To mama papa

Perna personne ki capave content toi plis ki to mama papa. Ene kitchose ki peut être to pas encore saisi et realisé. Quand toi to pou ena to propre z’enfant, lerla to pou conné vraiment ki quantité to mama papa content toi. Quand to z’enfant pou faire toi misère, lerla to pou conné ki quantité to fine faire to mama papa souffert.

Pas bizin pensé ki ena le temps pou arrive ça. Batte liz’iyé to pou trouve tout pé arrivé. Parceki le temps pas attane. Li marche toujours. Li roule toujours. C'est toi ki assizé. Toi ki dormi. Toi ki reposé. Le temps li en mouvement tout le temps. Ene kitchose ki en mouvement tout le temps, li pas tardé pou vini.

Respect pou mama papa

Respect pou mama papa ena grand valeur dans l'Islam. Li tellement important ki Allah Ta'ala fine donne l'ordre pou pas maltraite mama papa ensemble cote li fine donne l'ordre pou pas adore personne apart li. Maltraite mama papa li ene genre de koufr ki impé pareille couma faire koufr avec Allah Ta'ala. Acoze ça, Qour'aan-e-Kareem fine mette boucou l'emphase lors respect mama papa. Allah Ta'ala dire:-

"… Pas dire zotte 'Ouf' aussi ni crié avec zotte, mais dire zotte ene bon parole (dans ene bon façon)." (S17 V23)

Quand ene dimoune vine vieux, li gagne boucou manquement dans li. Li capave répète ene seule causé à plusieurs reprises. Faudré pas ene z’enfant montré li agacé et ennuyeux avec so mama papa dans ene moment pareille. Si ena pou dire kitchose, bizin dire li dans ene façon pli approprié ki capave.

Hazrat Moujahid dire ki quand mama papa fine vine vieux cote ou, faudré pas ou lève néné pou nettoye zotte. Imagine bien ki ou aussi ou ti coumsa quand ou ti ene ti baba. Ou mama papa jamais fine lève néné pou nettoye ou.

Rasouloullah ‎(Sallallaahou A'laihi Wasallam)‎ fine dire:-

"Jannat trouve enbas li pied mama."

[Extrait de Al Jamiat Vol.1 No.12]