Priorité dans la vie

Waajib veut dire ene kitchose ki obligatoire. Coumsa même faraz aussi li signifié ene pratique obligatoire. Mais techniquement ena différence entre les deux. Ene pratique faraz li basé lors ene preuve ki catégorique. Donc so degré de obligation aussi li pli fort. Par contre preuve de ene pratique waajib li pas ça catégorique-là. Ena ene ti réserve et manquement dans so degré de obligation. Acoze ça li pli moins ki faraz.

Ene de banne l’avantage pou conne le degré de chaque pratique, nou trouve li quand nou ena ene tigite le temps ki permette nou faire ene pratique ou l’autre. Dans ça situation-là si nou conne le degré de ça deux pratiques-là, alors nou pou conné laquelle pratique ki nou bizin donne priorité. Nou pas pou faire l’erreur quitte ene pratique pli important acoze ene pratique moins important. Disons si soleil près pou levé et nou ena ene tigite le temps ki permette nou faire soit deux sounnat fajar ou bien les deux faraz fajar. Alors nou pou faire nou deux faraz. Similairement si nou trouve nou coincé entre faire ene kitchose ki faraz et ene l’autre kitchose ki waajib, alors acoze nou conne degré de ça deux pratiques-là, nou pou faire ceki faraz avant nou faire ceki waajib.

Acoze ça même manque de connaissance, ene quantité parmi nou pé commette ene quantité gaffe dans la vie à plizir niveau. Nou capave ena nou frère ou bien nou sœur ki dans grand difficulté financière. Mais bien tigite dans tigite et bien rare nou pou trouve kikene parmi nou ki pou ena la volonté et le courage pou supprime so umrah nafil afin ki li capave servi ça la monnaie-là pou aide so frère ou sœur ki dans difficulté.

Banne dépenses exorbitant démesuré et inutile ki nou faire dans mariage aussi capave inclus dans ça banne gaffes ki nou pé commette sans prend compte ça banne frères et sœurs ki pena banne kitchose de base pou zotte amène zotte la vie.

Ena ene catégorie infime ki pas faire li. Zotte raison li différent. Ena ki pas faire li acoze zotte pas content dépensé. Mais ceki vraiment bon c’est ça banne ki abstenir acoze ki li pas permette d’après shariah. Et ceki pli bon c’est banne ki abstenir acoze Deen et en sus de ça zotte réserve li pou capave servi cote li profitable. Et ça li inclure aide banne ki dans difficulté et problème. Ça troisième catégorie-là li bien bien rare. Banne Sahaba-e-Kiraam ti pé alle travail comme porteur dans bazaar zisse pou capave faire sadaqah. C’est ene façon exemplaire ki banne Sahaba-e-Kiraam fine présenté. Ene l’exemple ki nou pas trouve li répété partout.

Ça façon-là nou trouve li dans banne ki zotte le cœur fine grand ouvert pou aakhirat. Li incomparablement supérieure et meilleur ki dounia. Donc zotte fine vive ceki zotte fine comprend et donc zotte fine investir dounia pou récolté aakhirat. Ça c’est ene stage très avancé de ilm (connaissance) et ene degré de connaissance bien apart ki pas laisse la personne trahir ceki li conné. Li vive so connaissance et li accepté pou sacrifié so dounia pou sorte gagnant dans aakhirat.

C’est ça même manière ki faire ene dimoune préfère ene tigite halaal lors ene tas haraam. Li contente li avec l’emploi ki modeste acoze ki li halaal au lieu accepté ene grand poste ki bien prestigieux zisse acoze ki li haraam.

Ene dimoune ena ene quantité kitchose pou faire dans la vie. Ena kitchose ki dimoune-là trouve li important pou faire ki en réalité pas important. So le contraire aussi li bien vrai. C'est-à-dire ena banne kitchose ki li trouve li pas nécessaire mais pourtant li capave banne kitchose bien important ou même indispensable. L’erreur dans choisir ceki bizin faire, li faire dimoune gaspille so la vie derrière banne kitchose inutile au détriment de so bien être-réel. Ena ene seul moyen pou capave évite ça erreur-là. C’est suive Shariat parceki Shariat li définir l’importance de chaque mouvement, de chaque activité et de chaque pratique et li catégorise chakene so priorité et li guide dimoune pou accomplir chaque pratique dans so l’ordre prioritaire. Ena ene branche dans Shariat ki appelle fiqh. Ça même branche ki explique ça domaine-là. Par exemple zordi jour banne Ulama dire ki fodé pas trop rode pou embrasse Hajar Aswad. Dimoune capave pensé ki ene kitchose aussi vénéré pé décourage pou embrasse li pourtant li sounnat pou faire. Mais banne Ulama conné dans l’époque actuelle avec la foule li difficile pou faire li sans donne takleef. Donne takleef ene musulman li haraam et embrasse hajar aswad li sounnat. Eski li sage pou commette ene haraam zisse pou pratique ene sounnat ? Définitivement non. Nou conne ça banne raisonnement-là à travers banne fouqaha.

Coumsa même dans l’époque qourbaani, ena banne ki reste occupé et engagé dans faire qourbaani et dans partage la viande ziska ki zotte capave pas faire namaz Zohar aussi. Sans doute c’est ene erreur bien grave ki dimoune ena tendance pas prend compte. Vaut mieux pas faire ene qourbaani ki faire ou pas faire namaz dans l’heure ou soit li faire ou pas faire li même ditout.

