Ilm

'Ilm signifié connaissance. Mais la connaissance ou 'Ilm ki Quraan-e-Kareem et hadice de nou Nabi ‎(Sallallaahou A'laihi Wasallam)‎ fine encouragé pou acquérir c'est 'Ilm (connaissance) concernant Deen.

Deen li basé principalement lors deux sources: Quraan-e-Kareem et hadice. Donc 'Ilm d'après Shari'ah c'est la connaissance de Quraan-e-Kareem et hadice.

‘Aalim

Tous dimoune ki capave faire ene deux calcul ou ki capave balance ene deux comptes pas appelle li comptable. Parceki ene comptable li suivre banne règlements et banne principes pou faire ça travail-là ki ene dimoune ordinaire pas conné. Coumsa même ene dimoune ki conne traduction ene deux versets Quraan-e-Kareem ou traduction ene deux hadices pas appelle 'Aalim. Parceki 'Aalim c'est ene kikene ki ena l'aptitude et capacité pou comprend Quraan-e-Kareem et hadice. Normalement l'aptitude ou la compétence pou comprend Quraan-e-Kareem et hadice li depanne lors conne banne règlements et banne principes. Donc 'Aalim signifié ene personne ki fine développe l'aptitude et la compétence pou étudié particulièrement Quraan-e-Kareem et hadices avec so banne principes et so banne règlements.

Zordi jour quand nou dire kikene 'Aalim, ça pas nécessairement signifié ki li conne beaucoup kitchoses. Mais par cela nou signifié ene kikene ki fine suivre l’instruction pendant quelques années ki permette li étudié, analysé et comprend Quraan-e-Kareem et hadices en appliquant banne principes et règlements établi. Li couma ene personne ki pas conne beaucoup l'endroit mais ki ena ene permis conduire ki permette li alle partout en appliquant banne techniques ki li fine apprane pou conduire ene machine.

Veritable ilm

Ene vrai connaissance ('Ilm Haqeeqi) c'est ene 'Ilm ki pénétré dans le coeur et ki force ou pou agir. Li pas ene connaissance ki reste renfermé dans les limites de savoir seulement. Parceki ça qualité connaissance-là banne non musulmans aussi ena li. Au contraire ena ene quantité dans banne non musulmans ki ena informations lors l'Islam plis ki banne musulmans. Donc "Ilm Haqeeqi" (véritable 'Ilm) c'est ene connaissance ki depasse la forme théorique pou accède au stage de conviction ki pas capave reste sans manifesté dans le comportement et la pratique de ene personne. C'est-à-dire c'est ene connaissance ki pas reste seulement lors la langue mais ki desanne dans le coeur. A ce point-là, la personne pas capave reste sans mette en pratique ceki li conné!

Veritable 'aalim

Ene vrai 'Aalim c'est quelqu'un ki pas contente li avec conne Deen seulement. Mais c'est ene kikene ki ena la frayeur Allah Ta'ala ki force li agir d'après connaissance ki li ena. " ... C'est necque banne ki "Aalim parmi so banne serviteurs ki peur Allah ..." (S35/V28)

Ene vrai 'Aalim c'est quelqu'un ki convaincu par so connaissance ki pas permette li agir conte ceki li conné. Ene personne pareil ena trois signes:‑

1. Désintéressement avec le monde de déception,

2. Inclination totale vers le monde d'éternité et

3. Préparation pou la mort avant so l'avènement.

'Ilm-ul-ghaib

Personne pas conné dans ki l'endroit li pou mort. Coumsa même personne pas conné quand li pou mort. C'est ene de banne connaissance ki Allah Ta'ala fine cachiette li ki personne pas conné. Allah Ta'ala li tout seul conne ça.

"... et personne pas conné dans ki l'endroit li pou mort ... " (S31/V34)

Ene connaissance coumsa appelle li 'Ilm-ul-ghaib ou bien la connaissance de l'invisible. Ene connaissance pareil c'est necque Allah Ta'ala ki conné.

"... le ghaib (connaissance de l'invisible) li appartenir à seulement Allah ..." (S10/V20)

"Certainement Allah li le connaisseur de ghaib (invisible ou non détectable) ki trouve dans le ciel et dans la terre ... " (S35/V38)

"Dire: mo pas dire zotte ki mo ena banne trésors Allah cote moi. Et mo pas conne le 'ghaib'..." (S6/ V50)

'Aalim-ul-ghaib

Celui ki conne ghaib par li même sans kikene montré li, appelle li 'Alim-ul-Ghaib. C'est necque Allah Ta'ala ki conne tout ceki cachiette et tout ceki au clair par li même sans passe par kikene. Donc c'est necque Allah Ta'ala ki 'Alim-Ul-Ghaib. "Li, c'est Allah ki perna l'autre apart li ki mérite d'être adoré. Li le connaisseur (le ghaib (invisible et non détectable) et de Shahaadah (visible) ..." (S59/V22)

Naba-ul-ghaib

Cote li nécessaire, ena certaine informations de ghaib ki Allah Ta'ala faire so banne Nabi conné à travers wahi (révélation).

"... li même 'Alim-ul-ghaib (connaisseur de l'invisible). Donc li pas informe personne de (ene parti) so ghaib à moins ene kikene ki li (Allah), fine choisir li comme "Rassoul" (messager) ..." (S72/V26-27)

"Et Allah pas pou mette zotte au courant de ghaib. Mais Allah li choisir celui ki li oulé parmi so banne messagers (pou ça) ..." (S3/V179)

Quraan-e-Kareem appelle ça banne informations-là "Ambaa-ul-ghaib" (les informations de l'invisible). Ambaa c'est le pluriel de "Naba" ki signifié information.

"C'est banne kikchoses ki .forme parti dans "Ambaa-ul-ghaib" (informations de l'invisible) ki nou pé révèle ça envers ou. (C'est ene banne informations) ki avant ça ni ou, ou ti conné ni ou peuple." (S11/V49)

Coumsa même banne informations et détails concernant jannat, jahannam, punition dans Qabar et aussi banne kitchoses ki pou arrivé dans l'avenir c'est banne ambaa-ul-ghaib ki pena aukene moyen conne ça sans ki Allah Ta'ala faire conné.

Ça banne kitchoses-là Allah Ta'ala fine faire so Nabi ‎(Sallallaahou A'laihi Wasallam)‎ conné à travers Wahi (révélation) et Nabi ‎(Sallallaahou A'laihi Wasallam)‎ fine transmette ça à l'Oummah en entier.

Imaan lors ghaib

Ghaib c'est ene kitchose ki pas capave détecté et ki pas capave conné par banne moyens ki nou ena. C'est ene kichose ki aukene l'appareil ou aukene machine pas capave détecté. C'est ene kitchose ki so connaissance depanne totalement lor Wahi (révélation).

Par exemple banne détails lor Jannat, Jahannam, Arsh (trône), Meezaan (balance) et Qabar etc... c'est banne détails ki pas capave conné sans Allah Ta'ala faire conné par Wahi. L'Oummah fine conne ça par Nabi ‎(Sallallaahou A'laihi Wasallam)‎. Croire dans ça banne kitchose-là uniquement lors confiance de Nabi ‎(Sallallaahou A'laihi Wasallam)‎ appelle Imaan bil-ghaib.

"Alif-Lam-Meem. C'est ene livre ki na perna doute du tout la-dans. Li ene guide pou banne Mouttaqui (pieux); banne ki croire dans ghaib." (S2/V1-3) 

[Extrait de Al Jamiat Vol.1 No.7]