Conaissance

Jahaalat et nafsaniyyat

Jahaalat ou bien l’ignorance li pas ene erreur mais continué reste là-dans, ça définitivement li ene très grave erreur. Ene dimoune li bizin apprane ene quantité ki permette li pratique so Deen. Ça quantité-là li faraz (obligatoire) lors chaque musulman. Par exemple ene musulman li obligatoire lors li pou apprane couma faire ghussal, wazou et couma faire namaz. Coumsa même li obligatoire lors chaque musulman pou apprane lire Qur’aan correctement. Ça li faraz. Négligence dans apprane lire Qur’aan-e-Kareem correctement li ene erreur grave.

Déclare conné

Ene ki déclare conné ceki li pas conné pou reste toujours pas conné quand même li mette li dans rang de banne ki conné. Parceki ene dimoune ki conné li bizin conné ki li pas conné.

[Extrait de Al Jamiat Vol.5 No.13]

Priorité dans la vie

Waajib veut dire ene kitchose ki obligatoire. Coumsa même faraz aussi li signifié ene pratique obligatoire. Mais techniquement ena différence entre les deux. Ene pratique faraz li basé lors ene preuve ki catégorique. Donc so degré de obligation aussi li pli fort. Par contre preuve de ene pratique waajib li pas ça catégorique-là. Ena ene ti réserve et manquement dans so degré de obligation. Acoze ça li pli moins ki faraz.

Aveugle et sourde

Ene ti groupe Ulama ki sincère li sufi pou occupe travail de Deen. Mais en l’absence de sincérité, zotte pas pou plis ki bagasse inservable. Ene ‘Alim li pas vine ene grand ‘Alim et bon ‘Alim quand li coze buku. Mais li servi la communauté avec efficacité quand li coze ceki bizin cozé. Sinon ou capave trouve grand-grand programme ki organisé pou réfuté. Zotte capave réfuté ceki pas existé. Zotte rode l’adresse Allah Ta’ala mais en même temps zotte paraite aveugle et sourde ki pas laisse zotte tanne ça banne concert musical ki pé organisé-là.

Ene connaissance valable

Ene connaissance valable c’est ene connaissance ki dessane et pénétré dans le cœur et ki développe la frayeur Allah Ta’ala. Quand ça dessane dans le cœur, li empêche la personne faire le contraire de ceki li conné. Acoze ça ene vrai aalim c’est ene personne ki applique so connaissance avec toute l’honnêteté et sincérité par la frayeur Allah Ta’ala ki li ena dans so le cœur. Li pas hésité pou cause la vérité. L’amitié, camaraderie ou bonne relation avec kikene pas empêche li cause la vérité. Ceki li faire, li faire li pou Allah Ta’ala.

Déclare conné ceki ou pas conné

Ene aalim ki pas hésité dire mo pas conné quand li pas conné, ça li pas diminué so valeur. Au contraire ça li indique so haute dimension de taqwa. Ça montré ki li pas hasardé dans repone banne questions concernant Deen. C’est necque ene aalim ki so l’esprit courte et ki pena taqwa ki déclare conne ceki li pas conné. Li peur tension dimoune dire ki li pas conné mais ça li pas bizin vine ene problème parceki pena narien si dimoune arrivé conné ki ou pas conné quand vraiment ou pas conné. Li bien mauvais ki ou déclare être ceki ou pas été.

Position ene aalim dans la société

Ene aalim dans la société li couma ferraille dans béton ou bien colonne vertébrale dans le corps ene dimoune. Ene lion dans la cour quand même li capave inactif mais li pou ene moyen pou empêche banne envahisseurs envahir ça la cour-là. Li ene protection, ene sécurité et ene garantie. Coumsa même ene aalim li ene garanti pou la bonne marche de ene société en ceki concerne Deen. So présence même dire boucou. Li capave pé paraite pas pé faire narien mais acoze so présence, ene quantité ki envi faire kitchose ki pas bizin pas capave faire narien.

Syndicate content