La jalousie

Souhaite malheur kikene en ceki concerne ene faveur ou ene bon kitchose ki li possédé appelle la jalousie. Par exemple si kikene so le coeur brûlé quand li trouve kikene dans bien et li souhaite so malheur, alors veut dire ki ça personne-là li jaloux ça personne dans bien-là.

Position la jalousie?

La jalousie li haraam et c'est ene l'attitude indigne ki ene personne adopté vis a vis so prochain. Dans ene hadice Rasouloullah ‎(Sallallaahou A'laihi Wasallam)‎ fine dire:

"La jalousie li mange banne bonne actions pareil couma du feu mange du bois." (Abou Dawood)

C'est ene facon pou vine en conflit avec décision Allah Ta'ala. Ene personne pareil jamais capave prospéré dans so la vie mondaine et dans aakhirat. Li reste tout le temps malheureux, triste et misérable. Li pas capave profite avec ene ti pé ki li ena dans reste pense pou faire du tort so prochain.

Couma combatte la jalousie

La jalousie aussi li ene maladie ki ena so remède et so solution couma tous banne maladies ena zotte remèdes. Avant nou cause lors remède, d'abord nou bizin conné ki faire ene dimoune jaloux so camarade et ki faire li pas jaloux so z'enfants? La réponse li claire ki li content so z'enfant. Li ena l'amitié avec so z'enfant ki faire li souhaite le progrès, le succès et l'avancement de so z'enfant. Ene laboureur pou toujours souhaité ki so z'enfants vine ene médecin, ene ingénieur etc. Jamais ça pas pou rende li jaloux. C'est parceki li ena l'amitié. Cote ena l'amitié, pena la rivalité. Donc pas pou ena la bestialité en forme de la jalousie.

Par contre avec ene étranger ou ene kikene ki ou pena l'amitié avec li, ou pou toujours ena tendance rivalise ou avec li. Cote pou ena la rivalité, pou ena bestialité en forme de la jalousie. Donc c'est ene manque de l'amitié, sincérité et l'affection ki développe ça maladie-là. Alors ça nécessite développe l'amitié, sincérité et l'affection pou capave combatte et résisté contre le virus de la jalousie.

Comment développe l'amitié?

D'abord bizin inculqué l'amour et l'amitié pou Allah Ta'ala dans le coeur. Et ça li réalisé uniquement dans reste dans l'obéissance Allah Ta'ala d'après le sounnah de Rasouloullah ‎(Sallallaahou A'laihi Wasallam)‎ sous l'instruction et supervision ene Sheikh Kaamil. Ene fois ça l'amitié-là fine pénétré, tout vine facile. Parceki l'amour et l'amitié ena ene genre de vitamine ki ranne tout kitchose facile. Continue reste éveillé quand pé gagne sommeil, pas mangé boire quand pé senti la faim, la soif et juska donne la vie, tout vine facile. C'est ene stage cote ene dimoune li pas vive pou li. Li vive pou le plaisir et dans le plaisir Allah Ta'ala. So goût et dégoût li motivé par le plaisir Allah Ta' ala. A ce stade-là li content so camarade acoze Allah Ta'ala. Li détesté li aussi acoze Allah Ta'ala.

Rasouloullah ‎(Sallallaahou A'laihi Wasallam)‎ fine dire: "Celui ki content à coze Allah, li éprouve l'enemité à coze Allah, li donné à coze Allah et li refusé à coze Allah - c'est ene kikene ki fine complète so lmaan." (Abou Dawood)

Voila comment l'amitié ki ene dimoune ena pou Allah faire li souhaite le bonheur de so prochain et ki empêche li mal agir par la jalousie.

[Extrait de Al Jamiat Vol.1 No.8]