Déclare conné ceki ou pas conné

Ene aalim ki pas hésité dire mo pas conné quand li pas conné, ça li pas diminué so valeur. Au contraire ça li indique so haute dimension de taqwa. Ça montré ki li pas hasardé dans repone banne questions concernant Deen. C’est necque ene aalim ki so l’esprit courte et ki pena taqwa ki déclare conne ceki li pas conné. Li peur tension dimoune dire ki li pas conné mais ça li pas bizin vine ene problème parceki pena narien si dimoune arrivé conné ki ou pas conné quand vraiment ou pas conné. Li bien mauvais ki ou déclare être ceki ou pas été. Et pli mauvais ki ça c’est quand ou oulé gagne crédit pou ene quelque chose ki ou pas fine faire. Arrive ene l’époque cote ou fini par croire être ceki ou pas été. C'est-à-dire ou alle gagne embêté dans embête lezot. Ça li déclenché par ene bien vilain manière ki appelle kibr (l’arrogance). Ça li dimane ene bon traitement. Sinon li pou coule la personne et li pou noye lezot aussi par mette zotte dans l’égarement. Faudré pas ene dimoune prend li pou spécial et apart. Li bizin conné ki li marché avec ene deux kilo malpropreté avec li. Et tous les jours li bizin débarrasse li de ça le matin quand li levé et le soir avant li alle dormi.

Considère ça vérité-là li amène humilité dans ene dimoune. L’arrogance ene dimoune li responsable ene quantité mauvais kitchose dans la société. Humilité li capave corrige ça anomalie-là et li capave dresse ene quantité situations ki capave paraite difficile. Acoze ça ene dimoune bizin toujours pense banne manquements ki définitivement tous dimoune même ena dans li avant ki li célébré so banne soi disant mérites.

Kikene fine dimane avec ene grand aalim : « Ki ou constat après ki ou fine vive ene longue carrière dans domaine de connaissance de Deen? » Ça grand aalim-là fine repone ki nou fine arrivé conné ki quantité nou pas conné. C'est-à-dire ceki ki li fine conné comparé à ceki li pas conné, li couma dire li pas fine conne narien ou bien li fine arrivé conné ki quantité ignorant li été. C’est ça même arrivé à ene grand aalim. Pli li apprane pli li découvert so l’ignorance au lieu li déclare li ene connaisseur. Par contre ene ki pas conné, li considère li ene terrible avec ene ti boute ki li fine tende-tendé. Par so imbécilité, parfois li prend li pou pli terrible ki ene aalim !

[Extrait de Al Jamiat Vol.8 No.2]