Donne talaaq

Talaaq c'est ene moyen ou bien ene facilité ki shariat fine accordé pou mette fin à ene l'union conjugale ki nepli capave continué en respectant chakene so droit et banne limites ki Allah Ta'ala fine établi. Mais tanque capave bizin pas prononce li parceki c'est ene kitchose ki compté même dans badinage aussi. Acoze ça bizin prend boucou précaution et bizin faire ene maniere blié li.

Si trouve problème dans ménage pé continué même, alors d'abord bizin contacté ene ki conné et ki ena l'expérience ki capave donne banne conseils. Finalement si trouvé ki pena aukene solution apart séparer, alors essaye reste séparer sans donne talaaq pou quelque temps. Laisse le temps joué so role parceki parfois avec le temps ene dimoune arriver réalise so erreur. Peut être les deux parties capave saisi zotte manquement et zotte erreurs ki capave permette zotte réconcilié.

Donne ene sel talaaq

Si sa aussi pas marché, alors donne seulement ENE talaaq. Jamais donne deux ou trois talaaq. Li ene grand erreur donne plis ki ene talaaq. Faudré pas faire li. Et d'ailleurs pena aukene nécessité servi plis ki ene talaaq. Parceki le but pou donne talaaq, c'est la séparation. Et sa capave faire li avec ene sel.

L'avantage donne ene sel talaaq

Ena boucou l'avantage dans donne ene sel talaaq. D'abord ena presque trois mois pou la personne capave réfléchi. Si jamais li trouvé ki li fine mal faire alors dans certaine cas li capave retourne avec so madame sans faire Nikah couma dans certaine circonstance li capave faire li par renouvelé so Nikah. Dans donne ene sel talaaq ena la possibilité retourne avec so madame juska même après trois mois aussi. Mais bizin renouvelé Nikah dans ce cas là. C'est-à-dire sa ménage-là capave re-arrangé par renouvelé Nikah ou bien sans renouvelé Nikah. Sa dépanne lors circonstance. Mais si fine trouvé ki li meilleur séparer même, alors pena pou faire narien. Necque ena pou maintenir lors sa ene sel talaaq-là. Apres trois période, madame-là pou en dehors Nikah automatiquement et pou libre pou faire ene l'autre ménage si li oulé.

Boucou dimoune croire ki ene madame li bizin absolument gagne so trois talaaq pou li capave remarié. Mais sa pas nécessaire. Li capave vine libre par ene talaaq aussi. Donc dans donne ene sel talaaq ena la possibilité retourne avec so premier missié couma li capave vine libre pou faire ene l'autre ménage.

[Extrait de Al Jamiat Vol.1 No.9]