Lailat-oul-Qadr

Parmi banne nuits ki rempli de bien-faits et de bénédiction, nou éna ene la nuit ki appelle Lailat-oul-Qadr. Ene de banne raisons ki nou appelle sa nuit là Lailat-oul-Qadr c'est ki sa la nuit là li ene la nuit de grande valeur. C'est ene nuit de grande valeur à coze ki Allah Ta'ala finne choisir sa nuit là pou révèle Qur' aan-e-Kareem.

"Non finne descende sa (livre-là) dans la nuit de Qadr." (V1:S97) C'est à dire Allah Ta'ala fine descende entier Qur'aan depi dans "Lauh Mahfouz" à ene l'endroit ki appelle Bait-oul-'Izzah dans sa la nuit là même.

Sa nuit de valeur là ou bien Lailat-oul-Qadr li trouve dans le mois de Ramadwan.

"Le mois de Ramadwan c'est le mois ki Qur'aan finne être révélé..." (V185:S2)

Li difficile pou dire exactement dans ki nuit sa nuit béni là trouvé. Ena à peu près 40 différents l'opinion lors la. Mais d'après plus beaucoup hadices et banne hadices pli authentique ena pli boucoup possibilité ki sa la nuit là trouve dans ene de banne nuit non paire de dernier dix jours de Ramadwan. Coumma 21eme, 23eme, 25eme, 27eme et 29eme nuit. Et la-dans aussi, ena pli boucoup chance trouve li dans 27eme nuit. Mais narien pas sure à 100 pou 100. Donc dans l'espoir 27eme, faudré pas néglige 21eme, 23eme et 25eme. Et faudré pas blié ki ena encore ene chance le 29eme après 27eme.

Rassouloullah ‎(Sallallaahou A'laihi Wasallam)‎ : fine recommande pou cherche sa nuit là. C'est ene de banne raisons pou laquelle Rassouloullah ‎(Sallallaahou A'laihi Wasallam)‎ ti pé observe I'tikaaf dans les derniers dix jours de Ramadwan. C'est dans sa nuit là même Allah Ta'ala décrète tous banne kikchoses ki pou arrivé pendant toute longue l'année.

"La dans même décrète tous banne kikchoses importants..." (V4:S44)

Rassouloullah ‎(Sallallaahou A'laihi Wasallam)‎ fine dire :

"Celui ki fine faire ibaadat pendant la nuit de Qadr avec conviction et l'espoir pou gagne récompense, li pou être gracié pou tout so banne péchés ki finne passé." (Boukhari / Muslim)

Si ene dimoune faire so namaz Maghrib et Esha avec jamaate tous les jours dans Ramadwan, et apart sa li faire so 20 rakaat tarawih et avant l'heure sehri li faire 2 ou 4 rakaat tahajjud, ena boucou l'espoir ki li pou bénéficié avec bénédiction et bienfait de Lailat-oul-Qadr.

Ki Allah Ta'ala accorde nou tous le taufeeq pou faire ibaadat dans sa la nuit là. Ameen!

 [Extrait de Al Jamiat Vol.1 No.4 et Vol. 1 No. 15]