Devoir ene parent

Ene z’enfant so mentalité, so manière, so comportement, so façon vive et so l’interet pou pratique deen li influencé par la formation et éducation ki parents donné à so z’enfants. La façon ki parents pou enseigné et pou donne formation, sa façon la même ki sa z’enfant là pou  developpé et progressé. Le jour de Qiyaamah Allah Ta’ala pou pose question à chaque parents concernant so z’enfants: Ki l’éducation et formation ou fine donne ou z’enfants? Ki manière et ki comportement ou fine enseigne li? (Radiyallahou anhoum‎)

Alors ensemble avec responsabilité mondaine envers ene z’enfant en ce ki concerne nourriture, linge, etc..., li obligatoire lors chaque parent ki zotte donne zotte z’enfants formation de deen afin ki zotte capave vine honorable dans liz’iyé Allah Ta’ala et zotte protégé contre Jahannam.

Ene fois Hazrat ‘Abdoullah Ibné Thaabit Al-Ansari ‎(Radiyallahou anhoum‎)‎ fine appelle so banne garçons et li fine donne zotte de l’huile z’olive et fine dire zotte mette ça dans zotte la tête et frotté. Alors banne garçons là fine refuse pou mette de l’huile dans zotte la tête. ‘Abdoullah Ibné Thaabit Al-Ansari ‎(Radiyallahou anhoum‎)‎ fine prend ene bâton et fine commence batte so bannes garçons et li fine dire zotte: Est-ce-ki  zotte pé tourne le dos avec sounnate Rasouloullaah ‎(Sallallaahou A'laihi Wasallam)‎‎? Sa c’est la façon pou donne formation à bannes z’enfants et montré zotte l’importance de sounnate.‎

Dans ene sens l’obligation et responsabilité formation li repose plis lors mama. Parceki ene papa pou li capave subvenir à banne besoin de so madame et so z’enfants, li dépense ene bon parti so l’énergie et so le temps en dehors so lacage. C’est la maman ki reste plis avec z’enfant là. Donc li important pou ene mama ki li enseigne et donne formation so z’enfant et li garde ene regard bien stricte lors so manière. Et li même bizin faire ene z’effort ki li même li pratique deen.

Si ene mama li pieuse, li pas cause menti, li pas grossier, li lève bonheur li faire namaz gramatin, li faire tilaawat Qour’aan, alors banne z’enfants-là pou developpe sa banne bon qualité-là dans zotte. Et si mama la li cause menti, so la langue li fitté, li ena mauvais manière, li pas pratique deen, alors ça banne mauvais manière la pou developpe dans banne z’enfants-là aussi. Et ça banne trace-là et banne l’effets-là pou reste dans ça z’enfant-là jusqu'à so vieillesse et so la mort. Et so résultat pou néfaste ki li pou subir dans Dounya et Aakhitat. Tous ça là c’est l’effet l’environnement, lacaze  et manière ene mama.

Donc li nécessaire pou chaque mama, papa ki zotte même zotte reste loin avec gounaah et banne kitchose ki islam fine defane, et aussi zotte pratique banne comandement Allah Ta’ala. Et de l’autre coté zotte enseigne banne z’enfants aussi ki zotte reste loin avec gounaah et pratique deen Allah Ta’ala. De ça façon là donne zotte pou gagne ene bon formation de deen et l’éducation islamique afin ki zotte capave prospèré dans Dounya et dans Aakhirat.

[Extrait de Al Jamiat Vol.1 No.12]