Ene regret nissa jeunesse

Mo ena ene grand regret dans mo la vie. Mo pas ti a content ki toi aussi to passe la-dans. Mo senti ki mo fine gaspille mo le temps, mo l'énergie et mo courage dans banne kikchose futile et inutile. Dans nissa jeunesse mo pas ti réalisé ki ena ene l'étape de vieillesse aussi cote ena des fois to vine ene fardeau pou même banne ki to fine donne zotte tout de toi.

Mo pas oulé trouve toi dans ene situation pareil ki apart ene regret irréparable, to pas capave faire nanien. To encore jeune. To ena tout to le temps. To ena courage. To ena l'énergie. Servi ça dans banne kitchoses ki pou ranne toi service. Pas gaspille to le temps dans faire plaisir sanla ou l'autre-là. Ena ene seul façon cote to capave ranne to la vie utile et valeureux. To fine reste dans l'esclavage tout ça le temps la. Astere vine pou Allah Ta'ala. Banker to pas pou perdi. Tout le temps to pou heureux.

Rassouloullah ‎(Sallallaahou A'laihi Wasallam)‎ fine dire: "Ena deux faveurs ki boucou dimounes faire défaite la-dans: la santé et le temps libre."

Bien rare, dimoune ena les deux et zotte bénéficié avec zotte couma bizin. Si to ena ene, to pena l'autre. Et si to ena tous les deux, c'est ene grand faveur Allah ki bizin conne bénéficié.

Pas laisse le temps perdi

Pas gaspille to l’energie

Profite avec ceki to ena zordi

Pou demain pena aukene garantie

[Extrait de Al Jamiat Vol.1 No.6]