Respect

De jour en jour le mot respect fine reste ene vocabulaire ziste pou barre place dans dictionnaire. Et parfois dimoune pé capave cause li aussi. Mais en pratique c'est ene kitchose ki fine vine presque inexistant. C'est ene virus ki fine contamine la société à tel point ki banne ki pretende ena connaissance oussi fine échoué pou comprend le vrai sens du respect. Pas seulement zotte pena respect pou banne 'Oulama de nos jours, zotte pena respect ziska même pou banne grand 'Oulama longtemps. Et dans certaine cas banne sahaabah (radwiyal-laahou 'anhoum) aussi pas sappé avec zotte. Zotte déclare conne Deen pli bien ki banne-là. Zotte faire campagne pou dénigré zotte et pou diminué zotte valeur. Mais c'est dans vide ki zotte pé faire tout sa la. Parceki quand ou tappe ou la tête avec ene roche, c'est ou la tête meme ki pou cassé! Roche-là pou reste intacte.

Le vrai "Noor" de Ilm-e-Deen (connaissance de Deen) li vine apartir respect pou banne 'Oulama. Sans respect, nou pou conne Deen couma banne occidents conné sans ki zotte ena la volonté pou mette li en pratique. La volonté pou mette Deen en pratique li vini quand Noor pénétré dans le coeur. Allah Ta'ala fine donne nou nourriture et de l'eau comme moyen pou faire la faim et la soif passé. Li même fine ordonne nou pou reste en compagnie de banne 'Oulama pou faire Noor descende dans nou le coeur. Si sans sa kikene oulé gagne "Noor" dans le coeur, li couma dire li oulé rempli so l'estomac sans nourriture.

[Extrait de Al Jamiat Vol.1 No.9]