-fitr de la part so madame. C’est madame-là même ki bizin tiré si li ena moyen. Mais si missié-là tire li avec l’autorisation so madame, alors ça aussi li pou correcte.

Quand sadaqat-ul-fitr vine waajib?

sadaqat-ul-fitr li vine waajib apartir subh swadiq ou bien quand l’heure namaz fajar rentré le jour de Eid. Ene dimoune ki fine mort avant ça l’heure-là ou bien ene ti bébé ki fine prend naissance après ça l’heure-là, alors sadaqat-ul-fitr pas pou appliqué lors zotte. C’est necque banne dimoune ki zotte réussi gagne ça l’heure-là quand namaz faraz pé rentré le jour de Eid ki sadaqat-ul-fitr pou appliqué lors zotte. Aster si malgré ça ene dimoune li envi tire sadaqat-ul-fitr pou ene proche ki fine fini mort avant ça ou ene bébé ki fine né après ça, alors li pou endroit faire mais li pas obligatoire.

Meilleur l’heure pou tire ça sadaqat-ul-fitr là c’est avant sorti pou alle faire namaz Eid. Mais capave tire li avant. Li capave dans ramadhaan ou avant ramadhaan aussi. Si jamais li pas réussi tire li le jour de Eid, alors ça pou reste ene dette lors li tanque li pas tire li.

Sadaqat-ul-fitr pou ene dimoune ki pas garde Roza

Quand ene dimoune li ena le moyen ki atteigne le nisaab, alors li obligé tire sadaqat-ul-fitr quand même si li pas fine capave garde roza acoze vieillesse, maladie ou pou ene l’autre raison. Coumsa même si ene dimoune pas fine garde roza par négligence, alors li aussi li bizin tire so sadaqat-ul-fitr parceki ça sadaqah-là li pas waajib lors banne ki garde roza seulement.

 La valeur Sadaqat-ul-fitr

D’après hadice, bizin tire ene Sa’a l’orge ou bien ene Sa’a raisin sec ou bien demi  Sa’a du blé. Sa’a c’est ene mesure ki égal à 3271 gramme d’après certaine calcul. Et d’après ene l’autre estimation li égal à 7 kilos. Comme précaution li bon pou estime li à 7 kilos. D’ailleurs dan ibaadat nou bizin opté le coté ki pli dans sur. Donc la moitié Sa’a pou tombe 3 lbs et demi.

Ene dimoune li libre pou choisir ene de ça banne items-là pou donne so fitra couma li ena droit donne la valeur de ene de ça banne items-là en la monnaie liquide. Coumsa même li capave donne la valeur de ene de ça banne items-là en forme ene l’autre l’article. Mais li bizin toujours évalué la qualité moyenne de ça banne items-là. Par exemple si la valeur de 3½ lbs du blé li Rs 80/-, alors li capave acheté du riz ou bien du lait ou ene l’autre l’article et li donne ça en sadaqat-ul-fitr. Mais li pli bon ki li tire li en la monnaie liquide pou facilite le bénéficiaire servi ça d’après so nécessité.