Bonne frequentation

D’après hadice, fréquente bon dimoune li couma dire nou pé fréquente ene dimoune ki ena parfum. Ene dimoune pareil, li capave donne ene tigite parfum ki li ena ou bien ou capave acheté si ou ena le moyen. Sinon de toute façon nou capave senti so bon parfum. Par contre ene mauvaise fréquentation li couma dire ou alle cote forgeron ki pé souffler dans four. Si li pas brule ou linge, alors de toute façon ou pou gagne so mauvais l’odeur. Bonne fréquentation li ena toujours ene bon l’influence. Et mauvaise fréquentation li ena so so l’effet négatif et li gâte image ene dimoune dans la société. Et li très normal si dimoune juge ou d’après milieu ki ou fréquenté.

Quand nou dire fréquentation, ça li pas restreint à ene fréquentation physique. Li comprend toute sorte contact. Ça li capave par téléphone, portable, chatting et par tous banne moyens de communication. Alors li très important pou guette bien ça dimoune ki nou pé communiqué avec li parceki ena risque ki ça li change ou tendance dans ene façon bien pas bon. Li capave cariate ou l’esprit et ou raisonnement si ou fine fauté dans ou choix. Et ça probabilité ki nou pou fauté-là li existé à ene pourcentage bien fort. Donc li pas ene simple supposition. Li ene zafaire presque dans sire. Mauvais contact pou reste mauvais même quand même nou fer li avec bon l’intention. Mais ena des fois nou capave alle tombe dans piège dans faire ene bon kitchose quand nou mal faire nou choix. Par exemple nou rente dans ene site pou apprane Deen. Mais malheureusement nou pas gagne ceki bizin gagné. Banne ‘Oulama dans ou localité zotte capave pé montré ou bon kitchose mais ou pou continué accepté et croire ceki ou fine gagné lors l’écran, surtout si ou fine gagne quelque chose ki li dans ou l’avantage. Alors bizin être prudent.

[Extrait de Al Jamiat Vol.6 No.10]