Izzat

Izzat ou bien l'honneur li ene créature pou Allah Ta'ala ki li fine crée couma li fine crée tout kitchose. Li dans la main Allah Ta'ala. C'est li même ki donne izzat à celui ki li oulé.

"… Et To même to donne l'honneur à celui ki to oulé et To même to donne déshonneur à celui ki To oulé…" (S3 V26)

Vrai izzat

Vrai izzat li trouve dans marche d'après l'ordre Allah Ta'ala. Ene dimoune so izzat dépane lors la quantité sérieux li été dans Deen. Pli li dans Deen, pli li ena izzat. Pli li loin avec Deen, pli li perna izzat. L'honneur ki ene dimoune ena malgré ki li pas dans Deen, c'est ene maquillage ki pas duré longtemps. Pas jordi pas demain li pou tombé. Mais izzat ki Allah Ta'ala donne kikene ki marche d'après so l'ordre, c'est ene vrai izzat. C'est ene couronne ki reste tout le temps lors la tête. Celui ki rode izzat ailleurs c'est absolument ene kikene ki pé alle dans direction opposée ki au lieu gagne ceki li oulé, pé pli éloigné de so but. C'est ene but ki pas pou réalisé jamais. Hazrat 'Oumar ‎(Radiyallahou anhou‎)‎ fine dire:

"Nou ti ene dernier peuple, Allah Ta'ala fine donne nou prestige à travers l'Islam. Astere n'importe quand nous pou rode prestige par ene l'autre moyen ki Allah Ta'ala fine donne nous li, Allah pou déshonore nous."

Izzat ki Allah Ta'ala donné

Ene izzat ki Allah Ta'ala donné personne pas pou capave rassé. Dans le passé combien fine vini coumsa ki fine assassine banne prophètes, fine martyrise banne personnages pieux - mais ça pas fine marché. Zotte fine continué reste ceki zotte ti été. C'est banne malfaiteurs ki fine faire défaite. C'est banne malfaiteurs ki fine perdi zotte le temps précieux dans essaye pou teigne ene lumière ki Allah Ta'ala fine allumé. Mais sa lumière-là fine continué allumé.

"Zotte oulé teigne la lumière Allah avec zotte la bouche mais Allah pas satisfait sans ki li complète so Noor (lumière) quand même banne kaafir combien zotte mécontent." ( S9 V32)

Ene dimoune li ranne li même service quand li pas oppose banne personnages pieux parceki so l'ennemité et so l'opposition pou faire li même du tort. Couma dire li pé tappe so la tête avec ene roche. C’est li même so la tête pou cassé. C'est ene façon pou vine en opposition avec Allah Ta'ala:

"Celui ki oppose ene mo Wali, mo déclare la guerre contre li …" (Boukhari)

Celui ki dans 'Baatil' (la fausseté), sans effacé li pou effacé depi lors map. Pas bizin efface li. Mais celui ki lors Haqq (la vérité), li continué faire so la route. Effacé li pas pou effacé. Li couma dire ene kitchose ki fine gravé dans ene objet. Si gratté, gratté aussi pou fini mais li pas pou fini. Si ena pou fini, li pou fini quand kitchose-là fini. Mais pou ena différence entre ça deux qualités fini-là. Ene-là fini pou ene bon cause et l'autre-là fine mal fini.

[Extrait de Al Jamiat Vol.1 No.11]