Pas faire paresse

 Ala encore ene fois Allah Ta’ala pé accorde nou la chance pou bénéficié et profité avec banne bienfaits dans le mois de Ramadwan. C’est ene grand cadeau et ene faveur inestimable de coté Allah Ta’ala ki nou pé regagné. Nou banne frères ki fine fini quitté, fine allé, si zotte ti capave dire nou ene coup zotte ti pou dire nou ki quantité valeureux le mois de Ramadwaan été. Malheureusement banne ki fine allé, zotte pé regretté et banne ki encore ena la chance, zotte pas pé oulé profité. Faudré pas faire paresse. Sinon la paresse faire ene dimoune trouve ene quantité prétextes pou pas faire ‘ibaadat - surtout concernant tarawih. Bizin bénéficié tanque capave par faire Tilaawat-ul-Qour’aan, Tasbeehaat, Zikroullah, Istighfaar, Dou’aa et Daroud Shareef pendant ça mois sacré-là. Et surtout pas faire paresse pou faire 20 rakaat tarawih ki li ene pratique ki fine pratiqué par banne Sahaba-e-Kiraam, banne Tabeïnes, banne Taba-Tabeïnes et banne musulmans en général. Ki Allah Ta’ala donne nou tawfeeq pou engage nou maximum le temps dans ‘ibaadat et faire nou vine parmi so banne serviteurs sincères et dévoués ! Ameen !

[Extrait de Al Jamiat Vol.1 No.14]