Jahaalat et nafsaniyyat

Jahaalat ou bien l’ignorance li pas ene erreur mais continué reste là-dans, ça définitivement li ene très grave erreur. Ene dimoune li bizin apprane ene quantité ki permette li pratique so Deen. Ça quantité-là li faraz (obligatoire) lors chaque musulman. Par exemple ene musulman li obligatoire lors li pou apprane couma faire ghussal, wazou et couma faire namaz. Coumsa même li obligatoire lors chaque musulman pou apprane lire Qur’aan correctement. Ça li faraz. Négligence dans apprane lire Qur’aan-e-Kareem correctement li ene erreur grave. Boucou dimoune dans ça erreur-là. Zotte pas conne lire li correctement. Et zotte pas faire zeffort aussi pou apprane. Zotte contente zotte avec ceki zotte conné-là.

Problème ki arrivé à n’importe ki niveau dans n’importe ki circonstance, ça li vine par pas conne Deen. Ça li aussi arrivé quand banne ki pas conné déclare conné et zotte induire dimoune dans l’erreur par propre connaissance. Ça aussi li ene niveau de jahaalat ki faire dimoune ki pas conné déclare conné ceki li pas conné.

Parfois ene dimoune li pas conné ki li pas conné. Dans tout so guetté li conné parceki li fine apprane ça quelque part ou bien li fine tanne kikene cozé. Mais malheureusement li fine mal comprend. Et li rode applique ceki li pas fine comprend avec l’impression ki ça même ki vrai. Ça aussi li ene niveau de jahalat ki crée problème dans la société. Pli grand problème ou gagné quand ou corrige ça dimoune-là. Li pou toujours croire ki c’est ou ki dans l’erreur. Ti ena ene l’époque à Maurice quand banne dimoune ti croire ki bizin donne trois talaaq même pou capave séparé avec ene madame. Banne imam dans masjid ti pé exige pou donne trois talaaq quand kikene ti ena pou séparé avec so madame. Acoze ça combien ménage fine brisé pou tout le temps ki ti capave réparé par renouvellé nikah si ti conne donne talaaq dans la façon ki bizin donné. En réalité, li sufi pou donne ene seul talaaq pou séparé avec ene madame. L’avantage ki ena dans donne ene seul talaaq ki ça li laisse ene chemin de réconciliation ouvert sans prive madame-là de so liberté pou faire so l’avenir ailleurs. Mais acoze jahaalat, combien ménage fine vine irréparable. Apres talaaq, dimoune-là fine regretté mais dommage pas fine capave réparé. Négligence et erreur fine cozé par jahaalat et l’ignorance. Pou répare ça banne dérapage-là bizin remédié la maladie de jahaalat. Et solution de jahaalat c’est Ilm-e-Deen, c'est-à-dire connaissance de Deen. Et connaissance de Deen li vine par aprane.

Ena ene lot maladie ki pli grave ki ça et ki capave dévasté la societé c’est nafsaniyyat.

Ki veut dire nafsaniyyat ?

Pou être pli simple, nou capave appelle li l’intérêt personnel, desir ou passion. Ou bien ene l’état ou ene mentalité ki faire dimoune considère ene lot facteur au lieu de Shariah pou prend ene décision. Ça mentalité-là li pli faille ki jahaalat parceki ene dimoune so connaissance pas servi li narien quand li ena li. Li faire li coupé tranché pou justifié l’injustifiable. Li capave faire la boisson vine halal. Li prouve so droit cote li pena droit. Li donne so madame talaaq et après ça li vine prouvé ki talaaq pas fine compté. Toute ene séries de mensonge, faussetés et l’égarement capave être masqué et maquillé pou donne coup d’œil de Deen. Li faire ene dimoune vive pou so l’intérêt personnel et pou so désir et plaisir. Dans ça sens-là, nafsaniyyat li vine en opposition de Ikhlas et la sincérité ki faire ene dimoune vive zisse pou le plaisir Allah Ta’ala. La quantité la joie la sincérité li amène dans la vie ene dimoune, ça quantité-là même désagréable li ranne la vie ene dimoune ki ena nafsaniyyat. Li dénigré li à tel point ki li vine esclave de so passion et de so désir.

La société pou capave débarrassé de tous banne problèmes ki ena à n’importe ki niveau necque à travers Ilm-e-Deen et Ikhlaas. Ilm-e-Deen li indique la vrai direction et Ikhlaas li aide pou implémente correctement et convenablement la connaissance ki ene dimoune ena.

[Extrait de Al Jamiat Vol.7 No.15]