Similairement ena boucou ki ratte zotte namaz dans l’heure pendant zotte voyage pou hajj. Mais pourtant banne Ulama dire ki hajj même pas vine faraz si ça li nécessite pas faire namaz dans so l’heure. Malgré ça, boucou dimoune aussi pas prend compte parceki zotte attache pli boucou l’importance avec hajj ki namaz. Acoze ça trouve ene quantité haaji be-namazi. C’est le manque de connaissance ki arrivé pas permette nou différencié entre important et pli important. Nou bizin conné ki pli important c’est namaz. Nou pas gagne droit sacrifié li pou ene kitchose ki moins important. Si ene dimoune vine dans ene situation acote soit li faire so namaz Esha dans l’heure et rate so présence dans ‘Arafah ki conséquemment pou faire li ratte so hajj ou bien li gagne so hajj mais li pou manque so Esha, alors selon certaine Ulama, li bizin pas ratte so Esha quand même ça faire li ratte so présence dans ‘Arafah. Li vrai ki acoze banne problèmes pratiques, ene groupe de Ulama conseille pou faire namaz en marchant pou pas ratte wouqouf dans ‘Arafah et après ça remplace namaz esha. D’après ça groupe de Ulama-là, li pas facile pou tout dimoune gagne l’occasion retourne Makkah pou remplace ça hajj-là. Acoze ça zotte fine choisir ene façon pou pas ratte hajj mais sans laisse ça l’heure-là traversé sans faire namaz Esha.

Pou comprend banne priorité dans nou la vie, nou bizin nécessairement suive recherche de ene catégorie de Ulama ki nou appelle banne fouqaha. Fouqaha c’est le pluriel de faqeeh ki signifié ene ‘alim ki li ene expert dans le domaine de fiqh. Boucou dimoune fine mal comprend fiqh. Zotte présente li en opposition avec Qur’aan et hadice. C’est ene erreur capital ki ene dimoune ki vraiment ena connaissance pas capave commette. Fiqh c’est l’essence et extrait de Qur’aan et hadice. Ene faqeeh c’est ene kikene ki maitrise ça domaine-là.

Ene faqeeh li définir structure de ene ibaadat. Li catégorise la valeur et l’importance de chaque parti de ene ibaadat. Par exemple nou prend namaz ki constitué de plizir parti et différent pièce. Ene faqeeh li montré chaque parti so statut et so degré de l’importance. Ça banne détails-là ene faqeeh li tire ça apartir Qur’aan-e-Kareem et hadice par servi certaine principes et règlements. C’est banne détails ki d’ordinairement banne dimoune pas conné et li pas à zotte porté. Li couma dire mantegue ki sorti depi dans du lait ki pas tout dimoune ki conne tire ça mais pourtant li trouve dans du lait même et li sorti depi là-dans même. Donc li bien difficile, pou pas dire impossible, pou gagne ene l’idée exact de ene pratique et pou comprend so structure sans suive recherche de ene faqeeh. Disons nou prend hajj ki constitué de plizir partis et différent rites. Ça banne partis-là pena le même degré et niveau de l’importance. C’est ene faqeeh ki définir et statué niveau de chaque parti. L’importance de tawaaf-e-ziyarat et l’indispensabilité de wouqouf-e-‘Arafah par rapport à hajj, nou apprane ça à travers recherche de ene faqeeh même. Sinon, nou ena tendance traite chaque parti de hajj à titre égal ou bien considère et attache l’importance à ene parti moins important, plis ki ene l’autre parti ki pli important.

Nou capave conne ene quantité kitchose avec tous so banne détails mais sans ki nou ena la volonté pou mette li en pratique. Par exemple nou tous conné ki valeur namaz tahajjud ena mais bien tigite parmi nou ki ena la volonté pratique li. La volonté pou mette en pratique ceki nou conné li dimane ene l’autre niveau de formation. Ça formation-là nou gagne li à travers banne mashaikh et banne soufia-e-kiraam. C’est banne personnages ki fine débarrasse zotte totalement de banne akhlaaq (caractère) malsain et fine inculqué dans zotte banne akhlaaq-e-hameedah (caractère noble). Zotte fine arrive à ça stage élevé et noble-là par moujahadah. Moujahadah c’est ene combat et ene la lutte ki ene dimoune li amené contre so banne passions et so banne désirs ki empêche li vine vers Allah Ta’ala. Ça combat-là li ene combat ki continué ziska dernier soupir de la vie. Ça combat-là li paraite bien difficile dans so stage préliminaire mais graduellement li vine facile et délicieux. Ene dimoune li bizin suive ça formation-là dans supervision ene ki fine déjà fini formé. Ça banne ki fine formé-là c’est banne mashaikh. Donc nou bizin suive banne fouqaha et banne mashaikh et soufia pou capave pratique Deen couma bizin. Sinon soit nou pas pou conne bien ceki nou bizin faire ou bien nou pas pou ena la volonté pratique ceki nou conné. Or li important pou conné ceki nou bizin faire et nou bizin ena la volonté pou pratique ceki nou conné.

[Extrait de Al Jamiat Vol.8 No.6]