Signe de beauté

Ene signe de beauté capave paraite ene vilain tache pou ene l'autre. Ça dépane avec ki regard ki ou guette ene kitchose. Ene ki guette so camarade avec ene regard rempli de l'affection, l'amitié et de l'appréciation, capave trouve la lune de l4eme nuit aussi inférieur divant so beauté. Mais ça même dimoune ena chance paraite ene dernier dimoune pou ene l'autre.

Ene-là so l'amitié fine faire li trouve so camarade ou bien so bien aimé pli joli ki la lune de 14eme nuit et l'autre-là so rancune et so l'ennemité fine faire li trouve ça même dimoune-là pli vilain ki tout. Mais ça dimoune-là même, pas capave être tous les deux - joli et pas joli en même temps. Li bizin soit ene ou bien l'autre. Li bizin soit joli ou bien pas joli.

Par exemple pou so maman, ene tifille li ene pli bon tifille ki capave existé. Mais ça même tifille, li ene pli dernier dimoune ki capave pou so belle-mère. Ene-là fine motivé par so l'amitié et so l'affection ki li ena pou so tifille pou trouve li bon. Et ça même dimoune fine jugé tout à fait différent par ene l'autre ki pas éprouve le même sentiment envers li.

Ça montré ki dimoune en général, ena tendance influencé par so sentiment, so l'état d'esprit et condition dans laquelle li été dans faire so jugement. Donc so jugement pou plutôt reflécté so sentiment ou bien so l'état d'esprit au lieu reflecté la vérité, la réalité et la justice. C'est pou ça ki Rasouloullah ‎(Sallallaahou A'laihi Wasallam)‎ fine empêche rende jugement en état de colère parce ki ene jugement dans ene l'état pareil li pou ene jugement sous l'influence ki ena toute chance dévié de la vérité.

Acoze ça Allah Ta'ala pas fine laisse le choix pou décide ceki bon et ceki pas bon dans la main banne dimounes, parce ki normalement dimoune li emporté par so banne sentiments de temps à autre ki souvent de fois empêche li prend décision ki bizin prend. C'est ene kitchose ki trouve dans la main Allah Ta'ala. Parce ki Allah Ta'ala li pas emporté par aukene sentiment. Li au delà de tout. Li pas emporté par le chagrin ni par contentement.

Li content quand dimoune faire bon et li en colère quand dimoune faire mauvais sans ki li emporté par contentement ou par la colère. Allah Ta'ala li au delà de tout. Li même "As-Swamad" ki pas bizin personne et li pas dépanne lors narien. Li indépendant. Kitchose ki li qualifié comme bon, li bon et kitchose ki li qualifié comme mauvais, li mauvais; même si ça pas rente dans nou l'esprit et même si li paraite illogique. Par exemple la polygamie pou toujours continué reste bon et louable malgré toute sorte de critiques et objections. Parce ki li autorisé par Allah Ta'ala - le Maître Suprême. Et l'autre coté "Riba" (l'intérêt) bizin être ene péché très très grave malgré li approuvé et encouragé par tout un chacun parce ki Allah Ta'ala fine interdit ça et fine déclare li Haraam. C'est Allah Ta'ala ki conné ki bon et ki pas bon. "...Ou pé capave détesté ene kitchose ki pourtant li bon pou ou, (couma) ou capave content ene kitchose ki pourtant li mauvais pou ou. Et c'est Allah ki conné et ou, ou pas conné." (S2/V216)

[Extrait de Al Jamiat Vol.1 No.10]