Vrai confort

Le coeur maman:-

Le coeur ene maman li couma dire ene la mer ki pas vine sale avec impureté. Au contraire li purifier tout ceki rente endans li. Ene z'enfant capave mal agir avec so maman mais le coeur ça maman-là li toujours assez large couma la mer pou blié tout ceki so z'enfant fine faire li et li prêt pou accueillir li à bras ouvert couma dire narien pas fine arriver.

L'amour ki ene maman ena pou so z'enfant li ene l'amour incomparable. Li ene l'amour tellement fort ki faire la maman accepter subir toute sorte difficulté si ça capave porte so z'enfant bonheur. Ene maman jamais pou satisfait avec confort ki li ena si li conné ki so z'enfant pas dans bien. So pli grand confort c'est le bien être de so z'enfant.

L'amour et l'affection ki ene maman ena pou so z'enfant capave donne nou ene ti l'idée de ki quantité Allah Ta'ala content so banne serviteurs. Parceki Allah Ta'ala li rempli de grâce et de pitié ki pena limite. C'est apartir ene ti poucentage narien du tout de ça grâce et de ça pitié-là même ki chaque créature dans l'univers éprouve et exprime so l'amitié pou ene l'autre. Et apartir ça même source l'amitié pou continué existé dans tous so banne formes juska Qiyaamat. Donc l'amour maternelle li couma ene miroir ki capave donne nou ene ti l'idée de la grâce d'Allah Ta'ala.

"Et-dans ou même ena (ene quantité signes) eski ou pas trouver?" (S51/V21)

La grâce d'Allah Ta'ala

Chaque kitchose ena ene limite. C'est necque Allah Ta'ala ki pena aukene limite. La mer ena ene limite. Maman ena ene limite couma so l'amitié ki li ena pou z'enfant aussi ena ene limite cote li arrête exister. Mais Allah Ta'ala pena aukene limite. Coumsa même la grâce d'Allah Ta'ala aussi pena aukene limite. Pena aukene qualificatif ki capave qualifier exactement la dimension de la grâce Allah Ta'ala. C'est necque Allah Ta'ala même conner ki quantité li rempli de grâce et de bonté.

"O z'enfant Adam! Tanque to pou dimane moi et to pou garde 1'espoir lors moi, mo pou continuer gracier toi, malgré tout ceki fine capave arriver de to part sans ki mo prend compte. O z'enfant Adam! Si to banne péché arrive (ene quantité) ki capave touche banne nuages dans le ciel et ensuite to dimane moi pardon alors mo pou pardonne toi sans mo prend compte. O z'enfant Adam! Si to vine cote moi avec ene quantité péché ki capave rempli la terre et ensuite to joine moi dans ene l'état cote to pas associé narien avec moi, mo vine vers toi avec autant de grâce." (Tirmizi)

Vrai confort

Ene vrai confort c'est ene confort ki pena aukene difficulté après ça. Ene confort pareil pas existé dans ça le monde-là. C'est neque dans jannat ki ça existé.

"Et là-bas ou pou gagne ceki ou le coeur oulé et ou pou ena droit à ceki ou dimandé." (S41/V31)

Pli grand cadeau ki ene maman et papa capave donne so z'enfant c'est faire li gagne ça confort-là. Zordi jour tout maman papa oulé le bien-être de zotte z'enfant mais bien tigite parmi zotte, zotte conscient et confiant ki le bien-être réel et le vrai confort trouve dans jannat. C'est ça même manque de conscience et de confiance ou de conviction ki faire banne parents pense seulement pou le bien-être temporaire de zotte z'enfant- sans ki zotte prend compte le bien-être réel et éternel de Aakhirat. C'est acoze ça ki li en colère si z'enfant-là pas alle l'école mais ça pas dire li narien si so z'enfant pas alle masjid. Li apprécié tout ceki li juge li dans l’avantage et progrès mondaine quand même ça li bien pas bon pou so Aakhirat.

Mais bien rare et bien tigite ena ki accepté attrape Aakhirat et surtout quand ça li handicap li dans so progrès mondaine.

Ene dimoune pas capave gagne tout. Li bizin perdi ene pou li gagne l'autre. Astere li bizin guetté ki li pou perdi pou li gagne ki kitchose.

"Celui ki content so Dounya, li pou bizin faire du tort so akhirat et celui ki content so Aakhirat li pou bizin faire so Dounya du tort. Alors donne préférence ene ki pou reste éternellement lors ene ki pou fini." (Mousnad Ahmad)

Pou ene ki ena Imaan, li na pena aukene choix apart attrape Aakhirat même si ça li pas avantageux pou li dans Dounya. Parceki ça Dounya-là avec tout so richesse et so confort na pas représente narien divant akhirat. Ça Dounya-là li couma ene goutte de l'eau dans l'océan divant Aakhirat. Donc c'est le bien-être et confort de Aakhirat ki nou bizin choisir pou nou et pou nou prochains. C'est dans ça même façon nou capave montré ki nou sincère envers nou même et nou banne z'enfants.

[Extrait de Al Jamiat Vol.1 No.10]