Content Allah Ta'ala

Chaque musulman bizin content Allah Ta'ala. Sans content Allah Ta'ala na perna Imaan. Content Allah Ta'ala veut dire amene la vie couma Li Li oulé, pas couma ou ou oulé. Pas faire kitchose ki Li pas content.

Pas seulement bizin content Allah Ta'ala. Bizin content Li plis ki tout. Content Li (Allah) plis ki tout veut dire pas casse So l'ordre pou écoute les zot. Pas faire kikene plaisir quand sa casse l'ordre Allah Ta'ala.

Content Allah Ta'ala dimane nou pou content banne ki content Allah Ta'ala parceki camarade So camarade li ene camarade. Content Allah Ta'ala dimane nou pou reste loin avec banne ki pas content Allah Ta'ala parceki camarade So l'ennemi li ene l'ennemi. Concernant banne ki content Allah Ta'ala et banne ki Allah Ta'ala content zotte, Allah Ta'ala dire :

"... zotte gentil envers banne croyants et bien dur envers banne non croyants..." (Al Maaïdah - S5:V54)

"... zotte bien dur envers banne non croyants et zotte sympathique entre zotte même..." (Al Fath - S48:V29)

"... ou pas pou trouve ene groupe de personnes ki ena Imaan lors Allah Ta'ala et lors dernier jour ki zotte garde l'amitié avec banne ki oppose Allah et So Rasoul ‎(Sallallaahou A'laihi Wasallam)‎..." (Al Moujaadalah - S58:V22)

[Extrait de Al Jamiat Vol.1 No.3]