Conaissance

Bonne frequentation

D’après hadice, fréquente bon dimoune li couma dire nou pé fréquente ene dimoune ki ena parfum. Ene dimoune pareil, li capave donne ene tigite parfum ki li ena ou bien ou capave acheté si ou ena le moyen. Sinon de toute façon nou capave senti so bon parfum. Par contre ene mauvaise fréquentation li couma dire ou alle cote forgeron ki pé souffler dans four. Si li pas brule ou linge, alors de toute façon ou pou gagne so mauvais l’odeur. Bonne fréquentation li ena toujours ene bon l’influence.

Deen

Deen li très important dans la vie ene dimoune. Deen c’est ça façon de vive ki Allah Ta’ala oulé insaan vive li. Et ça façon de vive-là appelle Islam. C’est necque ça même façon de vive ki acceptable dans lizié Allah Ta’ala. Pena aukene façon de vive ki valable. Celui ki choisir ene l’autre façon apart Deen Islam, alors ça li pou être rejeté. La personne li même pou ene grand coupable divant Allah Ta’ala. Li pou être sanctionné par banne punitions bien sévère ziska ki li capave alle dans l’enfer pou tout le temps aussi.

La vraie connaissance

L’oummah so maladie li trouve plutôt dans faiblesse et manque de croyance ki manque de connaissance. Sinon pas manque dimoune lors ça la terre-là ki ena B.A, M.A, Phd ou encore banne degré ki capave monte ziska le ciel ou bien ki bizin ene longue l’échelle pou arrive là-bas. Mais malgré sa, parfois zotte pas arrivé comprend ki la vraie connaissance li pas ça kitchose ki nou apprane dans livre ou bien par gagne banne degrés. Ça li trouve dans gagne ene Noor ki pénétré dans le cœur et ki faire tout banne doute disparaite depi dans le cœur.

Conseil de Imam Malik (R) à Imam Shafi (R)

"Allah Ta’ala fine projette ene noor (lumière) dans to le cœur. Pas teigne ça avec banne péchés."

Ene vrai connaisseur

Ene dimoune ki vraiment ena connaissance c’est ene dimoune ki à force aprane, fine arrivé conné ki quantité ki li pas conné. Li trouve ceki li conné divant ceki li pas conné, couma dire li pas conné. Et ça faire li courbé avec so l’âme et so le corps divant le vrai connaisseur Allah Ta’ala ki conne tout. En retour de so humilité, Allah Ta’ala honore li et accorde li ene connaissance ki pas gagné dans livre. Ene connaissance ki faire li trouve ceki lezot pas trouvé.

Ene dernier imbécile

Ene branche ki bien chargé, li pou toujours versé. Et ene drome ki vide pou faire tapaze plis ki bizin. Si ça li vrai, alors ça aussi li vrai ki dimoune ki vraiment ena kitchose dans li, li pou toujours humble. Et en principe, ene dimoune ki pena narien même ki ena tendance cause boucou pou faire croire ki li ene terrible. Celui ki croire ki li ene terrible et personne pas pou capave faire li narien, pé faire li même ene grand ditort. Parceki si li fine sapé avec insaan, li pas pou sapé avec Allah Ta’ala.

Allah pli conné

"Ene (véritable) aalim pas honté pou dire ki Allah pli conné quand li arrivé pas conne ene kitchose." (Hazrat Ali ‎(Radiyallahou anhou‎)‎) Mouswannaf Abdurrazzaaq

[Extrait de Al Jamiat Vol.5 No.6]

Syndicate content