Zeffort et comfort

Zeffort ki ene dimoune faire pou so confort mondaine c’est ene zeffort plis ki confort parceki li ena necque ene ti boute le temps pou li reste lors la terre. Donc c’est necque ene ti pé le temps même ki li pou jouir. Par contre zeffort ki li faire pou so confort dans aakhirat après la mort, c’est ene zeffort ki vaut la peine faire. Si li ena pou faire zeffort entier so la vie, là aussi li pou dans profit parceki confort dans aakhirat li ene confort pou tout le temps. C’est à nou de choisir ki qualité zeffort nou bizin faire. Ene ti pé zeffort pou aakhirat pou ene grand confort dans aakhirat ou bien ene quantité zeffort pou dounia pou necque ene ti pé confort.

Mais ene zaffaire ki nou tous conné quand même pas tous ki réalisé et agir d’après ça, c’est ki ene dimoune intelligent pas pou craze so la caze à cote li ena pou resté tout le temps pou investir li dans faire ene la tente à cote li pou pique-niqué pou quelques jours seulement. Nou vrai la caze li trouve dans aakhirat à cote nou ena pou vive pou tout le temps. Faudré pas nou laisse nou banne activité dans dounia affecté nou position dans aakhirat !

[Extrait de Al Jamiat Vol.1 No.13]