Deen

Deen li très important dans la vie ene dimoune. Deen c’est ça façon de vive ki Allah Ta’ala oulé insaan vive li. Et ça façon de vive-là appelle Islam. C’est necque ça même façon de vive ki acceptable dans lizié Allah Ta’ala. Pena aukene façon de vive ki valable. Celui ki choisir ene l’autre façon apart Deen Islam, alors ça li pou être rejeté. La personne li même pou ene grand coupable divant Allah Ta’ala. Li pou être sanctionné par banne punitions bien sévère ziska ki li capave alle dans l’enfer pou tout le temps aussi.

Allah Ta’ala fine envoye à peu prés 124,000 Nabi dans plusieurs l’époque pou transmette le message à l’humanité. Ça li sufi pou montré l’importance ki attaché avec ça façon de vive-là. Ça façon de vive-là fine transmette en dernier lieu par nou Nabi Hazrat Mouhammad ‎(Sallallaahou A'laihi Wasallam)‎. Pena aukene Nabi ki pou vini après li. Ça veut dire la façon de vive ki pou reste en vigueur ziska qiyaamah, c’est ça façon ki fine enseigné par nou bien aimé Nabi Hazrat Mouhammad ‎(Sallallaahou A'laihi Wasallam)‎. Et adopté ça façon de vive-là li indispensable pou être ene vrai mou’mine (croyant). Rasouloullah ‎(Sallallaahou A'laihi Wasallam)‎ fine dire :

"لا يومن احدكم حتى يكون هواه تبعا لما جئت به"

« Personne parmi ou pas pou capave vine ene (véritable) mou’mine (croyant) tanque ki so désir pas vine sous control de ça message ki mo fine amené. »

Le bien-être réel li trouve dans suive deen. Li important pou le bien-être dans dounia et dans akhirat. Acoze ça bizin guette bien avec ki sanla ou pé apprane vive ça deen-là. L’importance ki ene dimoune li ena pou so la santé physique faire li choisir ene des milliers médecins. Coumsa même ene dimoune ki conne vrai valeur deen, li pou choisir ene kikene ki compétent pou apprane so deen. Si ene mauvais choix dans médecin capave coute ou ou la vie, ene erreur dans choisir dimoune ki pou enseigne ou deen capave enlève ou deen et ou Imaan.

Sans ene bonne santé ene dimoune li pas perdi so bien être pou tout le temps. Par contre sans Imaan ene dimoune pou souffert éternellement. Si la santé physique li important, alors la santé spirituelle li pli important. Donc li boucou pli important ki nou guette bien avant nou choisir kikene pou apprane deen avec li.

Acoze ça nou bizin pas trop apprane deen à travers internet. Ça façon apprane deen-là souvent li erroné et deviant. Nou capave servi ça zisse pou gagne ene l’idée ki capave être confirmé avec banne ‘Oulama dans localité avant mette li en pratique.

Meilleur façon pou apprane deen c’est apprane li avec banne ‘Oulama dans localité ki compétent et intègre. Et en principe bizin guette compétence et intégrité ene personne avant apprane deen avec li. La compétence pas sufi pou apprane deen avec kikene si li pas intègre parceki li capave induire ou dans l’erreur avec propre connaissance acoze so banne l’avantages personnel. Coumsa même l’intégrité ene dimoune aussi pas sufi si li pas compétent parceki li capave mette ou dans l’erreur sans li conné. Li facile pou conne ene dimoune quand li divant ou dans ou pays ou bien dans ou l’endroit. Donc li meilleur pou apprane deen avec ene dimoune ki ou conné.

[Extrait de Al Jamiat Vol.6 No.8]